ព័ត៌មានអន្ដរជាតិ

ទីបំផុត អ៊ីស្រាអែល យល់ព្រមឱ្យមានការដាក់ពង្រាយ កងកម្លាំងអន្តរជាតិ នៅហ្គាហ្សា

បានផុស

២ ម៉ោង មុន

នៅ

ថ្ងៃចន្ទ ២៧ កក្កដា ២០២៦

ដោយ

គណៈរដ្ឋមន្ត្រីសន្តិសុខអ៊ីស្រាអែល បានអនុម័តនៅថ្ងៃអាទិត្យ លើការដាក់ពង្រាយកងកម្លាំងស្ថិរភាពអន្តរជាតិ (ISF) របស់ក្រុមប្រឹក្សាសន្តិភាពនៅតំបន់ហ្គាហ្សា ក្រោមផែនការរបស់ប្រធានាធិបតីសហរដ្ឋអាមេរិក ដូណាល់ ត្រាំ។ នេះបើយោងតាមប្រព័ន្ធផ្សព្វផ្សាយអ៊ីស្រាអែល។

ISF គឺជាស្ថាប័នមួយក្នុងចំណោមស្ថាប័នចំនួន៤ បង្កើតឡើងដើម្បីគ្រប់គ្រងតំបន់ហ្គាហ្សា ក្រោមផែនការរបស់ លោក ត្រាំ ត្រូវបានគាំទ្រដោយក្រុមប្រឹក្សាសន្តិសុខអង្គការសហប្រជាជាតិ(UN) តាមរយៈសេចក្តីសម្រេចលេខ២៨០៣ នៅថ្ងៃទី១៧ ខែវិច្ឆិកា ឆ្នាំ២០២៥ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Israel Hayom បានរាយការណ៍ថា៖ « គណៈរដ្ឋមន្ត្រីបានអនុម័តលើកងកម្លាំងពហុជាតិសាសន៍ ចំពោះចូលទៅក្នុងតំបន់ហ្គាហ្សា ដែលមានទំនាក់ទំនងជាមួយក្រុមប្រឹក្សាសន្តិភាព»។

យ៉ាងណាជុំវិញរឿងនេះ រដ្ឋមន្ត្រីសន្តិសុខជាតិ លោក Itamar Ben-Gvir បានបោះឆ្នោតប្រឆាំងនឹងការសម្រេចចិត្តនេះ ដោយប្រឆាំងនឹងសំឡេងភាគច្រើនរបស់គណៈរដ្ឋមន្ត្រី។

យោងតាមកាសែត Yedioth Ahronoth លោក Ben-Gvir និយាយថា៖ « ក្រុមហាម៉ាសមិនបានគោរពការប្តេជ្ញាចិត្តរបស់ខ្លួនក្នុងការដកទ័ពចេញពីតំបន់ហ្គាហ្សានិងដកហូតអាវុធ ដូច្នេះ អ៊ីស្រាអែលលែងមានកាតព្វកិច្ចគោរពការប្តេជ្ញាចិត្តក្រោមកិច្ចព្រមព្រៀងទៀតហើយ។ ដំណោះស្រាយនៅហ្គាហ្សាគឺលើកទឹកចិត្តដល់ការធ្វើចំណាកស្រុក»។

រដ្ឋមន្ត្រីការបរទេស លោក Gideon Saar បានឆ្លើយតបអំឡុងពេលកិច្ចប្រជុំថា៖ « វាគឺជាផែនការអន្តរជាតិ! យើងប្រហែលជាមិនទទួលបានជោគជ័យទេ ប៉ុន្តែយើងក៏មិនគួរជាអ្នកដែលធ្វើឱ្យរអាក់រអួលដែរ»។

កាសែត KAN ឱ្យដឹងថា ការយល់ព្រមរបស់គណៈរដ្ឋមន្ត្រីផ្តល់ភ្លើងខៀវយ៉ាងមានប្រសិទ្ធភាព ដើម្បីចាប់ផ្តើមបង្កើតទីស្នាក់ការកណ្តាលសម្រាប់កម្លាំងនៅជិតទីក្រុង Rafah ភាគខាងត្បូងនៃតំបន់ហ្គាហ្សា។

ក្នុងសេចក្តីថ្លែងការណ៍មួយបង្កោះលើបណ្តាញសង្គម X អ្នកតំណាងនាំមុខគេរបស់ក្រុមប្រឹក្សាសន្តិភាពសម្រាប់តំបន់ហ្គាហ្សា លោក Nickolay Mladenov បានស្វាគមន៍ ចំពោះជំហានរបស់អ៊ីស្រាអែលក្នុងការសម្រួលដល់ការដាក់ពង្រាយកងកម្លាំង ISF នៅក្នុងតំបន់ហ្គាហ្សា ក្រោមសេចក្តីសម្រេចលេខ ២៨០៣ របស់ក្រុមប្រឹក្សាសន្តិសុខអង្គការសហប្រជាជាតិ។

លោក Mladenov បានហៅការដាក់ពង្រាយថា៖ « ជាផ្នែកសំខាន់មួយនៃក្របខ័ណ្ឌដែលបានព្រមព្រៀងគ្នា សម្រាប់ការធ្វើឱ្យមានស្ថិរភាព និងការដកទ័ពចេញពីតំបន់នេះ និងអនុញ្ញាតឱ្យមានការផ្លាស់ប្តូរទៅជារដ្ឋបាលអន្តរកាលប៉ាឡេស្ទីនប្រកបដោយប្រសិទ្ធភាព ក្រោមគណៈកម្មាធិការជាតិ សម្រាប់ការគ្រប់គ្រងតំបន់ហ្គាហ្សា»៕

ណឺ មិនា