សម្ដេច ហ៊ុន ម៉ាណែត បង្ហាញការប្ដេជ្ញាចិត្តរបស់កម្ពុជាដើម្បីពង្រឹងសមត្ថភាពជាតិក្នុងកិច្ចការពារមហាសមុទ្រ

ថ្លែងចេញពីសន្និសីទអង្គការសហប្រជាជាតិស្តីពីមហាសមុទ្រ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបង្ហាញការប្ដេជ្ញាចិត្តរបស់កម្ពុជាដើម្បីពង្រឹងសមត្ថភាពជាតិរបស់ខ្លួនក្នុងកិច្ចការពារមហាសមុទ្រ។ សម្តេចធិបតី ចាត់ទុកមហាសមុទ្រ ថា ជាកំណប់ទ្រព្យរួម ជាបេះដូងពណ៌ខៀវនៃភពផែនដី។

សេចក្តីថ្លែងការណ៍ជាតិ ក្នុងសន្និសីទអង្គការសហប្រជាជាតិ ស្តីពីមហាសមុទ្រ លើកទី៣ នៅទីក្រុងនីស ប្រទេសបារាំង កាលពីថ្ងៃទី៩ ខែមិថុនា ឆ្នាំ២០២៥ សម្ដេចធិបតី ហ៊ុន ម៉ាណែត បន្ថែមថា មហាសមុទ្រ គឺជាប្រភពនៃអាហារ ថាមពល និងទឹក ដែលផ្តល់នូវជីវភាព និងអត្ថប្រយោជន៍សេដ្ឋកិច្ចដល់គ្រប់ជាតិសាសន៍ ក៏ដូចជាការបង្កើតអុកស៊ីសែនសម្រាប់ការដកដង្ហើមផង និងជាមូលដ្ឋានគ្រឹះនៃជីវចម្រុះដ៏សម្បូរបែបនៃភពផែនដីផង។

ក្នុងនាមជាសមាជិកដែលមានទំនួលខុសត្រូវនៃសហគមន៍ពិភពលោក សម្តេចនាយករដ្ឋមន្ត្រី ហ៊ុន ម៉ាណែត បានលើកឡើងពីការព្រួយបាម្ភរបស់កម្ពុជាចំពោះការកើនឡើងការគំរាមកំហែងដល់មហាសមុទ្រពិភពលោក ដូចជាការកើនឡើងកម្រិតទឹកសមុទ្រ ការហូរច្រោះតាមឆ្នេរសមុទ្រ និងការបំពុលប្លាស្ទិក ការថយចុះយ៉ាងឆាប់រហ័សនៃជីវចម្រុះសមុទ្រ និងការប្រើប្រាស់ធនធានសមុទ្រហួសកម្រិតប្រមាណ ជាដើម។ បញ្ហាប្រឈមទាំងនេះទាមទារឱ្យមានសកម្មភាពជាបន្ទាន់ និងការសម្រេចចិត្ត ក៏ដូចជាកិច្ចសហការដោយឥតងាករេ។

ពីវេទិកានៃសន្និសីទមហាសមុទ្ររបស់អង្គការសហប្រជាជាតិនេះ សម្ដេច ហ៊ុន ម៉ាណែត បានអះអាងថា កម្ពុជាប្ដេជ្ញាចិត្តពង្រឹងសមត្ថភាពជាតិរបស់ខ្លួនក្នុងការការពារមហាសមុទ្រ តាមរយៈការពង្រីកតំបន់ការពារក្នុងដែនសមុទ្ររបស់ខ្លួន បានពង្រឹងបទប្បញ្ញត្តិពីការគ្រប់គ្រងការនេសាទប្រកបដោយចីរភាព និងការបង្កើនគំនិតផ្ដួចផ្ដើមថ្នាក់ជាតិ ដើម្បីប្រយុទ្ធប្រឆាំងនឹងការបំពុលសមុទ្រ។

សម្ដេចនាយករដ្ឋមន្ត្រី បានលើកឡើងពីយុទ្ធសាស្ត្រចក្រាក្នុងវិស័យបរិស្ថាន របស់កម្ពុជា ផ្ដោតលើសសរស្ដម្ភចំនួន៣ គឺភាពស្អាត ភាពបៃតង និងចីរភាព ដែលរួមចំណែកយ៉ាងសំខាន់ដល់សុខភាពនៃប្រព័ន្ធអេកូឡូស៊ីសមុទ្រ និងការការពារសមុទ្ររយៈពេលវែង។

ក្នុងក្របខណ្ឌអង្គការសហប្រជាជាតិ កម្ពុជាប្តេជ្ញាយ៉ាងមុះមុតក្នុងការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពទី១៤ ខណៈកម្ពុជា ក៏បានបោះឆ្នោតគាំទ្រសេចក្ដីសម្រេចចិត្តស្តីពីមហាសមុទ្រ និងច្បាប់សមុទ្រ ដែលទទួលបានការគាំទ្រយ៉ាងច្រើនលើសលប់ពីប្រទេសចំនួន១៥២ ក្នុងមហាសន្និបាតអង្គការសហប្រជាជាតិ លើកទី៧៩។

កម្ពុជាបញ្ជាក់ជាថ្មីនូវការប្តេជ្ញាចិត្តយ៉ាងមុតមាំរបស់ខ្លួនក្នុងការក្លាយជាភាគីនៃកិច្ចព្រមព្រៀង BBNJ ដែលបានអនុម័តនៅថ្ងៃទី១៩ ខែមិថុនា ឆ្នាំ២០២៣ផងដែរ។ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បន្ថែមយ៉ាងដូច្នេះ៕

ដោយ៖ ធឿន វ៉ាន់សុង