មន្ត្រីជាន់ខ្ពស់ក្រសួងមហាផ្ទៃជំរុញឱ្យពន្ធនាគារបន្តពង្រឹងសន្តិសុខក្នុងបន្ទប់ឃុំឃាំង

លោក ឆែម សាវុធ រដ្ឋលេខាធិការក្រសួងមហាផ្ទៃ នៅថ្ងៃទី១ ខែតុលា ឆ្នាំ២០២៥នេះ បានជំរុញដល់អគ្គនាយកដ្ឋានពន្ធនាគារឱ្យបន្តពង្រឹងការងារសន្តិសុខ សណ្ដាប់ធ្នាប់ននៅតាមមណ្ឌលអប់រំកែប្រែ និងពន្ធនាគារនៅទូទាំងប្រទេស។

ការជំរុញរបស់លោករដ្ឋលេខាធិការ បានធ្វើឡើងក្នុងកិច្ចកិច្ចប្រជុំបូកសរុបលទ្ធផលការងារប្រចាំខែ របស់អគ្គនាយកដ្ឋានពន្ធនាគារ ដោយលោកបានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងក្នុងការអនុវត្តតួនាទី ភារកិច្ចរបស់ថ្នាក់ដឹកនាំអគ្គនាយកដ្ឋានពន្ធនាគារ និងមន្ត្រីពន្ធនាគារគ្រប់លំដាប់ថ្នាក់។

លោក ឆែម សាវុធ រដ្ឋលេខាធិការក្រសួងមហាផ្ទៃ ដែលទទួលបន្ទុកការងារអគ្គនាយកដ្ឋានពន្ធនាគារ បានជំរុញឱ្យអគ្គនាយកដ្ឋានពន្ធនាគារបន្តយកចិត្តទុកដាក់ និងពង្រឹងលើការងារសន្តិសុខនៅក្នុងពន្ធនាគារ ជាពិសេសការទប់ស្កាត់រាល់ការនាំចូលនូវវត្ថុហាមឃាត់ ជាអាទិ៍ទូរស័ព្ទដៃនិងគ្រឿងញៀន ដែលជាណែនាំរបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

បន្ថែមពីនេះ លោក បានជំរុញលើកិច្ចការងារបែងចែកចំណាត់ថ្នាក់សន្តិសុខជនជាប់ឃុំ ស្របតាមបែបបទ នីតិវិធី ព្រមទាំងពិនិត្យមើលលើចំណាត់ការបែងចែកវេនប្រចាំការនៅតាមមណ្ឌលអប់រំកែប្រែ និងពន្ធនាគាររាជធានីខេត្ត ព្រមទាំងបន្តយកចិត្តទុកដាក់ដោះស្រាយបញ្ហាប្រឈមសំខាន់ៗ ភាពចង្អៀតណែន ក្របខណ្ឌ និងការបណ្តុះបណ្តាលជំនាញមន្ត្រី និងហេដ្ឋារចនាសម្ព័ន្ធពន្ធនាគារដើម្បីសម្រាលភាពចង្អៀតណែន និងបម្រើដល់ការងារសន្តិសុខ៕