លោក វង្ស ពិសេន អំពាវនាវដល់អាជ្ញាធរ និងពលរដ្ឋ កុំចាញ់បោកតាមញុះញង់របស់ក្រុមជ្រុលនិយម

អគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ វង្ស ពិសេន បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋ កុំចាញ់បោកតាមការឃោសនាញុះញង់ឱ្យធ្វើបាតុកម្មបង្កើតបដិវត្តន៍ពណ៌របស់ក្រុមជ្រុលនិយមមួយក្ដាប់តូចនៅក្រៅប្រទេស។

ការអំពាវនាវនេះ ធ្វើឡើងក្នុងឱកាសដែលលោកបានអញ្ជើញចុះជួបសំណេះសំណាល និងផ្សព្វផ្សាយសភាពការណ៏ថ្មីៗដល់ក្រុមប្រឹក្សាស្រុក-ឃុំ រដ្ឋអំណាចមូលដ្ឋាន និងមន្រ្តីក្រុមការងារចុះមូលដ្ឋានស្រុកពារាំង នាព្រឹកថ្ងៃទី១៥ ខែសីហា ឆ្នាំ២០២៤ នៅស្រុកពារាំង។

លោកអគ្គមេបញ្ជាការកងទ័ព វង្ស ពិសេន និងជាប្រធានក្រុមការងារររាជរដ្ឋាភិបាលចុះមូលដ្ឋានស្រុកពារាំង ខេត្តព្រៃវែង បានបញ្ជាក់ពីការយកចិត្តទុកដាក់របស់សម្ដេចតេជោ ហ៊ុន សែន អតីតនាយករដ្ឋមន្ត្រី និងបន្តដោយសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន ដែលបានយកចិត្តទុកដាក់អភិវឌ្ឍន៍ប្រទេសជាតិលើគ្រប់វិស័យ និងខិតខំបោះបង្គោលព្រំដែនជាមួយប្រទេសជិតខាង ដើម្បីការពារបូរណភាពដែនដីឲ្យបានរឹងមាំយូរអង្វែង។

ក្នុងន័យនេះ លោកអគ្គមេបញ្ជាការ បានអំពាវនាវដល់អាជ្ញាធរ និងប្រជាពលរដ្ឋ រួមគ្នាថែរក្សាសន្តិភាពឱ្យបានគង់វង្ស និងត្រូវជឿទុកចិត្ត គាំទ្រដល់រាជរដ្ឋាភិបាលលើកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា ឡាវ វៀតណាម (CLV-DTA)។

គួរជម្រាបថា ថ្មីៗនេះ ក្រុមប្រឆាំងជ្រុលនិយមមួយក្តាប់តូចនៅក្រៅប្រទេស បាននិងកំពុងតែញុះញង់ប្រជាពលរដ្ឋ និងកងកម្លាំងប្រដាប់អាវុធឱ្យក្រោកបះបោរប្រឆាំងនឹងរាជរដ្ឋាភិបាល ដែលយកបញ្ហានៅប្រទេសបង់ក្លាដេស មកបំផុសឱ្យមានចលនាបដិវត្តន៍ពណ៌ផ្ដួលរំលំរាជរដ្ឋាភិបាលស្របច្បាប់នៅកម្ពុជា និងបានភ្ជាប់ជាមួយនឹងករណីតំបន់ត្រីកោណកម្ពុជា ឡាវ វៀតណាម CLV។ ប៉ុន្តែការប៉ុនប៉ងបង្កចលាចលឱ្យមានភាពវឹកវរ ដើម្បីផ្ដួលរំលំរាជរដ្ឋាភិបាលស្របច្បាប់ ត្រូវបានអគ្គបញ្ជាការដ្ឋានកងយោធពលខេមរភូមិន្ទ ចាត់ទុកថា ការប្រើមធ្យោបាយហិង្សាមិនប្រជាធិបតេយ្យ គឺជាអំពើល្មើសច្បាប់។

ហេតុដូច្នេះ កងយោធពលខេមរភូមិន្ទ បានប្រកាសត្រៀមកម្ទេចរាល់ឧបាយកលបំផ្លាញជាតិ បំផ្លាញសន្តិភាព និងបង្កវិទ្ធង្សនាផ្សេងៗ ក្នុងគោលបំណងផ្ដួលរំលំរាជរដ្ឋាភិបាលស្របច្បាប់ ទោះក្នុងរូបភាពណាក្ដី៕