ព័ត៌មានជាតិ

ប្រទះឃើញនាឡិកាទាហានជើងទឹកខ្មែរ ២គ្រឿងនៅដើរធម្មតា ក្រោយលិចនៅបាតទន្លេមេគង្គជាង៤៦ឆ្នាំ

បានផុស

៥ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

ក្រុមការងារអន្តរក្រសួងរុករកគ្រាប់មិនទាន់ផ្ទុះនៅក្រោមទឹក នៅថ្ងៃទី ០៧ ខែមេសា បានបើកប្រតិបត្តិការស្រង់នាវាចម្បាំង១គ្រឿងដែលបានលិចតាំងពីសម័យសង្គ្រាមចេញពីទឹកស្ថិតនៅភូមិ វាល ឃុំមានជ័យ ស្រុកស្រីសន្ធរ ខេត្តកំពង់ចាម។

ជាប្រតិបត្តិការដើម្បីបោសសម្អាតគ្រាប់យុទ្ធភណ្ឌមិនទាន់ផ្ទុះដែលបានកប់នៅក្រោមផ្ទៃទឹក ដោយរកឃើញគ្រាប់ជាង ១៦ តោន ហើយមាន៩០% មិនទាន់ផ្ទុះ។ ក្រៅពីនេះក៏មានសម្ភារៈ អាវុធ របស់របរប្រើប្រាស់មួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចការប្រតិបត្តិរុករក និងបោសសម្អាតគ្រាប់មិនទាន់ផ្ទុះនៅក្នុងនាវាចម្បាំងមួយនេះ កងកម្លាំងជំនាញក៏បានប្រទះឃើញនាឡិកាដៃម៉ាក TITONI ចំនួន ២ គ្រឿងដែលបានលិចទឹកអស់រយៈពេលជាង៤៦ឆ្នាំទៅហើយនៅរក្សបានរូបរាង ខ្សែគ្មានច្រែះចាប់ហើយម៉ាស៊ីនអាចដំណើរការបានធម្មតា បន្ទាប់ពីយកមកដុសលាង។

លោកឧត្តមសេនីយ៍ទោ ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះ នៃមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) បានឲ្យដឹងថាប្រតិបត្តិការស្រង់នាវាបានបញ្ចប់ហើយ ដោយបានបញ្ជូននាវា និងសម្ភារៈ គ្រាប់យុទ្ធភណ្ឌមួយចំនួន ត្រៀមដាក់តាំងនៅក្នុងសារមន្ទីរ។ លោកថាការងារដែលនៅសេសសល់គឺតិចតួច ប្រមាណ ១ សប្តាហ៍ទៀត។

លោក ម៉ី សុភា បានបញ្ជាក់ប្រាប់កម្ពុជាថ្មី នៅរសៀលថ្ងៃទី ០៨ ខែមេសានេះថា កម្លាំងបោសសំអាតគ្រាប់យុទ្ធភណ្ឌក៏បានរកឃើញនាឡិការម៉ាក TITONI ចំនួន ២ គ្រឿង ដែលជាប្រភេទនាឡិកាមិនប្រើថ្ម នៅរក្សាបានរូបរាងមិនមានច្រែះចាប់ នឹងដំណើរការបានធម្មតា បន្ទាប់ពីយកមកជូត ដុសលាង។

លោកម៉ី សុភាបញ្ជាក់ “នាឡិកា ២ គ្រឿងនិង វាងាប់ហើយ ប៉ុន្តែដល់ពេលយើងយកមកជូតសម្អាត ហើយគោះចុះគោះឡើងទៅវាដើរឡើងវិញធម្មតា”។ លោកបញ្ជាក់ថា អាយុកាលនាឡិកានេះ មិនក្រោមពី ៦០ឆ្នាំ៕