ទឹកទន្លេមេគង្គក្រចេះ ហក់ឡើងជាលើកទីពីរក្នុងឆ្នាំ២០២៥

ស្ថានភាពទឹកទន្លេមេគង្គក្រចេះ បានហក់ឡើងជាថ្មីម្តងទៀត នាព្រឹកថ្ងៃទី៥ ខែកញ្ញា ឆ្នាំ២០២៥នេះ ដែលបានឡើងដល់ ២០,៦៧ ម៉ែត្រ ក្រោយមានភ្លៀងធ្លាក់ជាបន្តបន្ទាប់ក្នុងរយៈពេលប៉ុន្មានថ្ងៃជាប់គ្នា។

យោងតាមព្រឹត្តបត្រព្យាករណ៍ធាតុអាកាសខេត្តក្រចេះបានឱ្យដឹងថា ខេត្តក្រចេះទទួលឥទ្ធិពលពីកម្រិតសម្ភាធខ្សោយ និងខ្យល់មូសុងនិរតី ចាប់ពីថ្ងៃទី ៥ ដល់ថ្ងៃទី ៨ ខែកញ្ញា ឆ្នាំ២០២៥ ស្ថានភាពបែបនេះធ្វើឱ្យអាកាសធាតុ សីតុណ្ហភាពពី ២៥-៣២ អង្សាសេ ខ្យល់ប្រែប្រួលទិសមានល្បឿនពី ១ ទៅ ៤ ម៉ែត្រ ក្នុង១វិនាទី និងមានភ្លៀងផ្គររន្ទះពីតិចទៅមធ្យម។

គិតចាប់ពីថ្ងៃទី៣១ ខែសីហា ដល់ថ្ងៃទី០៤ ខែកញ្ញា ឆ្នាំ២០២៥ ម៉ោង ១៦:០០នាទី ស្ថានភាពអាកាសធាតុ និងកម្ពស់ទឹក នាវេលាម៉ោង៧ព្រឹក ២០,៦៧ម៉ែត្រ ខណៈ​កម្ពស់ទឹកប្រុងប្រយ័ត្ន ២២,០០ម៉ែត្រ។

លោក ហេង រតន៍ម៉ូនីដា ប្រធានមន្ទីរធនធានទឹក និងឧតុនិយមខេត្តក្រចេះ បានឱ្យកម្ពុជាថ្មី ដឹងនៅព្រឹកថ្ងៃទី៥ ខែកញ្ញា នេះថា ចំពោះស្ថានភាពទឹកទន្លេមេគង្គក្រចេះ កម្រិតកម្ពស់ទឹកបានហក់ឡើង ២០,៦៧ម៉ែត្រ ជាថ្មីម្តងទៀតនៅខែកញ្ញានេះ បន្ទាប់ពីហក់ឡើង ២០,៨០ម៉ែត្រ កាលពីថ្ងៃទី២ ខែសីហា កន្លងទៅ ដែលជាជំនន់ទឹកភ្លៀង និងមានរយៈពេលខ្លីតែប៉ុណ្ណោះ។ ទោះជាយ៉ាងណាក្តី ស្ថានភាពទឹកបែបនេះគឺល្អ ហើយលោកគិតថា ទឹកទន្លេមេគង្គក្រចេះឆ្នាំនេះមិនឡើងដល់កម្រិតប្រកាសអាសន្ននោះឡើយ ខណៈដែលកម្រិតប្រកាសអាសន្ន ២២,០០ម៉ែត្រ៕

អត្ថបទ ប្រុញ វិធិន