ព័ត៌មានជាតិ

មន្ត្រីជាន់ខ្ពស់ក្រសួងការងារ ចូលរួមកម្មវិធីប្រារព្ធទិវាអក្ខរកម្មជាតិ ៨ កញ្ញា ២០២៥ នៅខេត្តក្រចេះ

បានផុស

១១ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

លោក ម៉ុល វិបុល អនុរដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមក្នុងឱកាសប្រារព្ធទិវាអក្ខរកម្មជាតិ ៨ កញ្ញា ២០២៥ ក្រោមអធិបតីភាពដ៏ខ្ពង់ខ្ពស់ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដែលបានប្រព្រឹត្តទៅនៅខេត្តក្រចេះ កាលពីថ្ងៃទី ១០ ខែកញ្ញា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះ ក៏មានការចូលរួមពី លោកស្រី Esther McFarlane ប្រធានផ្នែកអប់រំ នៃអង្គការយូណេស្កូប្រចាំប្រទេសកម្ពុជា ព្រមទាំងវត្តមានចូលរួមពីសំណាក់ ឯកឧត្ដម និងលោកជំទាវ ដែលជាថ្នាក់ដឹកនាំ នៃក្រសួង-ស្ថាប័នរាជរដ្ឋាភិបាលជាច្រើនរូបទៀត។

ទិវាអក្ខរកម្មជាតិនាឆ្នាំនេះប្រារព្ធឡើងក្រោមប្រធានបទ «ការលើកកម្ពស់អក្ខរកម្មក្នុងយុគសម័យឌីជីថល» ដែលគូសបញ្ជាក់អំពីតួនាទី នៃអក្ខរកម្មសម្រាប់មនុស្សជាតិ និងសង្គម ខណៈប្រទេសកម្ពុជាកំពុងខិតខំប្រែក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ ហើយការអភិវឌ្ឍធនធានមនុស្សនៅតែជាបេះដូង នៃវឌ្ឍនភាពជាតិ។

អក្ខរកម្មផ្ដល់អំណាចដល់ប្រជាជនកម្ពុជាជាមួយនឹងជំនាញចាំបាច់ ដើម្បីទទួលបានការអប់រំ និងការងារ ការកសាងសង្គមពុទ្ធិ និងប្រកបដោយបរិយាបន្ន ដែលជាផែនការយុទ្ធសាស្ត្រអប់រំ (ESP ២០២៤-២០២៨) នៅកម្ពុជា បានដាក់អក្ខរកម្មជាមូលដ្ឋានគ្រឹះ នៃសសរស្ដម្ភ ដើម្បីសម្រេចបាននូវការអប់រំប្រកបដោយបរិយាបន្ន សមធម៌ និងគុណភាព។

តាមរយៈប្រធានបទនេះ គឺស្របទៅនឹងទស្សនវិស័យរបស់រាជរដ្ឋាភិបាលកម្ពុជា ដែលបានដាក់ចេញនូវក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដើម្បីឆ្លើយតបនឹងបដិវត្តន៍ឧស្សាហកម្មជំនាន់ទី ៤ ពោលគឺកសាងឱ្យបាននូវពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល៕