ព័ត៌មានជាតិ

រដ្ឋាភិបាលស្វីស ប្ដេជ្ញាជួយលើកកម្ពស់សុខុមាលភាពប្រជាជន ស្ត្រី និងកុមារកម្ពុជា ឱ្យកាន់តែប្រសើរថែមទៀត

បានផុស

២ years មុន

នៅ

ថ្ងៃសុក្រ ១៧ ឧសភា ២០២៤

ដោយ

រដ្ឋាភិបាលសហព័ន្ធស្វីស បានប្ដេជ្ញាជួយលើកកម្ពស់សុខុមាលភាពប្រជាជន ស្ត្រី និងកុមារកម្ពុជាឱ្យកាន់តែប្រសើរថែមទៀត ដើម្បីឱ្យប្រទេសកម្ពុជាឈានទៅសម្រេចបាននូវការគ្របដណ្ដប់សុខភាពជាសកល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្ដេជ្ញារបស់រដ្ឋាភិបាលសហព័ន្ធស្វីសនេះ បានធ្វើឡើងកាលពីរសៀលថ្ងៃទី ១៦ ឧសភា ខណៈលោក Pedro Zwahlen ឯកអគ្គរដ្ឋទូតសហព័ន្ធស្វីសប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងបាងកក ប្រទេសថៃ បានទទួលជួបសំដែងការគួរសម និងពិភាក្សាការងារជាមួយ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នៅទីស្ដីការក្រសួង។

នៅក្នុងជំនួបនោះ លោកឯកអគ្គរដ្ឋទូត បានបញ្ជាក់អំពីគោលជំហរបន្តពង្រឹងទំនាក់ទំនងការទូតរយៈពេលជាង ៦០ ឆ្នាំ និងចូលរួមពង្រីកកិច្ចសហប្រតិបត្តិការដែលមានស្រាប់ តាមរយៈការបន្តជួយការលើកកម្ពស់សុខុមាលភាពប្រជាជន ស្ត្រី និងកុមារកម្ពុជា។

លោកសាស្ត្រាចារ្យ ឈាង រ៉ា បានស្វាគមន៍ចំពោះកិច្ចសហការបន្ថែមលើវិស័យសុខាភិបាល រួមមានការលើកកម្ពស់សុខុមាលភាពប្រជាជន ស្ត្រី និងកុមារកម្ពុជា ការលើកកម្ពស់គុណភាពសេវាសុខាភិបាល និងការអភិវឌ្ឍធនធានមនុស្សសុខាភិបាល ដើម្បីរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្ដប់សុខភាពជាសកល ស្របតាមផែនការយុទ្ធសាស្ត្របញ្ចកោណ នៃរាជរដ្ឋាភិបាលអាណត្តិទី ៧។

ក្នុងនាម ក្រសួងសុខាភិបាល លោករដ្ឋមន្ត្រី បានសំដែងការកោតសរសើរ និងរំលឹកគោរពនូវវិញ្ញាណក្ខន្ធ លោកវេជ្ជបណ្ឌិតជនជាតិស្វីស Beat Richner ដែលបានចំណាយពេលវេលាទាំង កម្លាំងកាយ និងកម្លាំងចិត្តដ៏ច្រើនធំធេង ដែលបានបង្កើតមន្ទីរពេទ្យគន្ធបុប្ផា និងជាស្នាដៃមនុស្សធម៌ ប្រវត្តិសាស្ត្របន្សល់ទុកក្នុងដួងចិត្តប្រជាជនកម្ពុជាទាំងអស់៕

អត្ថបទ ៖ សំអឿន