ក្រសួងអប់រំ សម្រេចបន្ថែមរង្វាន់ដល់គ្រូបង្រៀនដែលទទួលបានជ័យលាភីមានគំនិតច្នៃប្រឌិតផ្នែកបច្ចេកវិទ្យាអប់រំកម្ពុជា ឆ្នាំ២០២៥

ដើម្បីលើកទឹកចិត្តដល់គ្រូបង្រៀនដែលចូលរួមប្រកួត “គ្រូបង្រៀនដែលមានគំនិតច្នៃប្រឌិតខ្ពស់ផ្នែកបច្ចេកវិទ្យាអប់រំកម្ពុជា ឆ្នាំ២០២៥” ក្រសួងអប់រំ សម្រេចផ្តល់ពានរង្វាន់បន្ថែមដល់គ្រូបង្រៀនដែលទទួលបានជ័យលាភីក្នុងការប្រកួត ដោយដំបូងឡើយ  មានត្រឹងរង្វាន់ជាទឹកប្រាក់ចាប់ពី ២លានរៀល ដល់៤លានរៀល សម្រាប់ជ័យលាភីលេខ១ ដល់លេខ៣ប៉ុណ្ណោះ។ ពេលនេះ ក្រសួងបន្ថែមនូវអាហារូបករណ៍ និងសម្ភារៈមួយចំនួនទៀត។  

កាលពីថ្ងៃទី១៤ ខែមករា ឆ្នាំ២០២៥ ក្រសួងអប់រំ បានប្រកាសជ្រើសរើសគ្រូបង្រៀនចូលរួមកម្មវិធីប្រកួតប្រជែង “គ្រូបង្រៀនដែលមានគំនិតច្នៃប្រឌិតខ្ពស់ផ្នែកបច្ចេកវិទ្យាអប់រំកម្ពុជា ឆ្នាំ២០២៥” ដែលជាឱកាសប្រកួតប្រជែងដល់គ្រូបង្រៀនទូទាំងប្រទេសដែលបាននិងកំពុងប្រើប្រាស់បច្ចេកវិទ្យាប្រកបដោយភាពច្នៃប្រឌិតខ្ពស់ជំនួយដល់ការបង្រៀន និងរៀន និងការបំពេញការងារ។

ក្រសួងអប់រំ បានបន្ថែមរង្វាន់សម្រាប់គ្រូបង្រៀនដែលទទួលបានជ័យលាភីពីការប្រកួតប្រជែង ខាងលើមានដូចជា ជ័យលាភីលេខ១ ទទួលបានថវិកា ៤លាន។ ជ័យលាភីលេខ២ ទទួលថវិកា ៣លានរៀល និងជ័យលាភីលេខ៣ ទទួលបានថវិកា ២លានរៀល រួមជាមួយរង្វាន់បន្ថែមដូចជា អាហារូបករណ៍ ១០០% រយះពេល១ឆ្នាំ ពីសាលា ACE, Tablet PC ម្នាក់ ១គ្រឿង (ពីជ័យលាភីលេខ១ ដល់លេខ៣) ពីអង្គការ UNESCO។ ទទួលបាន LCD Projector ម្នាក់ ១គ្រឿង (ពីជ័យលាភីលេខ១ ដល់លេខ៥) ពីអង្គការ Aide et Action (AeA)និងចុងក្រោយ ថវិកាលើកទឹកចិត្ត ដល់ជ័យលាភីលេខ៤ និង លេខ៥ ពីអង្គការ Aide et Action (AeA) ផងដែរ។

សូមជម្រាបថា ចាប់ពីថ្ងៃទី១៧ ដល់ថ្ងៃទី១៨ ខែកុម្ភៈ ឆ្នាំ២០២៥ខាងមុខ ក្រសួងអប់រំ និងរៀបចំសន្និសីទ និងពិព័រណ៍បច្ចេកវិទ្យាអប់រំលើកទី១ ដែលធំបំផុតនៅកម្ពុជា នៅវិទ្យាស្ថានបច្ចេកវិទ្យាកម្ពុជា ហើយក្នុងឱកាសនោះ ក្រសួងក៏បានប្រកាសពីការប្រកួតប្រជែង “គ្រូបង្រៀនដែលមានគំនិតច្នៃប្រឌិតខ្ពស់ផ្នែកបច្ចេកវិទ្យាអប់រំកម្ពុជា ឆ្នាំ២០២៥” ផងដែរ។ សម្រាប់លក្ខខណ្ឌនៃការជ្រើសរើសមានដូចជា ជា​ជនជាតិ​ខ្មែរ និង​កំពុង​ស្នាក់​នៅ​ក្នុង​ប្រទេស​កម្ពុជា, ជា​គ្រូបង្រៀន ដែល​កំពុង​បង្រៀន​នៅ​តាម​គ្រឹះស្ថាន​សិក្សា​សាធារណៈ ឬ​ឯកជន, ជាគ្រូបង្រៀនដែលមាន​គំនិត​ច្នៃ​ប្រឌិត​ខ្ពស់​ក្នុង​ការ​ប្រើប្រាស់​បច្ចេកវិទ្យា​គាំទ្រ​ដល់​​ការ​បង្រៀននិងរៀន និង​ការ​សិក្សា​ស្រាវជ្រាវ, មាន​ការ​គាំទ្រ​ពី​គណៈ​គ្រប់គ្រង​សាលារៀន​ ឱ្យ​ចូល​រួម​កម្មវិធី​ប្រកួត​ប្រជែង​នេះ។

ចំពោះគ្រូបង្រៀនដែលមានចំណាប់អារម្មណ៍ដាក់ពាក្យប្រកួតប្រជែងកម្មវិធីនេះ អាចដាក់ពាក្យបានតាមរយៈតំណភ្ជាប់៖ https://edtechcambodia.org/edtechteacher2025 ។ ក្រសួងនឹងឈប់ទួលពាក្យ នៅថ្ងៃទី១០ ខែកុម្ភៈ ឆ្នាំ២០២៥ ត្រឹមម៉ោង ១៧:០០៕