សម្តេចតេជោ៖ ខ្ញុំអត់បានយកថៃធ្វើជាសត្រូវទេ ប៉ុន្តែអ្នកចាត់ទុកខ្ញុំជាសត្រូវ ខ្ញុំក៏ត្រូវចាត់ទុកអ្នកជាសត្រូវ

សម្តេចតេជោ ហ៊ុន សែន ប្រធានព្រឹទ្ធសភា បានផ្តាំទៅប្រជាជនថៃថា សម្តេចមិនដែលយកប្រទេសថៃ ឬប្រជាជនថៃធ្វើជាសត្រូវនោះទេ ព្រោះប្រជាជនថៃភាគច្រើនចង់បានសន្តិភាព​ ចង់មានមិត្តភាពជាមួយកម្ពុជា ក៏ប៉ុន្តែដោយសារមានក្រុមជ្រុលនិយមមួយក្រុម រាប់ទាំងមេដឹកនាំនយោបាយរបស់ថៃបានវាយប្រហារមកលើកម្ពុជា ទើបបង្ខំចិត្តសម្តេច វាយបកទៅវិញ។ នេះជាការអះអាងរបស់សម្តេចតេជោ ​នាឱកាសអញ្ជើញជួបសំណេះសំណាលជាមួយសមាជិកក្រុមប្រឹក្សាឃុំ-សង្កាត់ ស្រុក-ក្រុង ខេត្តព្រះវិហារ ចំនួន ៤៦៤នាក់ នៅសាលាខេត្តព្រះវិហារ  នៅព្រឹកថ្ងៃទី ២៧ ខែមិថុនា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោបញ្ជាក់ថា​៖« ខ្ញុំជាមនុស្សដែលមានគុណធម៌ ហើយខ្ញុំក៏មិនក្បត់អ្នកណាមុនដែរ ខ្ញុំសុខចិត្តឱ្យគេក្បត់ខ្ញុំមុន។ ឥឡូវដល់ពេលវេលាដែលគេបានក្បត់ខ្ញុំហើយ»។

ក្នុងន័យនេះ កន្លងមកសម្តេចបានជួយត្រកូលថាក់ស៊ីនជាច្រើនលើកមកហើយ រហូតដល់ជំនាន់នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ ប៉ុន្តែផ្ទុយមកវិញមិនទទួលបានការសងគុណ បែរជានាយករដ្ឋមន្រ្តីក្បត់សម្តេចទៅវិញ។​ ការណ៍នេះហើយ ដែលបង្ខំចិត្តឱ្យសម្តេចត្រូវវាយបកទៅអ្នកដែលបានក្បត់សម្តេចមុន ដើម្បីប្រជាជនកម្ពុជា និងអធិបតេយ្យភាពជាតិ។

សម្តេចតេជោ ហ៊ុន សែន បញ្ជាក់យ៉ាងដូច្នេះថា៖«ខ្ញុំសូមជម្រាបជូនទៅប្រជាពលរដ្ឋថៃ ខ្ញុំអត់បានយកប្រទេសថៃធ្វើជាសត្រូវទេ ​មិនបានយកជនជាតិថៃធ្វើជាសត្រូវទេ តែខ្ញុំក៏ត្រូវតែប្រឈមនឹងការពិតមួយ អ្នកចាត់ទុកខ្ញុំជាសត្រូវ ខ្ញុំក៏ត្រូវចាត់ទុកអ្នកក៏ជាសត្រូវដែរ»។ សម្តេចបានបន្ថែមទៀតថា៖« អ្នកណាក៏ដោយ មិនថាខ្មែរ មិនថាបរទេសទេ បើសិនតាំងខ្លួនចាត់ទុកខ្ញុំជាសត្រូវហើយ ខ្ញុំគ្មានជម្រើសទេ ព្រោះអត់ឱ្យជម្រើសទី៣សម្រាប់ខ្ញុំផង»។​

ឈានទៅដល់ការបែកធ្លាយសំឡេងសន្ទនារវាងសម្តេចតេជោ និងនាយករដ្ឋមន្រ្តីថៃវិញ សម្តេចបានបង្ហើបឱ្យដឹងថា​ ការបែកធ្លាយនោះមិនមែនជាចេតនារបស់សម្តេចនោះទេ ពោលមានមេដឹកនាំកម្ពុជាផ្សេងទៀតដែលខឹងសម្បារភាគីថៃ ទើបទម្លាយកិច្ចសន្ទនានោះ។​ មូលហេតុដែលមន្រ្តីកម្ពុជាខឹងនោះ ដោយសារភាគីថៃឈ្លានពានទឹកដីកម្ពុជា និងបិទព្រំដែនឯកតោភាគី ហើយមកចោទកម្ពុជាពីនេះពីនោះ។

ទាក់ទងការថតសំឡេងវិញ ដោយសម្តេចអះអាងថាសម្រាប់ទុកជាភស្តុតាង ដោយសារនាយករដ្ឋមន្រ្តីថៃធ្លាប់បោកសម្តេចម្តងហើយ។ សម្តេចថា៖«ខ្ញុំត្រូវបានគេបោកប្រាស់ម្តងរួចហើយ ដូច្នេះម្តងខ្ញុំត្រូវថតសំឡេងទុក»។
សម្តេចតេជោ បញ្ជាក់ជាថ្មីថា កម្ពុជា ត្រៀមខ្លួនធ្វើឱ្យសភាពការណ៍ព្រំដែន និងពាណិជ្ជកម្មជាមួយថៃប្រក្រតីឡើងវិញដើម្បីផលប្រយោជន៍នៃប្រជាជនទាំងពីរ ប៉ុន្តែទំនងជាមិនមែនធ្វើជាមួយនាយករដ្ឋមន្ត្រីថៃ ផែថងថាន ឡើយ៕