សម្តេចធិបតី៖ អភិវឌ្ឍមិនមែនដូចគេថា ឱ្យតែអភិវឌ្ឍធ្វើបាបប្រជាពលរដ្ឋ គឺអត់ទេ

«អភិវឌ្ឍមិនមែនដូចគេថា ឱ្យតែអភិវឌ្ឍធ្វើបាបប្រជាពលរដ្ឋ អត់ទេ គឺរាជរដ្ឋាភិបាលខិតខំយកចិត្តទុកដាក់ទៅលើកិច្ចការងារនេះ យើងបានដាក់ចេញនូវគោលនយោបាយជាច្រើន នៅក្នុងការដោះស្រាយនូវផលលំបាករបស់ប្រជាជន ធ្វើយ៉ាងណាឱ្យប្រជាពលរដ្ឋបានទទួលផល»។នេះជាការថ្លែងរបស់ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នៅក្នុងពិធីបើកការដ្ឋានសាងសង់ទីក្រុងមេគង្គឃី របស់ក្រុមហ៊ុន ធីភី ម៉ូរ៉ាល់ គ្រុប នៅថ្ងៃទី ១៧ ខែធ្នូ ឆ្នាំ ២០២៤។

សម្តេចធិបតី​ មានប្រសាសន៍ថា រាជរដ្ឋាភិបាលបានខិតខំយកចិត្តទុកដាក់ពង្រាយការអភិវឌ្ឍនៅកាន់តំបន់ផ្សេងៗ ប្រែក្លាយពីកន្លែងស្ងាត់ ទៅជាតំបន់អភិវឌ្ឍន៍មានមនុស្សរស់នៅច្រើន ហើយផ្តល់ឱកាសឱ្យប្រជាពលរដ្ឋមានការងារធ្វើ ដែលរួមចំណែកក្នុងការលើកកម្ពស់ជីវភាពពលរដ្ឋនៅមូលដ្ឋាន។

សម្តេចថ្លែងថា៖«គ្រាប់ផ្កានៃការអភិវឌ្ឍ ដើម្បីនាំទៅការអភិវឌ្ឍនៅកន្លែងផ្សេងទៀត ហើយប្រជាពលរដ្ឋប្រែក្លាយពីកន្លែងដែលស្ងាត់ ទៅជាកន្លែងដែលមានមនុស្សរស់នៅច្រើន បម្រើឱ្យសេវាកម្ម និងលើកកម្ពស់ការរស់នៅរបស់ប្រជាពលរដ្ឋ នេះហើយផ្ការីកដែលយើងចង់បាន ផ្ការីកនៃសន្តិភាព ដែលយើងអាចរីកចម្រើនប្រកបដោយសុខដុមរមណីយកម្ម»។

ទន្ទឹមនឹងមានការអភិវឌ្ឍនេះ សម្តេចធិបតី ក្រើនរំ​ឭកជាថ្មីដល់ពលរដ្ឋ ត្រូវចូលរួមធ្វើយ៉ាងណាកុំឱ្យបាត់បង់ឱកាសនូវសន្តិភាព ជាពិសេសរួមគ្នាថែរក្សាសុខសន្តិភាព ដែលជាកត្តាសំខាន់ និងជាគ្រឹះដ៏រឹងមាំក្នុងការអភិវឌ្ឍប្រទេសជាតិ។

សម្តេចបញ្ជាក់ថា ពីព្រោះផលនៃសន្តិភាព ផលនៃការអភិឌ្ឍ មិនត្រឹមប្រមូលផ្តុំនៅវិស័យឯកជនមួយ ពីរ ឬថ្នាក់ដឹកនាំនោះទេ ប៉ុន្តែអភិវឌ្ឍឱ្យរីកសាយ ហើយប្រជាពលរដ្ឋទទួលបានផល និងការរស់នៅសមរម្យ។ សម្តេចថ្លែងថា៖«ដូចក្នុងគម្រោងនេះ នៅក្នុងរបាយការណ៍ ក្នុងចំណោម ២១០ ហិកតា ក្នុងនោះ ២ ភាគ ៣ ស្មើ ៧០ ហិកតា យកទៅកសាងសកម្មភាពសេដ្ឋកិច្ច ដែលបម្រើឱ្យការបង្កើតការងារ ភាពស៊ីវិល័យ បង្កើតកន្លែងសេវាសាធារណៈ ដូចជាមន្ទីរពេទ្យ មណ្ឌលសុខភាព សាលារៀន» ។

ចំណែក ១ភាគ ៣ទៀត  គឺសម្រាប់បម្រើឱ្យតម្រូវការរបស់ប្រជាពលរដ្ឋ ហើយសម្តេចធិបតី សង្ឃឹមថា នឹងបានឃើញនូវសមិទ្ធផលនេះ ក្នុងពេលឆាប់ៗខាងមុខនេះ។

គួរជម្រាបដែរថា គម្រោងសាងសង់ទីក្រុងមេគង្គឃី ស្ថិតនៅក្រុងអរិយក្សត្រ ខេត្តកណ្តាល ដែលជាគម្រោងមួយត្រូវបានសិក្សា យកចិត្តទុកដាក់យ៉ាងល្អិតល្អន់ នៅលើផ្ទៃដីទំហំប្រមាណ ២១០ ហិកតា​ មានទីតាំងស្ថិតនៅតាមដងទន្លេមេគង្គ ទល់មុខទន្លេចតុមុខ៕