ព័ត៌មានជាតិ

មេខ្យល់ម្នាក់ នាំពលករខ្មែរ ៥ នាក់ តាមរថយន្តបម្រុងឆ្លងដែនទៅប្រទេសថៃត្រូវសមត្ថកិច្ចឃាត់ខ្លួន

បានផុស

៥ years មុន

នៅ

ថ្ងៃសុក្រ ២៦ មីនា ២០២១

ដោយ

មេខ្សល់ម្នាក់ដឹកនាំពលករខ្មែរ៥នាក់តាមរថយន្តបម្រុងឆ្លងដែនទៅប្រទេសថៃនៅស្រុកសំពៅលូនត្រូវសមត្ថកិច្ចចម្រុះឃាត់ខ្លួនបាននៅព្រឹកថ្ងៃទី២៦ ខែមីនា ឆ្នាំ២០២១។

លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ជនសង្ស័យជាមេខ្យល់ឈ្មោះ ទូច សម្បត្តិ ភេទប្រុសអាយុ៤០ឆ្នាំ នៅភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង។

លោកបានបញ្ជាក់ឲ្យដឹងបន្តថា បុរសជាមេខ្យល់នេះបានដឹកពលករតាមរថយន្តម៉ាកកាម៉ារី ពណ៌ស ពាក់ ស្លាកលេខ ភ្នំពេញ 2F-5584 ចំនួន៥នាក់ នៅចំណុចភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ ដើម្បីធ្វើការឆ្លងដែនទៅថៃរកការងារធ្វើត្រូវបានកម្លាំងនគរបាលវរសេនាតូចការពារព្រំដែនគោកលេខ៨១៥ កម្លាំងនគរបាលនៃអធិការដ្ឋាននគរបាលស្រុកម៉ាឡៃ សហការជាមួយកម្លាំងយោធាសិករងស្រុកម៉ាឡៃ ធ្វើការឃាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអធិការបានបញ្ជាក់ថា តាមការបំភ្លឺរបស់ពលករទាំង៥នាក់ បានរៀបរាប់ថា ពួកខ្លួនត្រូវបានមនុស្សម្នាក់តេតាមទូរស័ព្ទប្រាប់ឲ្យរងចាំ បន្តិចទៀតមានរថយន្តមកដឹក ពេលនោះមានរថយន្ត១គ្រឿងបានមកដឹកពួកខ្លួនទាំង៥នាក់តាមការកំណត់ ពីស្រុកសំពៅលូន មកកាន់ស្រុកម៉ាឡៃ ដើម្បីឆ្លងដែនទៅប្រទេសថៃ ដោយក្នុង១នាក់គេយកថ្លៃ៥០០បាត លុះមកដល់ចំណុចភូមិភ្នំរូង អ្នកបើកឡានឈប់បើកទ្វារឲ្យពួកពលកររត់ ប៉ុន្តែរត់រួចតែ២នាក់ ចំណែក៣នាក់ទៀតចេញពីឡានមិនរួច។អធិការនគរបាលស្រុកម៉ាឡៃ បានបញ្ជាក់ទៀតថាបើតាមចម្លើយ របស់មេខ្យល់បានសារភាពថា ខ្លួនពិតជាបានដឹកពលករទាំង៥នាក់នោះមែន ដោយ១នាក់គេយកតម្លៃ៥០០បាត ពីស្រុកសំពៅលូន មកស្រុកម៉ាឡៃ និងបានបើកទ្វារឡានឲ្យពលកររត់នៅពេលឃើញសមត្ថកិច្ច ។ ដោយផ្អែកលើចម្លើយបំភ្លឺរបស់ពលករនិងចម្លើយសារភាពរបស់មេខ្យល់ ត្រូវបានបញ្ជូនខ្លួនទៅសាលាដំបូងខេត្តបន្ទាយមានជ័យ ដើម្បីចាត់ការតាមនិតិវិធីច្បាប់ច្បាប់៕

អត្ថបទ ៖ វ៉ាន់ ណាង