កម្ពុជាមានអ្នកស្ម័គ្រចិត្តបរិច្ចាគឈាមមិនគិតកម្រៃជិត២០% ខណៈអ្នកផ្តល់ឈាមជំនួសមានរហូតដល់ទៅជាង៨០%

បច្ចុប្បន្ននេះចំនួនអ្នកស្ម័គ្រចិត្តបរិច្ចាគឈាម និងមិនទទួលកម្រៃមានប្រមាណជិត២០%ប៉ុណ្ណោះ ខណៈអ្នកស្ម័គ្រចិត្តផ្តល់ឈាមជំនួសមានរហូតដល់ទៅជាង៨០%ឯណោះដែលទាមទារឱ្យប្រជាពលរដ្ឋយកចិត្តទុកដាក់ និងចូលរួមបរិច្ឆាគឈាមឱ្យបានច្រើនបន្ថែមទៀត ដើម្បីបំពេញតាមសេចក្តីត្រូវការរបស់ជនរងគ្រោះ និងអ្នកជំងឺដែលត្រូវការឈាមជាចាំបាច់។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបានមានប្រសាសន៍នៅព្រឹកថ្ងៃទី១៦មិថុនានេះថា
ចំនួនអំណោយឈាមទូទាំងប្រទេសនៅឆ្នាំ២០២៣ សរុបមាន១៤៣,១៤៣ប្លោក ដោយចំនួនអ្នកស្ម័គ្រចិត្តបរិច្ចាគឈាម និងមិនទទួលកម្រៃ មានចំនួន២៧,៨៣៨ប្លោក ស្មើនឹង១៩.៤% នៃអំណោយឈាមទូទាំងប្រទេស។ ចំនួនឈាម
ដែលបានប្រើប្រាស់នៅតាមមន្ទីរពេទ្យរដ្ឋ និងឯកជនមានចំនួន១៤៩,២៧៤ប្លោក ។

លោកវេជ្ជបណ្ឌិតបានបន្តថា ក្នុងនោះចែកចេញជា២ផ្នែក ទី១-នៅមជ្ឈមណ្ឌលជាតិផ្តល់ឈាមចំនួនទទួលបានអំណោយឈាមសរុប៩៨,៤៦០ប្លោក ក្នុងនោះអ្នកស្ម័គ្រចិត្តបរិច្ចាគឈាម និងមិនទទួលកម្រៃមានចំនួន១៧,៣៨០ប្លោក ស្មើនឹង១៧.៧% នៃអំណោយឈាមសរុប និងអ្នកស្ម័គ្រចិត្តបរិច្ចាគជំនួសឈាមដោយក្រុមគ្រួសារ មានចំនួន៨១,០៨០ប្លោក
ស្មើនឹង៨២.៣%នៃអំណោយឈាមសរុប។ ចំនួនឈាមដែលបានប្រើប្រាស់នៅតាមមន្ទីរពេទ្យរដ្ឋ និងឯកជន មាន
ចំនួន១០៣,៥៤២ ប្លោក។ ទី២- នៅមណ្ឌលផ្តល់ឈាមខេត្តនានាទទួលបានអំណោយឈាមសរុប៤៤,៦៨៣ប្លោក ក្នុងនោះអ្នកស្ម័គ្រចិត្តបរិច្ចាគឈាម និងមិនទទួលកម្រៃ មានចំនួន១០,៤៥៨ប្លោក ស្មើនឹង២៣.៤% នៃអំណោយឈាមសរុប
និងអ្នកស្ម័គ្រចិត្តបរិច្ចាគឈាមជំនួសដោយក្រុមគ្រួសារ មានចំនួន៣៤,២២៥ប្លោក ស្មើនឹង៧៦.៦% នៃអំណោយឈាមសរុប។ ចំនួនឈាមដែលបានប្រើប្រាស់នៅតាមមន្ទីរពេទ្យខេត្តនានាមានចំនួន៤៥,៧៣២ប្លោក។

លោកវេជ្ជបណ្ឌិតបានបន្តថា ដោយឡែកនៅ៣ខែដើមឆ្នាំ២០២៤ ចំនួនអំណោយឈាមទូទាំងប្រទេសសរុបមាន ៣៦,៦៩៥ប្លោក ដោយចំនួនអ្នកស្ម័គ្រចិត្តបរិច្ចាគឈាម និងមិនទទួលកម្រៃមានចំនួន៨,៧៩២ប្លោកស្មើនឹង២៤.០% នៃអំណោយឈាម ទូទាំងប្រទេសហើយបានចែកចាយប្រើប្រាស់នៅតាមមន្ទីរពេទ្យរដ្ឋនិងឯកជនមានចំនួ​ន​៣៩,៤៦០​ប្លោក។

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានអះអាងថា បច្ចុប្បន្នក្នុង១ថ្ងៃកម្ពុជាមានត្រូវការឈាមស
ម្រាប់ជួយសង្គ្រោះអាយុជីវិតដល់អ្នកជំងឺ និងជនរងគ្រោះប្រមាណ៤០០ប្លោកក្នុង១ថ្ងៃ ក្នុងនោះនៅរាជធានីភ្នំពេញត្រូវការប្រមាណ៦៥%ស្មើនឹង២៦០ប្លោក និងតាមបណ្តាខេត្ត៣៥% ត្រូវការ១៤០ប្លោក។

លោករដ្ឋមន្ត្រីបានណែនាំដល់មជ្ឈមណ្ឌលជាតិផ្តល់ឈាមត្រូវរៀបចំបែងចែងក្រុមការងារផ្តល់ឈាមដើម្បីចុះទៅប្រមូលឈាមតាមគោលដៅនីមួយៗនៅក្នុងរាជធានីភ្នំពេញ ក៏ដូចជានៅតាមបណ្តាខេត្តនៅតាមសាកលវិទ្យាល័យ
ស្ថាប័នរដ្ឋ និងវិស័យឯកជនានាសំដៅធ្វើយ៉ាងណាប្រមូលឈាមឱ្យបានច្រើនដើម្បីជួយដល់ជនរងគ្រោះដែលកំពុងត្រូវការឈាមជាចាំបាច់ ពិសេសឱ្យប្រទេសកម្ពុជាទទួលបានឯករាជ្យដោយទទួលបានការផ្តល់ឈាមដោយស្ម័គ្រចិត្តច្រើនដូចបណ្តាប្រទេសជិតខាងមានរហូតដល់ទៅជាង៩០%ដែលធ្វើឱ្យគេអាចផ្គត់ផ្គង់ឈាមបានគ្រប់គ្រាន់ដោយមិនចាំបាច់ឱ្យក្រុមគ្រួសារឬសាច់ញាតិបរិច្ឆាគឈាមជំនួសនោះទេ៕

អត្ថបទ៖ សំអឿន