អ្នកជំនាញអប់រំ៖ បេក្ខជនជាប់បាក់ឌុបគួរជ្រើស​រើសមុខវិជ្ជាណាដែលខ្លួនចូលចិត្ត និងកុំរៀនតាមគេទើបឈានទៅរកភាពជោគជ័យ

អ្នកជំនាញផ្នែកអប់រំបានណែនាំដល់បេក្ខជនប្រឡងបាក់ឌុបទាំងអស់គួរជ្រើសរើសមុខវិជ្ជាណាដែលស្របទៅនឹងឧបនិស្ស័យរបស់ខ្លួនមានពីកំណើតថា ខ្លួនចូលចិត្ត និងមានចំណង់ចំណូលចិត្តរៀនជំនាញអ្វីមួយច្បាស់លាស់ កុំរៀនតាមគេទើបអាចឈានទៅរកភាពជោគជ័យនាពេលអនាគត។

ក្រសួងអប់រំ យុវជន និងកីឡា នឹងប្រកាសលទ្ធផលប្រឡងបាក់ឌុបទូទាំងប្រទេសនៅថ្ងៃតែមួយ គឺនៅថ្ងៃទី២០ ខែកញ្ញាឆ្នាំ២០២៥ ចុងសប្តាហ៍នេះ។

លោកបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា បានលើកឡើងថា ក្រៅពីជ្រើសរើសមុខវិជ្ជាដែលស្របទៅនឹងឧបនិស្ស័យរបស់ខ្លួនមានពីកំណើត បេក្ខជនជាប់បាក់ឌុបក៏ត្រូវមើលពីតម្រូវការទីផ្សារការងារថា តើបច្ចុប្បន្ននេះជំនាញអ្វីដែលឆ្លើយតបទៅនឹងទីផ្សារបច្ចុប្បន្ន ហើយឆាប់បានការងារធ្វើពេលរៀនចប់ ដើម្បីទទួលបានប្រាក់ចំណូលចិញ្ចឹមខ្លួន ក៏ដូចជាលើកជីវភាពរស់នៅក្នុងគ្រួសារកាន់តែប្រសើរ។ ប៉ុន្តែមុខវិជ្ជាដែលសិក្សាទាំងនោះ ក៏ត្រូវស្របទៅនឹងឧបនិស្ស័យ ឬចំណង់ចំណូលចិត្តរបស់ខ្លួនផងដែរ។

លោកបណ្ឌិត ហេង វ៉ាន់ដា បានបន្តទៀតថា ចំពោះបេក្ខជនប្រឡងធ្លាក់បាក់ឌុប សូមកុំអស់សង្ឃឹម គួររៀនបរិញ្ញាបត្ររងតែម្តង ដោយមិនចាំបាច់រៀនថ្នាក់ទី១២ ឡើងវិញបន្តទៀតទេ នាំឱ្យខាតពេល តែបេក្ខជនអាចដាក់ស្វៃរិន ដើម្បីត្រៀមចូលប្រប្រឡងបន្តទៀតនៅឆ្នាំក្រោយបាន។

បច្ចុប្បន្នក្រសួងអប់រំយុវជននិងកីឡា បាននឹងកំពុងដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុចាប់ពីថ្ងៃទី ៧ ដល់ថ្ងៃទី ១៨ ខែកញ្ញា ឆ្នាំ២០២៥ និងដំណើរការបោះពុម្ពលទ្ធផលប្រឡង ប្រព្រឹត្តទៅនៅថ្ងៃទី១៩ ខែកញ្ញា ឆ្នាំ២០២៥ និងប្រកាសលទ្ធផលប្រឡងនៅថ្ងៃទី ២០កញ្ញានៅទូទាំងប្រទេសបន្ទាប់ពីដំណើរការកំណែសន្លឹកកិច្ចការបេក្ខជនដែលបានចាប់ផ្តើមពីថ្ងៃទី ៣១សីហា រហូតដល់ថ្ងៃទី ៦ ខែកញ្ញា ឆ្នាំ២០២៥។

គួរបញ្ជាក់ថា សម្រាប់ឆ្នាំ២០២៥នេះ​ មានបេក្ខជនចុះឈ្មោះប្រឡងបាក់ឌុបសរុប ១៤៦,៧២០នាក់ ស្រី ៨១,៤៤២នាក់ ក្នុងនោះបេក្ខជនថ្នាក់វិទ្យាសាស្ត្រ ៤០,៦៧៨នាក់ (ស្រី ២៤,៥១៩នាក់) បេក្ខជនថ្នាក់ វិទ្យាសាស្ត្រសង្គម ១០៦,០៤២នាក់ (ស្រី ៥៦,៩២៣នាក់)។ មណ្ឌលប្រឡងសរុប ២៤១មណ្ឌល ត្រូវជា ៥,៩២៤បន្ទប់ ក្នុងនោះថ្នាក់វិទ្យាសាស្ត្រ ៧២មណ្ឌល ត្រូវជា ១,៦៥៥បន្ទប់ និងថ្នាក់វិទ្យាសាស្ត្រសង្គ ម ១៦៩ មណ្ឌល ត្រូវជា ៤,២៦៩បន្ទប់និងគណៈមេប្រយោគទូទាំងប្រទេស និងគណៈកម្មការនានា នៅក្នុងដំណើរ ការសំណេរសរុប ៣១,២០៣នាក់៕

អត្ថបទ៖ សំអឿន