ព័ត៌មានជាតិ

កំណាត់ផ្លូវលេខ ២៥៨ រងការខូចខាតជាច្រើនកន្លែង

បានផុស

២ years មុន

នៅ

ថ្ងៃពុធ ៤ កញ្ញា ២០២៤

ដោយ

កំណាត់ផ្លូវលេខ ២៥៨ បានរងការខូចខាតជាច្រើនកន្លែង ដោយប្រជាពលរដ្ឋស្នើសុំឲ្យអាជ្ញាធរមេត្តាជួយធ្វើការជួសជុលផ្លូវមួយនេះផង ដោយសារតែភ្ញៀវទេសចរមកស្នាក់នៅសណ្ឋាគារនៅលើផ្លូវនោះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវមួយខ្សែដែលខូចខាតនេះ ស្ថិតនៅលើផ្លូវលេខ ២៥៨ កែងនឹងផ្លូវសុធារស ទៅដល់ចំណុចផ្លូវកែងព្រះស៊ីសុវត្ថិ សង្កាត់ចតុមុខ ខណ្ឌដូនពេញ រាជធានីភ្នំពេញ។

បើតាមការបញ្ជាក់ពី លោកស្រី ផល្លី រស់នៅលើផ្លូវ ២៥៨ បានប្រាប់ឲ្យដឹងថា កាលពី ៣ ,៤ ឆ្នាំមុន ផ្លូវមួយខ្សែនេះ ធ្លាប់ជួសជុលម្ដងរួចទៅហើយ ប៉ុន្តែមួយរយៈចុងក្រោយនេះ កំណាត់ផ្លូវ ២៥៨ ចាប់ផ្ដើមខូចខាតដោយសារភ្លៀងធ្លាក់មក ទឹកដក់លើផ្លូវ ជាហេតុធ្វើឲ្យមានការខូចខាតបន្តិចម្ដងៗ។

លោកស្រីបន្តទៀតថា ចំពោះជង្ហុកមានជម្រៅជ្រៅប្រជាពលរដ្ឋដែលរស់នៅអមសងខាងផ្លូវ តែងយកថវិកាផ្ទាល់ខ្លួនទិញកម្ទេចថ្មទៅចាក់បំពេញជង្ហុក កុំឲ្យមានទឹកដក់ពិបាកទាំងការរស់នៅ និងលក់ដូរផងដែរ។

ដោយឡែក លោក នី សាមិត្ត ប្រធានការិយាល័យសាធារណការខណ្ឌដូនពេញ បានប្រាប់ឲ្យ កម្ពុជាថ្មី ដឹងថា បញ្ហាផ្លូវខូចមួយខ្សែនេះ លោកបានលើកគម្រោងនេះជូនទៅមន្ទីរសាធារណៈរាជធានីរួចហើយ ប៉ុន្តែមន្ត្រីជំនាញសាធារណៈរាជធានីមិនទាន់ចុះមកជួសជុលនោះទេ។

ពាក់ព័ន្ធបញ្ហាខាងលើនេះ ប្រជាពលរដ្ឋ ក៏បានសំណូមពរអាជ្ញាធរពាក់ព័ន្ធ មេត្តាជួយពន្លឿនជួសជុលកំណាត់ផ្លូវ ២៥៨ មួយខ្សែនេះផង ព្រោះថាផ្លូវនេះ ឧស្សាហ៍មានភ្ញៀវទេសចរដើរឆ្លងកាត់ជាហូរហែ ដែលធ្វើឲ្យបាត់បង់សោភណភាពវិស័យទេសចរណ៍ក្នុងស្រុក៕

អត្ថបទ ៖ ម៉េង