ថ្នាក់ដឹកនាំកម្ពុជា-វៀតណាម ឯកភាពឲ្យក្រសួងទេសចរណ៍ប្រទេសទាំងពីរ បង្កើនការពិភាក្សាស្វែងរកឱ​កាសជំរុញកំណើនទេសចរណ៍

នាយករដ្ឋមន្ត្រីកម្ពុជា និងនាយករដ្ឋមន្ត្រីវៀតណាម បានឯកភាពឲ្យក្រសួងទេសចរណ៍បង្កើនកិច្ចពិភាក្សា ដើម្បីស្វែងរកឱកាស ក្នុងការជំរុញកំណើនទេសចរណ៍។

ការឯកភាពគ្នានេះ ធ្វើឡើងក្នុងជំនួបពិភាក្សាការងារទ្វេភាគី រវាងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ផាម មិញជិញ នាយករដ្ឋមន្រ្តីវៀតណាម ក្នុងឱកាសចូលរួមកិច្ចប្រជុំកំពូលអាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី នាព្រឹកថ្ងៃទី ៦ ខែមីនា ឆ្នាំ ២០២៤នេះ។

នៅក្នុងជំនួបនេះ លោក ផាម មិញជិញ បានអបអរសាទរកម្ពុជា ចំពោះជោគជ័យនៃរៀបចំការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ក៏ដូចជាអបអរសាទរចំពោះគណបក្សប្រជាជនកម្ពុជា ដែលទទួលបានជ័យជំនះលើការបោះឆ្នោត ដោយទទួលបាន ៥៥អាសនៈ។

លោកនាយករដ្ឋមន្រ្តីវៀតណាម ក៏បានផ្ដាំផ្ញើការសួរសុខទុកថ្វាយជូនព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រី និងថ្នាក់ដឹកនាំមួយចំនួនទៀត នៃប្រទេសកម្ពុជា ផងដែរ។

ជាការឆ្លើយតប សម្តេចធិបតី ហ៊ុន ម៉ាណែត បានស្វាគមន៍ និងក្ដីរីករាយដែលបានជួបពិភាក្សាការងារទ្វេភាគីជាមួយលោកនាយករដ្ឋមន្ត្រីវៀតណាម ជាថ្មីម្ដងទៀត ដែលនេះជាឱកាសនៃកិច្ចពិភាក្សាលើកិច្ចសហប្រតិបត្តិការដែលបានឯកភាពគ្នានាពេលកន្លងមក និងការបន្តពិភាក្សាលើកិច្ចសហប្រតិបត្តិការ នាថ្ងៃអនាគតបន្ថែមទៀត។

នៅក្នុងជំនួបនេះ ថ្នាក់ដឹកនាំទាំងពីរ ក៏បានពិភាក្សាគ្នាលើវិស័យគន្លឹះ ដែលជាកម្មវត្ថុនៃការពង្រឹង និងពង្រីកកិច្ចសហប្រតិបត្តិការបន្ថែម រវាងកម្ពុជា និងវៀតណាម ដែលរួមមានដូចជា៖ វិស័យការពារជាតិ និងសន្តិសុខ វិស័យទេសចរណ៍ និងការតភ្ជាប់ហេដ្ឋារចនាសម្ព័ន្ធ ដូចជា៖ ផ្លូវលឿន ភ្នំពេញ-បាវិត-ហូជីមិញ ជាដើម។

ដោយក្នុងក្របខ័ណ្ឌ នៃកិច្ចសហប្រតិបត្តិការការងារត្រីភាគី CLV, ថ្នាក់ដឹកនាំទាំងពីរ បានគូសបញ្ជាក់ថា នៅថ្ងៃខាងមុខ នឹងមានការរៀបចំកិច្ចប្រជុំកំពូល CLV លើកទី ១២ ហើយបានលើកទឹកចិត្តឲ្យក្រសួង-ស្ថាប័នមួយចំនួនដើម្បីពង្រឹង និងពង្រីកកិច្ចសហប្រតិបត្តិការគ្នាក្នុងក្របខ័ណ្ឌ CLV បន្ថែមទៀត។

រីឯក្នុងវិស័យទេសចរណ៍ ថ្នាក់ដឹកនាំទាំងពីរ បានឯកភាពឲ្យក្រសួងទេសចរណ៍បង្កើនកិច្ចពិភាក្សា ដើម្បីស្វែងរកឱកាស ក្នុងការជំរុញកំណើនទេសចរណ៍ក្នុងប្រទេសទាំង ៣ កម្ពុជា ឡាវ និងវៀតណាម។ ថ្នាក់ដឹកនាំទាំងពីរ ក៏បានពិភាក្សាគ្នាលើកិច្ចការមួយចំនួន ដែលជាផលប្រយោជន៍រួម សម្រាប់ប្រទេសកម្ពុជា និងប្រទេសវៀតណាម ផងដែរ៕