រូបសំណាកសេះសមុទ្រ កំពុងបន្តទាក់ទាញភ្ញៀវទេសចរជាតិ និងអន្តរជាតិមកលេងកាន់តែច្រើន

នាថ្ងៃទី៩ រហូតដល់ថ្ងៃទី១០ ខែឧសភា ឆ្នាំ២០២៤ នេះ លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា រូបសំណាកសេះសមុទ្រនៅក្រុងកំពតខេត្តកំពត កំពុងបន្តទាក់ទាញភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិមកលេងលម្ហែកម្សាន្តកាន់តែច្រើនឡើងគួរឱ្យកត់សម្គាល់។

ប្រធានមន្ទីរទេសចរណ៍ខេត្តបន្ថែមថា បន្ទាប់ពីខេត្តកំពតបានកសាងរូបសំណាកសេះសមុទ្របាញ់ទឹករួចរាល់ ភ្ញៀវទេសចរជាតិ និងអន្តរជាតិបាននាំគ្នាចូលមកទស្សនាលម្ហែកម្សាន្តចាប់ពីបុណ្យចូលឆ្នាំថ្មីប្រពៃណីជាតិខ្មែរមកដល់បច្ចុប្បន្នមានការកើនឡើងចាប់ពី៧ម៉ឺននាក់ កើនឡើងទៅដល់ជាង ១១ ម៉ឺននាក់។

លោក សយ សុីណុល បានបន្តឲ្យដឹងថា ជាពិសេសភ្ញៀវទេសចរណ៍មកពីបណ្តាខេត្តឆ្ងាយៗ ដែលគេចង់ស្គាល់ ហើយនិងចង់ឃើញផ្ទាល់ភ្នែកនូវរូបសេះសមុទ្របាញ់ទឹកខេត្តកំពត ដែលកំពុងមានការចាប់អារម្មណ៍ទាក់ទាញយ៉ាងខ្លាំងពីសំណាក់មហាជននៅតាមបណ្ដាខេត្តផ្សេងៗផងដែ។

លោក សយ សុីណុល ប្រធានមន្ទីរបានឱ្យដឹងទៀតថា ជាពិសេសនៅថ្ងៃសៅរ៍ និងថ្ងៃអាទិត្យភ្ញៀវទេសចរជាតិនិងអន្តរជាតិមកលេងទស្សនាលម្ហែកម្សាន្តច្រើន ទោះបីអាកាសធាតុក្តៅហែងយ៉ាងណានោះ។ លោកបានសង្កេតឃើញភ្ញៀវទេសចរនៅតែបន្តធ្វើដំណើរមកពីបណ្ដាខេត្តឆ្ងាយៗ ជាពិសេសមកពីរាជធានីភ្នំពេញបានធ្វើដំណើរមកកាន់ខេត្តកំពត ដើម្បីទស្សនា ផ្តិតយករូបភាព នៅតាមបណ្តារមណីយដ្ឋាននានា ពិសេសមកទស្សនារូបសេះសមុទ្របាញ់ទឹក ដែលស្ថិតត្រង់ចំណុចមុខសាលាខេត្តកំពតចាស់។

ក្នុងដំណើរឆ្ពោះទៅគោលដៅទេសចរណ៍ ៣៩ កន្លែងនៅក្នុងខេត្តកំពត ដូចជាភ្នំបូកគោ តំបន់ទេសចរណ៍ណាតាយ៉ា រមណីយដ្ឋានទឹកឈូ ឬសហគមន៍ត្រពាំងសង្កែ និងតាមបណ្តាតំបន់ទេសចរណ៍ជាច្រើនទៀត ប៉ុន្តែអំឡុងពេលនេះ មហាជនបែរជាសំរុកទៅលំហែ ផ្តិតយករូបភាពដ៏ស្រស់ត្រកាលគ្មាពីរ នៃរូបសំណាកសេះសមុទ្របាញ់ទឹក នៅមុខសាលាខេត្តកំពតទៅវិញ។ ដោយសារតែមានភាពល្បីល្បាញបែបនេះ គេបានកត់សម្គាល់ឃើញដែរថា ខេត្តកំពតពិតជាមានការកើនឡើងនូវភ្ញៀវទេសចរ ឥតឈប់ឈរពីមួយឆ្នាំទៅមួយឆ្នាំ។

ជាមួយគ្នានោះដែរលោកប្រធានមន្ទីទេសចរណ៍ខេត្តកំពតបានប្រាប់ឲ្យដឹងថា នៅតាមតំបន់ភូមិសាស្ត្រក្នុងខេត្តកំពតដែលសុទ្ធសឹងជាគោលដៅទេសចរណ៍សំខាន់ៗ ដោយបច្ចុប្បន្នរដ្ឋបាលខេត្តកំពត បាននិងកំពុងយកចិត្តទុកដាក់ខិតខំកែលម្អឱ្យមានសោភ័ណភាពឱ្យកាន់តែមានភាពលេចធ្លោ ដើម្បីបង្កើនសក្តានុពលខេត្តទេសចរណ៍មួយនេះ ឱ្យកាន់តែរីកចម្រើនបន្ថែមមួយកម្រិតទៀតជាខេត្តគោលដៅទេសចរណ៍ទី ២ នៃខេត្តកំពត៕

អត្ថបទ៖ សឹង រ៉ាត់