មន្ទីរពេទ្យមិត្តភាពខ្មែរ-សូវៀត សហការជាមួយគ្រូពេទ្យមកពីអូស្រ្តាលីផ្តល់ការព្យាបាលបញ្ហាភ្នែក រយៈពេល ៣ថ្ងៃ

នៅព្រឹកថ្ងៃទី១០ ខែមិថុនា ឆ្នាំ២០២៥ មន្ទីរពេទ្យមិត្តភាពខ្មែរ-សូវៀត បានប្រកាសពីការផ្តល់ជូនការពិនិត្យ ព្យាបាលភ្នែករយៈពេល៣ថ្ងៃ ចាប់ពីថ្ងៃទី១៦ ដល់ទី១៨ ខែមិថុនា ក្រោមកិច្ចសហការជាមួយគ្រូពេទ្យមកពីប្រទេសអូស្ត្រាលី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីប្រកាសបញ្ជាក់ថា៖ “ផ្នែកចក្ខុរោគ នៃមន្ទីរពេទ្យមិត្តភាពខ្មែរ-សូវៀត បានសហការជាមួយ ក្រុមគ្រូពេទ្យមកពីប្រទេសអូស្ត្រាលី នឹងផ្តល់ជូន ការពិនិត្យ និងព្យាបាល ជំងឺត្របកភ្នែក ប្រព័ន្ធទឹកភ្នែក និងបញ្ហាឆ្អឹងប្រឡង់ភ្នែក ចាប់ពីថ្ងៃទី១៦ ដល់ថ្ងៃទី១៨ ខែមិថុនា ឆ្នាំ២០២៥”។

តាមប្រភពដដែលបង្ហាញថា  ការពិនិត្យ ព្យាបាលជំងឺត្របកភ្នែកមានដូចជា៖ បញ្ហាធ្លាក់ត្របកភ្នែក, ត្របកភ្នែកបែរទៅខាងក្រៅ, ត្របកភ្នែកបែរទៅខាងក្នុង, បញ្ហាកន្ត្រក់ត្របកភ្នែកដោយអចេតនា, ដុំសាច់ត្របកភ្នែក និងបញ្ហាស្បែកត្របកភ្នែកយារធ្លាក់។ ចំពោះការពិនិត្យ ព្យាបាលជំងឺប្រព័ន្ធបង្ហូរទឹកភ្នែកមានដូចជា៖ បញ្ហាស្ទះប្រព័ន្ធបង្ហូរទឹកភ្នែក, ការឆ្លងមេរោគនៃថង់ទឹកភ្នែក និងការស្ទះបំពង់បង្ហូរទឹកភ្នែកពីកំណើត (ចំពោះទារក)។

ចំណែកការពិនិត្យ ព្យាបាលបញ្ហាប្រឡង់ភ្នែកមានដូចជា ការបាក់ឆ្អឹងក្រអូមភ្នែក, បញ្ហាដុំសាច់ក្នុងឆ្អឹងក្រអូមភ្នែក, ជំងឺភ្នែកលៀនដែលទាក់ទងនឹងក្រពេញទីរ៉ូអ៊ីត, ជំងឺរលាកជាលិកាភ្នែក និងបញ្ហាភ្នែកលិច ចូលក្នុង ឬលៀនចេញ។

ខាងមន្ទីរពេទ្យមិត្តភាពខ្មែរ-សូវៀត ក៏បានបញ្ជាក់ដែរថា សម្រាប់ការសាកសួរព័ត៌មានផ្សេងៗបន្ថែមអាចទាក់ទងតាមលេខទូរសព្ទ៖ ០៩២ ៩៨៦ ៥៣២៕