កីឡា

គ្រូឥណ្ឌូណេស៊ី លើកឡើងថា ប៉ះកម្ពុជា យប់នេះ ត្រូវគិតឲ្យវែងឆ្ងាយ មិនត្រូវមើលស្រាលដៃគូ

បានផុស

៦ នាទី មុន

នៅ

ថ្ងៃចន្ទ ២៧ កក្កដា ២០២៦

ដោយ

ក្រុមបាល់ទាត់ជម្រើសជាតិកម្ពុជា នឹងប្រកួតជាមួយ ក្រុមជម្រើសជាតិឥណ្ឌូណេស៊ី វេលាម៉ោង ៨:៣០នាទី យប់ថ្ងៃចន្ទ ទី២៧ ខែកក្កដា ឆ្នាំ ២០២៦ នេះ វគ្គសន្សំពិន្ទុក្នុងពូល លើកទី២ ពានរង្វាន់ ASEAN Championship ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការប្រកួតសន្សំពិន្ទុលើកទី២ របស់ ក្រុមបាល់ទាត់កម្ពុជា បន្ទាប់ពីការប្រកួតទី១ បានចាញ់ សិង្ហបុរី ដោយលទ្ធផល ២-១ កាលពីថ្ងៃទី២៤ ខែកក្កដា ឆ្នាំ ២០២៦ នៅពហុកីឡដ្ឋានជាតិមរតកតេជោ។ ចំណែកម្ចាស់ផ្ទះ ឥណ្ឌូណេស៊ី ជាការប្រកួតសន្សំពិន្ទុលើកទី១ នៅក្នុងផ្ទះរបស់ខ្លួនតែម្តង។

លោក John Herdman គ្រូបង្គោលជម្រើសជាតិឥណ្ឌូណេស៊ី បានលើកឡើងថា កម្ពុជាជាក្រុមខ្លាំងមួយ និងជាដៃគូតឹងតែង ដោយសារពួកគេបានរៀបចំក្រុមយ៉ាងល្អ។ កត្តាសំខាន់គឺក្រុមរបស់លោកត្រូវផ្តោតយកចិត្តទុកដាក់ ដោយប្រកាន់ភ្ជាប់នូវអត្តសញ្ញាណបច្ចេកទេស ការទំនាក់ទំនងជាក្រុម និងកុំបង្កើតឲ្យមានកំហុស ជាជាងការដាក់សម្ពាធខ្លាំងដោយមើលស្រាលដៃគូ។

លោកបានសង្កត់ធ្ងន់ថា ៖«ក្រុមរបស់យើងត្រូវលេងតាមដំណាក់កាល ផ្តោតការយកចិត្តទុកដាក់ជាក្រុមជាចម្បង។ ការប្រកួតនេះមិនមែនជាការប្រកួតចុងក្រោយទេ ហើយបើមានគ្រាប់បាល់ ក៏មិនមែនជាគ្រាប់បាល់ចុងក្រោយនៃព្រឹត្តិការណ៍នេះដែរ»។

ចំណែកលោក Koji Gyotoku គ្រូបង្វឹកកម្ពុជា បានលើកឡើងថា លោកមានពេលវេលាតិចក្នុងការត្រៀមខ្លួន ប៉ុន្តែក្រុមរបស់លោកត្រូវតែផ្តោតយកចិត្តទុកដាក់មែនទែនសម្រាប់ការប្រកួតនេះ។ ក្រុមរបស់លោកកំពុងស្ថិតក្នុងដំណាក់កាលស្តារឡើងវិញ ដូច្នេះមិនទាន់មានស្ថិរភាពរឹងមាំឡើយ។ កីឡាករមួយចំនួនមិនទាន់មានលក្ខខណ្ឌពេញល្អ។ ការបាត់បង់ម្ចាស់ការក្នុងការគ្រប់គ្រងបាល់ចុងម៉ោងជាបញ្ហារបស់ក្រុម។

ប្រវត្តិជួបគ្នា ៧ លើកចុងក្រោយ គិតចាប់តាំងពីឆ្នាំ ២០០៤ មក កម្ពុជា មិនធ្លាប់ឈ្នះឥណ្ឌូណេស៊ី ឡើយពោលគឺចាញ់ទាំងអស់។

ប្រវត្តិជួបគ្នា កម្ពុជា ចាញ់ទាំង ៧ ប្រកួតចុងក្រោយ