កសិករដាំម្នាស់ អាចរកប្រាក់ចំណូលបាន ២០ម៉ឺនដុល្លារក្នុងមួយឆ្នាំ

កសិករមួយរូបដែលប្រកបមុខរបរដាំម្នាស់លើផ្ទៃដីប្រមាណ ៤០ហិកតា កំពុងត្រេកអរក្នុងការទទួលផល ខណៈផ្លែម្នាស់ពេលនេះកំពុងមានទីផ្សារល្អ ដែលក្នុងមួយរដូវលោកអាចរកចំណូលបាន ២០មុឺនដុល្លារលើផ្ទៃដីដែលលោកកំពុងដាំដុះ។

លោក ឡាយ ប៉ក់ អាយុ៥២ឆ្នាំ រស់នៅភូមិកែវមុន្នី ឃុំបាសាក់ ស្រុករុក្ខគិរី ខេត្តបាត់ដំបង បានរៀបរាប់ថា សព្វថ្ងៃលោកបានដាក់កម្លាំងកម្មករដាំដំណាំម្នាស់លើផ្ទៃដីប្រមាណ ៤០ហិកតា ដោយសារលោកយល់ឃើញថា ដីនៅក្នុងតំបន់នោះគឺប្រកបដោយជីជាតិ ហើយត្រូវនឹងដំណាំម្នាស់ផងដែរ។

លោកបានបន្តថា ដំណាំម្នាស់ គឺប្រើរយៈពេលជាងមួយឆ្នាំទើបទទួលបានផល ដោយការដាំកូនរយៈពេលមួយខែដំបូង គឺត្រូវប្រើជីចំនួន ៨ការ៉ុង លើកផ្ទៃដីមួយហិកតា ដើម្បីជួយជំរុញឲ្យកូនម្នាស់ឆាប់លូតធំធាត់ លុះបានរយៈពេល ៤ខែ ត្រូវដាក់ជីម្ដងទៀត បន្ទាប់មកពេលដើមធំល្មមទើបលោកប្រើប្រាស់ថ្មស្អុយ លាយជាមួយទឹក ដើម្បីដើរចាក់ចូលទៅលើត្រួយម្នាស់ ក្នុងការជំរុញឲ្យដើមម្នាស់ចាប់ផ្ដើមចេញផ្លែព្រមៗគ្នា។

លោកបានបញ្ជាក់យ៉ាងច្បាស់ថា នៅពេលបច្ចុប្បន្នតម្លៃផ្លែម្នាស់់ អាចលក់បានពី ១.០០០ ទៅ ២.០០០ រៀល ដែលនេះជាតម្លៃយ៉ាងល្អបំផុតប៉ុន្តែបើផ្លែម្នាស់ធ្លាក់មកនៅក្រោម ៥០០ រៀល គឺមិនអាចទប់ទល់ជាមួយនឹងតម្លៃជី និងកម្លាំងពលកម្មឡើយ។ នៅក្នុងរដូវប្រមូលផល លោកអាចប្រមូលបានពី ៣មុឺន ទៅ ៤មុឺនផ្លែ ក្នុងមួយហិកតា និងដឹកយកទៅបោះឲ្យស្តង់នៅទីក្រុងភ្នំពេញ នៅក្នុងមួយហិកតាលោកអាចរកចំណូលបានចាប់ពី ៣៥ ទៅ ៤០លានរៀល ដូច្នេះសម្រាប់ផ្ទៃដីដែលលោកដាំចំនួន ៤០ហិកតា គឺលោកអាចរកបានប្រាក់ចំណូល ២០មុឺនដុល្លារក្នុងមួយឆ្នាំ។

ដោយឡែកលោក ផេង ផល អភិបាលរងនៃគណៈអភិបាលស្រុករុក្ខគិរីបានលើកឡើងថា ផ្ទៃដីដាំដុះនៅក្នុងស្រុកគឺមានរហូតដល់ជាង ៤ម៉ឺនហិកតា ដោយឡែកប្រជាកសិករនៅក្នុងឃុំចំនួនពីរ គឺឃុំព្រែកជីក និងឃុំបាសាក់ ដែលជាកសិករដាំដំណាំម្នាស់ច្រើនជាងគេ ដែលការដាំនេះ គឺពួកគាត់មានស្តង់សម្រាប់ដឹកយកទៅ គឺមាននៅក្រុងភ្នំពេញ និងខេត្តសៀមរាប ដែលជាទីផ្សារដ៏ល្អរបស់ពួកគាត់៕

អត្ថបទ៖ សោ និយមរ័ត្ន