មេទ័ពជើងគោកកម្ពុជា-ម៉ាឡេស៊ី ជួបជជែកពីការពង្រឹងពង្រីកកិច្ចសហប្រតិបត្តិការយោធា

នៅថ្ងៃទី២១ ខែមេសា ឆ្នាំ២០២៥នេះ មេបញ្ជាការកងទ័ពជើងគោកម៉ាឡេស៊ី បានជួបប្រជុំជាមួយសមភាគីកម្ពុជា ដើម្បីជជែកគ្នាពីការពង្រឹងពង្រីកបន្ថែមទៀតនូវសហប្រតិបត្តិការយោធារវាងប្រទេសទាំងពីរ។​

កិច្ចប្រជុំទ្វេភាគីនេះ បានធ្វើឡើងក្នុងឱកាសនៃដំណើរទស្សនកិច្ចផ្លូវការរបស់លោកនាយឧត្តមសេនីយ៍ តាន់ស្រី ដាតុ វីរ៉ា ម៉ូហាម៉ាដ ហាហ្វីស៊ូដេឌីន ប៊ីនចាន់តាន់ (Tan Sri Dato’ Wira Muhammad Hafizuddeain Bin Jantan) មេបញ្ជាការកងទ័ពជើងគោកម៉ាឡេស៊ី នៅកម្ពុជា។ ដំណើរទស្សនកិច្ចនេះ គឺតបតាមការអញ្ជើញរបស់លោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។

ជំនួបដែលរៀបចំឡើងនៅទីបញ្ជាការដ្ឋានកងទ័ពជើងគោក រាជធានីភ្នំពេញ មេបញ្ជាការកងទ័ពជើងគោកទាំងពីរ បានផ្ដោតការពិភាក្សាស៊ីជម្រៅពាក់ព័ន្ធទៅនឹងការពង្រឹង និងពង្រីកកិច្ចសហប្រតិបត្តិការយោធារវាងប្រទេសទាំងពីរ កម្ពុជា-ម៉ាឡេស៊ី។

ក្រៅពីជំនួបទ្វេភាគីនេះ នាយឧត្តមសេនីយ៍ មេបញ្ជាការកងទ័ពជើងគោកម៉ាឡេស៊ី ក៏គ្រោងនឹងចូលជួបសម្តែងការគួរសមជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏ដូចជាជំនួបជាមួយនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ៕