សហគមន៍ភ្ញាស់ពងទា ស្រែរនោង អាចផ្គត់ផ្គង់​លើ​ទីផ្សារពី ២០ម៉ឺន ទៅ ២៥ម៉ឺនគ្រាប់ ក្នុងមួយថ្ងៃ

តាមការបញ្ជាក់ពីលោក កេត ម៉ៅ អភិបាលស្រុកត្រាំកក់ នៃរដ្ឋបាលខេត្តតាកែវ បានឲ្យដឹងថា សហគមន៍ភ្ញាស់ពងទា ស្រែរនោង មានចំនួន២២ទីតាំង អាចផលិតពងទាកូន និងពងទាសាបសម្រាប់ផ្គត់ផ្គង់នៅលើទីផ្សារចន្លោះចាប់ពី ២០ម៉ឺនគ្រាប់ ទៅ ២៥ម៉ឺនគ្រាប់ ក្នុងមួយថ្ងៃ។

លោកអភិបាលស្រុកបន្ថែមថា ទីតាំងភ្ញាស់ពងទាទាំង២២នេះ មានភ្ញាស់ដោយអង្កាមចំនួន ៣ទីតាំង ភ្ញាស់ពាក់​កណ្ដាល​ស្វ័យប្រវត្តិ ចំនួន ៧ទីតាំង និងភ្ញាស់ដោយខ្សែភ្លើង មានចំនួន ១២ទីតាំង។ បើតាមការបញ្ជាក់ពីលោកអភិបាលស្រុក សហគមន៍ភ្ញាស់ពងទា ស្រែរនោង ក៏មានហ្វូងទា ចំនួនជាង ៤៥ម៉ឺនក្បាល សម្រាប់ផ្គត់ផ្គង់ពងជាប្រចាំថ្ងៃដល់ សហគមន៍ ដើម្បីផលិតជាពងទាកូន និងពងទាសាប សម្រាប់លក់លើទីផ្សារផងដែរ។

សូមបញ្ជាក់ថា ការលើកឡើងរបស់លោកអភិបាលស្រុកត្រាំកក់ នេះ បានធ្វើឡើងនៅពេលលោកអញ្ជើញអមដំណើរលោក វ៉ី សំណាង អភិបាលនៃគណៈអភិបាលខេត្តតាកែវ ដែលចុះពិនិត្យមើលការភ្ញាស់ពងទាកូន និងពងទាសាប របស់​សហគមន៍ពងទាស្រែរនោង ស្ថិតនៅឃុំស្រែរនោង ស្រុកត្រាំកក់ នាព្រឹកថ្ងៃទី២៣ ខែមេសា ឆ្នាំ២០២៥នេះ៕

អត្ថបទ៖ សុខុម