ព័ត៌មានជាតិ

៥ ខែនេះ មជ្ឈមណ្ឌលផ្តល់ឈាម ទទួលបានអំណោយឈាមជាង ៥ ម៉ឺនប្លោក នៅទូទាំងប្រទេស

បានផុស

២ years មុន

នៅ

ថ្ងៃសុក្រ ២៤ ឧសភា ២០២៤

ដោយ

នៅក្នុងរយៈពេល ៥ ខែ ឆ្នាំ ២០២៤ នេះ មជ្ឈមណ្ឌលជាតិផ្តល់ឈាម បានទទួលអំណោយឈាមទាំងអ្នកផ្តល់ជំនួស និងអ្នកស្ម័គ្រចិត្តប្រមាណជាង ៥ ម៉ឺនប្លោក សម្រាប់ជួយដល់អ្នកជំងឺដែលត្រូវការឈាមជាចាំបាច់ក្នុងការសង្គ្រោះអាយុជីវិត។

ថ្លែងក្នុងពិធីប្រគល់ទទួល និងសម្ពោធដាក់ឱ្យប្រើប្រាស់ជាផ្លូវការ “អគារចុះឈ្មោះ និងបន្ទប់រង់ចាំបរិច្ចាគឈាម” នៅព្រឹកថ្ងៃទី ២៤ ឧសភានេះ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា ក្នុងចំណោមអំណោយឈាមជាង ៥ ម៉ឺនប្លោក ក្នុងនោះមជ្ឈមណ្ឌលជាតិទទួលបាន ៤១ ០០០ ប្លោក និងតាមបណ្តាខេត្តទទួលបានជាង ១ ម៉ឺនប្លោក សរុបជាង ៥ ម៉ឺនប្លោក និងបានផ្គត់ផ្គង់ឈាមប្រមាណជាង ៦ ម៉ឺនប្លោក ទៅតាមមន្ទីរពេទ្យនានាទូទាំងប្រទេស។

លោកវេជ្ជបណ្ឌិត បានបន្តថា តម្រូវការឈាមមានការកើនឡើងជាបន្តបន្ទាប់ដោយសារអ្នកជំងឺត្រូវការឈាមសម្រាប់សង្គ្រោះអាយុជីវិតក៏មានច្រើន។ ជាក់ស្តែងនៅឆ្នាំ ២០២៣ កន្លងទៅ ទទួលបានឈាមចំនួន ១៤៣ ១៤៣ ប្លោក។ ប៉ុន្តែយើងបានផ្គត់ផ្គង់ប្រមាណ ១៥ ម៉ឺនប្លោក មានការកើនឡើងប្រមាណ ៣០% ដែលការកើនឡើងនេះវាជាបញ្ហាប្រឈមរបស់ក្រសួងផងដែរ ព្រោះបើកាលណាតម្រូវការឈាមកើនឡើង យើងក៏ត្រូវស្វែងរកឈាមដើម្បីបំពេញទៅតាមតម្រូវការនោះដែរ។

លោកវេជ្ជបណ្ឌិត បានបន្តទៀតថា ចំពោះផែនការយើងមានច្រើនរហូតមកដល់ពេលនេះយើងមានការផ្សព្វផ្សាយដល់ប្រជាពលរដ្ឋឱ្យមានការយល់ដឹងពីសារៈសំខាន់ នៃការបរិច្ចាគឈាម ដើម្បីឱ្យចូលរួមផ្តល់ឈាមឱ្យបានច្រើនបន្ថែមទៀត ខណៈបច្ចុប្បន្នការផ្តល់ឈាមដោយការស្ម័គ្រចិត្តមានត្រឹម ២០% ប៉ុណ្ណោះ ខណៈប្រទេសជិតខាងមានរហូតដល់ទៅជាង ៩០%។ ក្រៅពីនេះមជ្ឈមណ្ឌលបានសហការជាមួយក្រសួងចំនួន ១២ ដែលនឹងជួយផ្តល់ឈាមទៀងទាត់ ហើយគ្រោងនឹងបន្តសហការជាមួយក្រសួងដែលនៅសេសសល់ឱ្យចូលរួមជាបន្តបន្ទាប់ទៀត ក៏ដូចជាសហការជាមួយវិស័យឯកជន ធនាគារ សាកលវិទ្យាល័យ ស្ថាប័នរដ្ឋ និងសហភាពសហព័ន្ធយុវជនកម្ពុជា។

លោកវេជ្ជបណ្ឌិត រំពឹងថា នៅបំណាច់ឆ្នាំ ២០២៤ នេះ សង្ឃឹមថា នឹងទទួលបានអំណោយឈាមប្រមាណ ១ សែន ៦ ម៉ឺនប្លោក។ លោកវេជ្ជបណ្ឌិត បានអំពាវនាវប្រជាពលរដ្ឋចូលរួមបរិច្ចាគឈាមដោយស្ម័គ្រចិត្តឱ្យបានផុសផុលដើម្បីអត្ថប្រយោជន៍ផ្ទាល់ខ្លួននិងសង្គម។ ព្រោះថាការបរិច្ចាគឈាមដោយស្ម័គ្រចិត្តមានសារប្រយោជន៍ច្រើនដូចជាកាត់បន្ថយជាតិដែក សម្រួលសរសៃឈម ស្ត្រូក មហារីកឈាម និងចូលរួមសង្គ្រោះជីវិតអ្នកជំងឺជាមួយគ្រូពេទ្យ ពិសេសទទួលបានបុណ្យកុសលមិនអាចកាត់ថ្លៃបានក្នុងនាមពលរដ្ឋជាកាន់ព្រះពុទ្ធសាសនា៕

អត្ថបទ ៖ សំអឿន