ព័ត៌មានជាតិ

អាជ្ញាធរខណ្ឌឫស្សីកែវ នឹងចាត់វិធានការរដ្ឋបាល បើម្ចាស់អាជីវកម្មដាយត្រីខុសច្បាប់មិនរុះរើ និងសហការ

បានផុស

៣ សប្តាហ៍ មុន

នៅ

ថ្ងៃអង្គារ ១១ មីនា ២០២៥

ដោយ

ភ្នំពេញ ៖ អាជ្ញាធរខណ្ឌឬស្សីកែវ ទុករយៈពេលដល់ ថ្ងៃទី៣០ ខែមីនា ឆ្នាំ ២០២៥ខាងមុខនេះ ឱ្យម្ចាស់ដាយត្រីរុះរើ និងចល័តមិនអនុញ្ញាតឱ្យធ្វើអាជីវកម្មដាយត្រីបន្តទៀតនោះឡើយ ក្នុងករណី មិនសហការ មិនអនុវត្តតាមការណែនាំរបស់រដ្ឋបាលខណ្ឌឫស្សីកែវ និងអនុវត្តវិធានការរដ្ឋបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅថ្ងៃអង្គារ ទី១១ ខែមីនា ឆ្នាំ២០២៥ លោក ឌន ដាវុឌ នាយករងរដ្ឋបាលខណ្ឌឫស្សីកែវ ដោយទទួលបានការណែនាំរបស់លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ បានដឹកនាំមន្រ្តីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈ មន្ត្រីការិយាល័យសេដ្ឋកិច្ច និងអភិវឌ្ឍន៍សហគមន៍ នាយសង្កាត់រដ្ឋបាលជលផលច្រាំងចំរេះ សង្កាត់ច្រាំងចំរេះទី១ និងសង្កាត់ស្វាយប៉ាក់ ចុះត្រួតពិនិត្យ ដាយត្រី ដែលមាននៅក្នុងភូមិសាស្រ្តខណ្ឌឬស្សីកែវ ដោយដាយត្រីសរុបចំនួន១៣ទីតាំងមានច្បាប់អនុញ្ញាត ក្នុងការចុះពិនិត្យជាក់ស្ដែងឃេីញថា មានដាយត្រីមានចំនួន១០ទីតាំងប៉ុណ្ណោះ ស្ថិតនៅភូមិសាស្រ្ត ខណ្ឌឫស្សីកែវ។

ក្នុងយុទ្ធនាការចុះត្រួតពិនិត្យនេះ ក្រុមការងារបានណែនាំ ឱ្យម្ចាស់ដាយត្រីរុះរើ និងចល័តយ៉ាងយូរត្រឹមថ្ងៃផុតកំណត់ឱ្យធ្វើអាជីវកម្មដាយត្រី ដែលត្រូវជាថ្ងៃទី៣០ ខែមីនា ឆ្នាំ២០២៥ ប្រសិនបើម្ចាស់ដាយត្រីមិនសហការមិនអនុវត្តតាមការណែនាំរបស់រដ្ឋបាលខណ្ឌឫស្សីកែវ និងអនុវត្តវិធានការរដ្ឋបាល និងមិនទទួលខុសត្រូវចំពោះការខូចខាត ឬ បាត់បង់ផលប្រយោជន៍អ្វីឡើយ៕

អត្ថបទ ៖ សុភា