ទូតកូរ៉េខាងជើង សរសើររដ្ឋាភិបាលអាណត្តិទី៧ ដែលបន្តធានាបានសន្តិភាព ស្ថិរភាពសេដ្ឋកិច្ច-សង្គម

ឯកអគ្គរដ្ឋទូតកូរ៉េខាងជើង​ប្រចាំកម្ពុជា បានសម្ដែងការកោតសរសើរចំពោះរាជរដ្ឋាភិបាលអាណត្តិទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត ដែលបន្តធានាបានកត្តាសន្តិភាព ស្ថិរភាពសង្គម-សេដ្ឋកិច្ច និងការអភិវឌ្ឍប្រទេសឱ្យកាន់តែរីកចម្រើន។

លោកឯកអគ្គរដ្ឋទូត បានលើកឡើងថា រយៈពេល១ឆ្នាំកន្លងមកនេះ តាមការតាមដានយ៉ាងយកចិត្តទុកដាក់របស់លោកផ្ទាល់ លោកសូមវាយតម្លៃខ្ពស់ចំពោះរាជរដ្ឋាភិបាល នីតិកាលទី៧ ដែលដឹកនាំដោយសម្តេចធិបតី ហ៊ុន ម៉ាណែត បានយកអស់កម្លាំងកាយចិត្តដាក់ចេញនូវវិធានការ យុទ្ធសាស្រ្ត គម្រោងអភិវឌ្ឍន៍ និងគោលនយោបាយជាច្រើនដែលទទួលបានលទ្ធផលជាផ្លែផ្កា ជាពិសេសគឺធានាបាននូវសន្តិភាព សុវត្ថិភាព ស្ថិរភាពសេដ្ឋកិច្ច និងការអភិវឌ្ឍសម្រាប់ប្រទេសកម្ពុជា។

លោកឯកអគ្គរដ្ឋទូត​លើកឡើងដូច្នេះ ក្នុងជំនួបជាសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា កាលពីថ្ងៃទី០៤ ខែតុលា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។ លោក ចាង យ៉ុងហ្គុន ឯកអគ្គរដ្ឋទូតកូរ៉េខាងជើង ក៏បានយកឱកាសនោះ អបអរសាទរសម្តេចតេជោ ដែលបានជាប់ឆ្នោតជាប្រធានព្រឹទ្ធសភានៃកម្ពុជា បន្ទាប់បីបានបំពេញភារកិច្ចជានាយករដ្ឋមន្រ្តីអស់រយៈពេល៣៨ឆ្នាំ និងបានសម្រេចសមិទ្ធផលដ៏មានតម្លៃជាច្រើនដែលមិនអាចកាត់ថ្លៃបានជូនប្រជាជន និងប្រទេសកម្ពុជា។

លោកឯកអគ្គរដ្ឋទូត បន្តថា ការផ្លាស់ប្តូរថ្នាក់ដឹកនាំរាជរដ្ឋាភិបាលថ្មី ដែលមានសម្តេចធិបតី ហ៊ុន ម៉ាណែត ជានាយករដ្ឋមន្រ្តី និងមានគណៈរដ្ឋមន្រ្តីជាយុវជន បានប្រព្រឹត្តទៅយ៉ាងរលូន និងល្អប្រសើរ ដើម្បីឆ្លើយតបទៅនឹងការវិវត្តនៃស្ថានការណ៍ពិភពលោកនាពេលបច្ចុប្បន្ន។

ជាការឆ្លើយតប សម្តេចតេជោ ហ៊ុន សែន បានអរគុណលោកឯកអគ្គរដ្ឋទូត ដែលបានយកចិត្តទុកដាក់ និងកោតសរសើររាជរដ្ឋាភិបាល នីតិកាលទី៧ ដែលជារាជរដ្ឋាភិបាលបន្តវេន។ សម្តេចតេជោ គូសបញ្ជាក់ថា ការដឹកនាំប្រទេសអស់រយៈពេល១ឆ្នាំកន្លងមក នៃរាជរដ្ឋាភិបាលថ្មីនេះ ពិតជាទទួលបានលទ្ធផលលើសការរំពឹងទុក ដោយធានាបានសុខសន្តិភាព ស្ថិរភាពនយោបាយ កំណើនសេដ្ឋកិច្ចមិនថមថយ និងកំណើននៃការនាំចេញបានកើនឡើងដល់២០%។

សម្តេចតេជោ បានបន្តថា អស់រយៈពេល ២០ឆ្នាំមកនេះ ប្រទេសកម្ពុជាមានកំណើនសេដ្ឋកិច្ចល្អ ហើយបើទោះបីជាបានជួបវិបត្តិកូវីដ១៩ក្តី ក៏ប៉ុន្តែកម្ពុជាបានប្រែក្លាយពីប្រទេសមានចំណូលទាប មកជាប្រទេសមានចំណូលមធ្យមកម្រិតទាប និងប្រែក្លាយពីប្រទេសដែលពឹងផ្អែកលើការនាំចូល ទៅជាប្រទេសមានការនាំចេញ និងមានកំណើននៃការនាំចេញថែមទៀតផង៕