ផ្លាស់ប្តូរ​​ប្រធាន​មន្ទីររៀបចំដែនដី​ខេត្ត​បន្ទាយមានជ័យ ​​ជំនួសលោក អាង ណារិទ្ធ ទៅបំពេញ​ភារកិច្ច​នៅក្រសួង

នៅសាលប្រជុំសាលាខេត្តបន្ទាយមានជ័យ លោក មាស តារា ​ត្រូវ​បាន​ប្រកាស​ចូលកាន់មុខតំណែងជាប្រធានមន្ទីររៀបចំដែនដីនគររូបនិយកម្ម និងសំណង់ ជំនួសលោក អាង ណារិទ្ធ ដែល​ត្រូវ​ផ្លាស់​ទៅបំពេញភារកិច្ចនៅក្រសួងរៀបចំដែនដី​នគរូបនីយកម្ម និង​សំណង់។ 

លោក មាស តារា ដែល​ត្រូវ​ចូលកាន់មុខតំណែងជាប្រធានមន្ទីររៀបចំដែនដីនគរូបនីយកម្ម និងសំណង់​ខេត្ត​បន្ទាយមានជ័យ ជំនួសលោក អាង ណារិទ្ធ បានប្រកាស​ប្តេជ្ញា​នឹង​ខិតខំបំពេញការងារប្រកបដោយការទទួលខុសត្រូវ និងមានប្រសិទ្ធិភាពខ្ពស់ ក្នុងនោះលោកអះអាង​នឹងបន្ត​​ដឹកនាំមន្ត្រីមន្ទីរ​រៀបចំដែនដី​នគរូបនីយកម្ម និង​សំណង់ខេត្ជួយ​រកដំណោះស្រាយវិវាទដីធ្លីជូនប្រជាពលរដ្ឋឲ្យបានរលូនទៅថ្ងៃខាងមុខផងដែរ។

ក្នុងពិធីនេះ លោក អ៊ុំ រាត្រី អភិបាល​ខេត្ត​បន្ទាយមានជ័យ​សង្ឃឹមយ៉ាងមុតមាំ​ថា ប្រធានមន្ទីរសុរិយោដីខេត្តថ្មីនឹងបន្តកិច្ចសហប្រតិបត្តិការល្អនិងរឹងមាំ ជាមួយមន្ទីរអង្គភាពដែលពាក់ព័ន្ធ ដើម្បីពង្រឹងកិច្ចការងារឲ្យបានល្អប្រសើរ ជាពិសេសត្រូវពង្រឹងកិច្ចសហការផ្ទៃក្នុងជាមួយមន្ត្រីក្រោមឱវាទ ដោយយកគំរូតាមលោកប្រធានចាស់ៗ។

លោក ទេព ធន រដ្ឋលេខាធិការក្រសួង រៀបចំដែនដីនគររូបនិយកម្ម និងសំណង់ ក្នុង​ឱកាស​នោះ​ក៏​បានណែនាំឲ្យប្រធានមន្ទីររៀបចំដែនដីនគររូបនិយកម្ម និងសំណង់​ខេត្ត​បន្ទាយមានជ័យ​ថ្មី ​ត្រូវពង្រឹងការដឹកនាំគ្រប់គ្រង ហើយធានាបានការវិវាទដីធ្លីឲ្យបានរលូនពោលគឺត្រូវធ្វើឲ្យបានជាអតិបរមា៕

អត្ថបទ៖ វ៉ាន់ ណាង