បណ្ណសមធម៌ឬបណ្ណក្រីក្រ មិនត្រឹមតែឧបត្ថម្ភថវិកា និងសេវាព្យាបាលជំងឺ ផ្ដល់ទាំងអាហារូបករណ៍​សិក្សាថែមទៀតផង

ប្រជាពលរដ្ឋរស់នៅភូមិស្រែស្ដៅ សង្កាត់អូរឬស្សី ក្រុងក្រចេះ ខេត្តក្រចេះ អ្នកស្រី ស្រួន ស្រី បានរៀបរាប់ឲ្យកម្ពុជាថ្មីដឹងថា អ្នកស្រីទទួលបានបណ្ណក្រ១ តាំងពីឆ្នាំ២០១៨ មកម្លេះ ហើយបណ្ណមួយនេះមិនត្រឹមតែបានឧបត្ថម្ភសាច់ប្រាក់ប្រចាំខែ និងសម្រួលសេវាព្យាបាលជំងឺផ្សេងៗ ដល់ក្រុមគ្រួសារអ្នកស្រីប៉ុណ្ណោះទេ ជាពិសេសនៅពេលអ្នកស្រីមានផ្ទៃពោះ ទៅពិតិត្យសុខភាព និងក្រោយពេលសម្រាលកូន ក៏ទទួលបានថវិការឧបត្ថម្ភផងដែរ។

តាមការឲ្យដឹងពីលោក ឈឺន រិទ្ធ ចៅសង្កាត់អូរឬស្សី ក្រុង​ក្រចេះ ខេត្ត​ក្រចេះ​បានឲ្យដឹងថា នៅក្នុងរយៈពេលប៉ុន្មានខែចុងឆ្នាំ២០២៤នេះ មានប្រជាពលរដ្ឋជាច្រើនបានមកដាក់ពាក្យសម្ភាសន៍ស្នើសុំធ្វើបណ្ណសមធម៌ អ្នកខ្លះទៀតសុំបន្តសុពលភាពដែលផុតកំណត់ ហើយមាតាបិតា អាណាព្យាបាលសិស្សមួយចំនួន ក៏មកស្នើសុំបញ្ជូលសមាជិកគ្រួសារដែលទទួលបន្ទុកអាហារូបករណ៍ផងដែរ។

លោក ឈឺន រិទ្ធ ចៅសង្កាត់អូរឬស្សី

ដោយអនុវត្តកម្មវិធីគោលនយោបាយរបស់រាជរដ្ឋាភិបាល ក្នុងការលើកកម្ពស់ទៅដល់បងប្អូនប្រជាពលរដ្ឋក្រីក្រ និងងាយរងហានិភ័យ រដ្ឋបាលសង្កាត់អូរឬស្សី បានផ្ដល់នូវបណ្ណសមធម៌ និងបណ្ណ័ហានិភ័យ ជូនប្រជាពលរដ្ឋក្រីក្រ និងងាយរងហានិភ័យ ទៅតាមស្ថានភាពគ្រួសារជាក់ស្ដែង។

លោកក៏បានបញ្ជាក់អំពីអត្ថប្រយោជន៍នៃបណ្ណទាំង២នេះថា ទី១ ប្រជាពលរដ្ឋដែលមានបណ្ណនេះហើយ អាចទៅទទួលសេវាសុខាភិបាលនៅតាមមណ្ឌលសុខភាព មន្ទីរពេទ្យបង្អែក និងមន្ទីរពេទ្យរដ្ឋ ព្រមទាំងមន្ទីរពេទ្យឯកជននានាដែលជាប់កិច្ចព្រមព្រៀង។ ជាមួយគ្នានោះ មាតាបិតា អាណាព្យាបាលសិស្ស ក៏អាចយកទៅស្នើសុំអាហារូបករណ៍ សម្រាប់ការសិក្សាកូនចាប់ពីថ្នាក់ទី១ ដល់ថ្នាក់ទី១២។

ចំពោះការស្នើសុំបណ្ណសមធម៌ ឬបណ្ណក្រីក្រ ប្រជាពលរដ្ឋ ត្រូវមានសំបុត្រកំណើត សៀវភៅគ្រួសារ ហើយត្រូវសម្ភាសន៍ជាមួយក្រុមការងាររដ្ឋបាលសង្កាត់អូរឬស្សី អំពីស្ថានភាពគ្រួសារជាក់ស្ដែងជាប់ ទើបអាចធ្វើបាន។ យ៉ាងណាមិញ ចៅសង្កាត់អូរឬស្សី ក៏បានអំពាវនាវដល់ប្រជាពលរដ្ឋដែលមានបណ្ណផុតសុពលភាព អាចមកស្នើសុំបន្តបាននៅសង្កាត់​អូរឬស្សី ក្រុងក្រចេះ នៅរាល់ម៉ោងធ្វើការ៕

អត្ថបទ ប្រុញវិធិន