សម្ដេចធិបតី ថា រដ្ឋាភិបាលនៅឈរខាងអ្នកធុរកិច្ចជានិច្ច តាមរយៈការជួយគាំទ្រគ្រប់ជំហាន

រាជរដ្ឋាភិបាលកម្ពុជា គឺឈរនៅខាងអ្នកធុរកិច្ចជានិច្ច តាមរយៈការជួយគាំទ្រដល់គ្រប់ជំហាន និងគ្រប់មធ្យោបាយដល់រាល់អាជីវកម្ម និងការវិនិយោគនៅក្នុងប្រទេសកម្ពុជា។ នេះជាការប្រកាសរបស់ប្រមុខរាជរដ្ឋាភិបាលសម្ដេចធិបតី ហ៊ុន ម៉ាណែត ក្នុងពិធីបើកកិច្ចប្រជុំកំពូលស្តីពី​សេដ្ឋ​កិច្ច និងបច្ចេកវិទ្យារបស់ចិន នៅថ្ងៃទី២៦ ខែវិច្ឆិកា ឆ្នាំ២០២៤នេះ។

សម្ដេចធិបតី បានថ្លែងបញ្ជាក់យ៉ាងច្បាស់ថា «រាជរដ្ឋាភិបាលរបស់យើង គឺឈរនៅខាងអ្នកធុរកិច្ចជានិច្ច ហើយយើងតែងតែនៅជួយគាំទ្រដល់អ្នកគ្រប់ជំហាន»។ សម្ដេចធិបតី បានបន្តថា នៅក្នុងអាណត្តិរាជរដ្ឋាភិបាល នីតិកាលទី៧នេះ បានបន្ថែមវិស័យបច្ចេកវិទ្យា គឺជាធាតុផ្សំថ្មីបន្ថែមនៅក្នុងយុទ្ធសាស្ត្របញ្ចកោណ ដំណាក់កាលទី១ សំដៅធ្វើពិពិធកម្ម និងទំនើបកម្មឧស្សាហកម្មរបស់កម្ពុជា ដែលពឹងផ្អែកលើជំនាញ និងចំណេះដឹង។

ក្នុងនាមជានាយករដ្ឋមន្ត្រី សម្ដេចធិបតី បានបង្ហាញការប្ដេជ្ញាចិត្ត និងបានសន្យាថា រាជរដ្ឋាភិបាលរបស់សម្តេច នឹងបន្តគាំទ្រដល់ជោគជ័យរបស់អ្នកធុរកិច្ច និងវិនិយោគិនទាំងអស់ តាមគ្រប់មធ្យោបាយដែលអាចធ្វើទៅបាន ហើយទ្វាររបស់កម្ពុជា តែងតែបើកចំហ។

សម្តេចធិបតី សង្កត់ធ្ងន់ថា វត្តមានរបស់ធុរកិច្ច និងវិនិយោគិន នឹងក្លាយជាផ្នែកមួយនៃដំណើរការក្នុងការផ្លាស់ប្តូររបស់ កម្ពុជានៅក្នុងផ្នែកបច្ចេកវិទ្យា ថាមពលបៃតង នវានុវត្តន៍ឌីជីថល ឬការបណ្តាក់ទុនផ្សេងទៀត គឺកម្ពុជាត្រៀមខ្លួនរួចជាស្រេច ដើម្បីធ្វើជាដៃគូក្នុងភាពជោគជ័យរបស់អ្នក។

សម្ដេចប្រមុខរាជរដ្ឋាភិបាល បានប្រាប់ទៅកាន់អង្គប្រជុំពីការប្រកាន់ជំហររបស់រាជរដ្ឋាភិបាលកម្ពុជា ដែលចាត់ទុកធុរកិច្ច និងវិនិយោគិន ថា ជាតួអង្គដ៏សំខាន់ក្នុងការជំរុញកំណើនសេដ្ឋកិច្ច ខណៈតួនាទីរបស់រដ្ឋាភិបាល គឺអ្នកបង្កើតបរិយាកាសអំណោយផល ដែលធុរកិច្ចអាចរីកចម្រើន ភាពជឿនលឿន ហើយកំណើនសេដ្ឋកិច្ចទទួលបានការថែទាំ។ ភ្ជាប់ជាមួយគ្នានេះ សម្ដេចបានលើកឡើងពីតម្លៃនៃសុខសន្តិភាព និងស្ថេរភាពនយោបាយនៅកម្ពុជា មិនមែនគ្រាន់តែជាភាពទាក់ទាញ សម្រាប់អ្នកវិនិយោគនោះទេ ប៉ុន្តែជាកត្តាដែលចាំបាច់ខានពុំបាន។

បន្ថែមពីនេះ សម្ដេចធិបតី បានឱ្យដឹងថា ជាគោលនយោបាយរបស់រដ្ឋាភិបាល ក៏បានបង្កើតយន្តការកម្រិតខ្ពស់ចំនួនពីរ ដែលជាយន្តការផ្ទាល់របស់សម្តេចក្នុងការគាំទ្រដល់អាជីវកម្ម គឺទី១ គណៈកម្មាធិការផ្តល់យោបល់លើគោលនយោបាយពាណិជ្ជកម្ម ដែលធ្វើការជាអ្នកគិតគូរផ្នែកយុទ្ធសាស្ត្ររបស់រាជរដ្ឋាភិបាល តាមដាននិន្នាការសកល និងធានាឱ្យគោលនយោបាយនៅតែមានភាពប្រកួតប្រជែង។ មួយទៀត គឺគណៈកម្មាធិការជំរុញការដោះស្រាយវិវាទវិស័យឯកជន ដែលធ្វើការដោះស្រាយបញ្ហាយ៉ាងឆាប់រហ័ស និងមានប្រសិទ្ធភាព៕