អាជ្ញាធរខេត្ដសៀមរាបបន្ថែមសាលារៀនចំនួន១៦ទៀតសម្រាប់ធ្វើជាកន្លែងចត្ដាឡីស័ក

យោងតាម លោក លី ប៊ុនណា ប្រធានមន្ទីរអប់រំយុវជន និងកីឡាខេត្ដសៀមរាប ដោយសារតែមានបងប្អូនពលករខ្មែរមកពីប្រទេសថៃកាន់តែច្រើននោះ បានធ្វើឲ្យសាលារៀនសម្រាប់ធ្វើចត្ដាឡីស័កដែលបានត្រៀមពីពេលមុននោះមិនគ្រប់គ្រាន់ឡើយ ហេតុនេះអាជ្ញាធរខេត្ដសៀមរាបសម្រេចបន្ថែមសាលារៀនចំនួន១៦ថែមទៀតសម្រាប់ធ្វើជាកន្លែងធ្វើចត្ដាឡីស័ក។

ការសម្រេចបន្ថែមនេះធ្វើឱ្យមានកន្លែងធ្វើចត្ដាឡីស័កសរុបទាំងអស់នៅទូទាំងខេត្ដសៀមរាប មានប្រមាណជិត២០សាលារៀនហើយ ដើម្បីជួយសម្រួលដល់ពលករ ដែលបានដឹកមកពីកន្លែងចត្ដាឡីស័កនៅតាមព្រំដែនខ្មែរថៃ តាមការប្រកាសរបស់រាជរដ្ឋាភិបាល ដែលតម្រូវអោយពលរដ្ឋមកធ្វើចត្ដាឡីស័កនៅក្នុងមូលដ្ឋានដែលពួកគាត់រស់នៅ។ ចំណែកឯការសិក្សារបស់សិស្សវិញត្រូវបានផ្ទេរទៅឲ្យសិក្សានៅសាលារៀនក្បែៗនោះ ដោយត្រូវសិក្សាមានបីពេលក្នុងមួយសប្ដាហ៍ ។

បើតាមប្រសាសន៍របស់លោកស្រី យូ សុភា អភិបាលរងខេត្តសៀមរាប អាជ្ញាធរខេត្ដសៀមរាបបានទទួលពលរដ្ឋ ដែលធ្វើចំណាកស្រុកមកពីថៃថ្មីៗ និងពលករដែលបានធ្វើចត្ដាឡីស័កនៅខេត្តតាមព្រំដែនខ្មែរថៃ ដូចជាខេត្ដបន្ទាយមានជ័យ ខេត្តបាត់ដំបង ខេត្ដប៉ៃលិន និងខេត្ដឧត្ដរមានជ័យ ប្រមាណជាង៨រយនាក់ហើយ ក្នុងចំណោមពលករប្រមាណ២ពាន់នាក់ ដែលបានធ្វើចត្ដាឡីស័កនៅតាមព្រំដែនកម្ពុជាថៃនៃខេត្ដទាំងនោះ ដោយគិតចាប់ពីថ្ងៃទី០៧ដល់ថ្ងៃទី១០ ខែមីនា ឆ្នាំ២០២១នេះ។

ពលករដែលផ្ទេរចេញពីកន្លែងចត្ដាឡីស័កតាមព្រំដែននេះ ភាគច្រើបានធ្វើតេសលើកទី២រួចហើយ  ហើយដឹកមកដល់ខេត្ដសៀមរាប នឹងត្រូវពិនិត្យសុខភាពម្ដងទៀត ទើបបញ្ជូនពួកគាត់ទៅតាមបណ្ដាស្រុកមូលដ្ឋានដែលពួកគាត់រស់នៅ ។

សូមជម្រាបថា ការដឹកជញ្ជូនពលករចេញពីកន្លែងចត្ដាឡីស័កពីខេត្ដនៅតាមព្រំដែនខ្មែរថៃ ទៅកាន់ខេត្ដសាម៉ីនេះ ធ្វើឡើងតាមប្រកាសរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្ដេចបានសម្រេចបិទការធ្វើចត្តាឡីស័កនៅតាមព្រំដែន សម្រាប់អ្នកដែលមានសុខភាពធម្មតា៕

អត្ថបទ៖ គឿនវេត