ស្គាល់អត្តសញ្ញាណ​ជនដៃដល់ សម្លាប់នារីកាស៊ីណូ មិនមែនជាជនជាតិចិន

សមត្ថកិច្ច បានកំណត់មុខសញ្ញាជនដៃដល់ ករណីឃាតកម្មអាករសម្លាប់នារីបុគ្គលិគ្គកាស៊ីណូវ័យ ២២ ឆ្នាំ នៅក្រុងប៉ោយប៉ែត ខេត្តបន្ទាយមានជ័យ។ ពេលនេះ សមត្ថកិច្ចកំពុងដុតដៃដុតជើង តាមចាប់ជនដៃដល់។

ស្នងការខេត្តបន្ទាយមានជ័យ លោក សិទ្ធឡោះ បានប្រាប់កម្ពុជាថ្មីមុននេះ បន្តិចថា ជនដៃដល់មិនមែនជាជនជាតិចិននោះទេ គឺជាខ្មែរ ដែលធ្វើការសំណង់។

លោកប្រាប់ថា ចំពោះដំណើររឿងមិនទាន់ដឹងយ៉ាងណានោះទេ តែគ្រាន់តែដឹងថា ជនសង្ស័យ ជាមនុស្ស​ដែលគ្មានគោលដៅពិតប្រាកដមកជួលបន្ទប់ស្នាក់នៅក្បែរបន្ទប់នារីរងគ្រោះ។

លោក ស្នងការបានបន្តថា អ្វីដែលសមត្ថកិច្ចកំណត់បានគឺផ្អែកទៅលើកាំមេរ៉ាសុវត្ថិភាព និងអត្តសញ្ញាណបុគ្គលសង្ស័យដែលកាំមេរ៉ាចាប់បាន ហើយចំពោះ រឿងថាប្លន់យក​ទ្រព្យសម្បត្តិមាសប្រាក់ពីជនរងគ្រោះនោះ មិនទាន់ដឹងនៅឡើយទេ ខណៈដែលសមត្ថកិច្ចបានដឹងថាពេលនេះ ជនល្មើសបានគេចខ្លួនទៅដល់ស្រុកកំណើតនៅឯខេត្តបាត់ដំបង ហើយសមត្ថកិច្ចកំពុងតាមប្រមាញ់។

ចំពោះសាកសពនារីរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យក្រោយធ្វើកោសល្យវិច្ច័យ។

សូមរឭកថា នារីវ័យ ២២ឆ្នាំម្នាក់ ជាបុគ្គលិក​បម្រើការងារ​នៅកាស៊ីណូក្នុងក្រុងប៉ោយប៉ែត ត្រូវឃាតកមិនស្គាល់​មុខ អារកសម្លាប់ក្នុងបន្ទប់ជួលយ៉ាងសាវហាវព្រៃផ្សៃ បង្កការភ្ញាក់​ផ្អើលកាលពីវេលាម៉ោង ៨ យប់ថ្ងៃទី ២ ខែមីនា ឆ្នាំ ២០២១ ក្នុង​បន្ទប់​ជួលក្បែរ​មន្ទីរពេទ្យ នាគ​ទិព្វ​២ ភូមិ​ក្បាលស្ពាន​១ សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយ​មានជ័យ។ ​

នារី​រងគ្រោះមានឈ្មោះ ហួន ស្រី អាយុ​២២​ឆ្នាំ ជា​បុគ្គលិក​បម្រើការងារ​ក្នុង​កាស៊ីណូ​មួយ​ម្តុំ​នាគ​ទិព្វ​២ ផ្នែក SlotSuper Machine៕

អត្ថបទ៖ ឡេង ដេត

​