ព័ត៌មានជាតិ

ពលករខ្មែរធ្វើការនៅថៃ សម្រុកទៅវិញតាមច្រកប៉ោយប៉ែតមួយថ្ងៃពី៣ទៅ៤ពាន់នាក់ ក្រោយបុណ្យចូលឆ្នាំបានបញ្ចប់

បានផុស

២ years មុន

នៅ

ថ្ងៃព្រហស្បតិ៍ ១៨ មេសា ២០២៤

ដោយ

ប៉ោយប៉ែត ៖ រយៈពីរថ្ងៃចាប់តាំងពីថ្ងៃទី១៦ ខែមេសា ឆ្នាំ២០២៤ ក្រោយបុណ្យចូលឆ្នាំប្រពៃណីខ្មែរបានបញ្ចប់ពលករខ្មែរធ្វើការនៅប្រទេសថៃ ដែលបានមកចូលរួមបុណ្យចូលឆ្នាំនៅស្រុកកំណើតកំពុងសម្រុកទៅប្រទេសថៃវិញមួយថ្ងៃពី៣ទៅ៤ពាន់នាក់ តាមច្រកទ្វារអន្តរជាតិប៉ោយប៉ែតត្រូវបាននគរបាលអន្តោប្រវេសន៍ប្រចាំច្រកសម្របសម្រួលផ្តល់ភាពងាយស្រួលនិងចែកទឹកសុទ្ធដូចកាលមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឱ្យដឹងពីមន្ត្រីនគរបាលប្រចាំច្រកទ្វារអន្តរជាតិប៉ោយប៉ែតបានឱ្យដឹងថា ដោយអនុវត្តតាមការណែនាំរបស់លោកឧត្តមសេនីយ៍ត្រីអ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិឱ្យកម្លាំងបន្តអនុវត្តតាមផែនការណែនាំរបស់រដ្ឋាភិបាល ក៏ដូចជាការយកចិត្តទុកដាក់របស់អគ្គអន្តោប្រវេសន៍និងក្រសួងមហាផ្ទៃលើការសម្របសម្រួលដល់ការធ្វើដំណើរចេញចូលរបស់ពុកម៉ែបងប្អូនជាពលករខ្មែរឱ្យបានឆាប់រហ័សនិងមានការយកលុយអ្វីឡើយ។

បន្ថែមពីលើការសម្រួលឱ្យពួកគាត់បានចេញដោយងាយស្រួលនឹងឆាប់រហ័សសមត្ថកិច្ចបានចែកជូននៅទឹកសុទ្ធជូនដល់ពួកគាត់ថែមទៀត។

មន្ត្រីនគរបាលអន្តោប្រវេសន៍បានឱ្យដឹងទៀតថា ពលករខ្មែរដែលកំពុងសម្រុកចេញទៅធ្វើការនៅប្រទេសថៃវិញ ក្រោយបញ្ចប់បុណ្យចូលឆ្នាំខ្មែរគឺទើបតែរយៈពេលពីថ្ងៃទេ គឺចាប់ពីថ្ងៃទី១៧និង១៨ម្សិលមិញដែលក្នុងមួយថ្ងៃពួកគាត់នាំគ្នាចេញទៅវិញចន្លោះពី៣ពាន់នាក់ទៅ៤ពាន់នាក់។

សូមបញ្ជាក់ថា ដោយមានការយកចិត្តទុកដាក់ពីសម្តេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជាលើការសម្របសម្រួលជាមួយរដ្ឋាភិបាលថៃ បានឯកភាពគ្នាលើកលែង តម្លៃសេវាអនុញ្ញាតចេញ–ចូល (Re-Entry Permit) សម្រាប់បងប្អូនពលករកម្ពុជា ដែលធ្វើដំណើរចេញ–ចូលប្រទេសថៃចាប់ពីថ្ងៃទី០១ ខែមេសា ដល់ថ្ងៃទី១៥ ខែ ឧសភា ឆ្នាំ២០២៤។

ការលើកលែងតម្លៃសេវានេះ គឺសម្រាប់ពលករកម្ពុជា ដែលមានលិខិតឆ្លងដែន /លិខិតធ្វើដំណើររបស់ពលករកម្ពុជា ទៅធ្វើការនៅបរទេសនិងមានទិដ្ឋាការការងារ ដែលមាន សុពលភាពក្រោយថ្ងៃទី១៥ ខែឧសភា ឆ្នាំ២០២៤ រួមទាំងកូន មានអាយុក្រោម១៨ឆ្នាំ ដែលទទួលបានការវាយត្រា ប្រភេទអ្នកក្នុង បន្ទុក និង អនុញ្ញាតឲ្យស្នាក់នៅ ក្នុងប្រទេសថៃ មានសុពល ភាពក្រោយពីថ្ងៃទី១៥ ខែឧសភា ឆ្នាំ២០២៤៕

ដោយ ៖ អ.ពៅ