នៅមណ្ឌលគិរី មេឃុំ១រូបប្រាប់ក្រុមហ៊ុនដេញថ្លៃធ្វើផ្លូវថា ត្រូវធ្វើផ្លូវឱ្យត្រូវតាមបច្ចេកទេស បើខុសនឹងត្រូវឱ្យឈប់ធ្វើភ្លាម

នៅក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី មានគម្រោងសាងសង់ផ្លូវបេតុងប្រវែង៣០០ម៉ែត្រ១ផ្លូវ គ្រោងនឹងធ្វើ ដោយមានទទឹង៦ម៉ែត្រ។ គម្រោងធ្វើផ្លូវនេះ រដ្ឋបាលឃុំចុងផ្លាស់ បានអនុញ្ញាតឱ្យក្រុមហ៊ុនសាងសង់នានាចូលរួមដេញថ្លៃ យកគម្រោងនេះទៅធ្វើ ដោយក្រុមហ៊ុន ជួន សុខន អេចប៊ីអេសឌី បានដេញថ្លៃជាប់គម្រោងធ្វើផ្លូវនេះ។ មេឃុំចុងផ្លាស់ បានប្រាប់ទៅក្រុមហ៊ុននេះថា ត្រូវធ្វើផ្លូវឱ្យត្រូវតាមបច្ចេកទេស បើខុសនឹងត្រូវឱ្យឈប់ធ្វើវិញភ្លាម។

ការដេញថ្លៃសាងសង់ផ្លូវបេតុងនេះ បានធ្វើឡើងកាលពីថ្ងៃទី២៣ ខែធ្នូ ឆ្នាំ២០២៤ ដែលមានថវិកាគោលចំនួន២១០.​៦៤៤.​២៦២រៀល។ ក្នុងការដេញថ្លៃនោះ គេសង្កេតឃើញមានតំណាងក្រុមហ៊ុនជាច្រើនបានចូលរួមដេញថ្លៃ ប៉ុន្តែ មានក្រុមហ៊ុនតែ៣ប៉ុណ្ណោះដែលបានឈរឈ្មោះនៅក្នុងតារាងដេញថ្លៃ គឺមានក្រុមហ៊ុន វ៉េង លាប ក្រុមហ៊ុន រ៉េត សារ៉ាត ក្រុមហ៊ុនជួន សុខន អេចបី អេសឌី។ ក្រោយការដាក់ដេញថ្លៃនោះ គឺរដ្ឋបាលឃុំបានសម្រេចឱ្យទៅលើក្រុមហ៊ុន ជួន សុខន អេចប៊ីអេសឌី ដែលដាក់ដេញថ្លៃទាបជាងគេ គឺត្រឹម ១៤៤.៤០០.០០០រៀលជាស្ថាពរ។

លោក លាភ លីមគុណ មេឃុំរដ្ឋបាលចុងផ្លាស់ បានសង្កត់ធ្ងន់ទៅលើក្រុមហ៊ុនដែលជាប់ក្នុងកាដេញថ្លៃគម្រោងផ្លូវបេតុងអាមេកម្រាស់១តឹកកន្លះ ទទឹង៦ ម៉ែត្រ និងប្រវែង៣០០ម៉ែត្រ ត្រូវគោរពតាមកិច្ចសន្យា និងធ្វើទៅតាមបទដ្ឋានបច្ចេកទេសក្នុងកាសាងសង់ ហើយបើសិនជាក្រុមហ៊ុនសាងសង់ធ្វើផ្ទុយពីកិច្ចសន្យា និងលក្ខខណ្ឌបច្ចេកទេស នឹងត្រូវបញ្ចប់កិច្ចសន្យា គឺត្រូវទុកជាមោឃៈ។

ដោយឡែក ប្រជាពលរដ្ឋម្នាក់រស់នៅឃុំចុងផ្លាស់ បានឲ្យដឹងថា នៅឆ្នាំ២០២៣កន្លងទៅ មានក្រុមហ៊ុន ហួ បូរ បានទទួលគម្រោងសាងសង់ផ្លូវបេតុងអាមេដែលមានប្រវែង៤០១ម៉ែត្រ បានចំណាយថវិកាឃុំអស់ចំនួន២៦០.៥៥០.០០០រៀល។ បន្ទាប់ពីការសាងសង់ក្នុងឆ្នាំ២០២៣កន្លងទៅ ផ្លូវបេតុងមិនទាន់បាន៧ខែផង គឺចំណុចមួយចំនួនត្រូវរងកាខូចខាតចជាច្រើនកន្លែងដែលពិបាកក្នុងកាធ្វើដំណើរ។ ប្រជាពលរដ្ឋរូបនេះ បានស្នើឱ្យអ្នកជំនាញបច្ចេកទេសផ្លូវ ក៏ដូចជាអាជ្ញាធរឃុំ ជួយពិនិត្យដោយយកចិត្តទុកដាក់ទៅលើក្រុមហ៊ុនថ្មីដែលគ្រោងនឹងស្ថាបនាសាងសង់ផ្លូវបេតុងក្នុងឆ្នាំ២០២៤នេះ កុំឱ្យដូចក្រុមហ៊ុនសាងសង់នាពេលកន្លងមកទៀត៕

ដោយ ៖រៀម សុខហេង