នយោបាយ
ព្រះអង្គម្ចាស់ ចក្រាវុធ នឹងក្លាយជាប្រធានគណបក្សហ៊្វុនស៊ិនប៉ិច ចុងខែនេះ
សមាជរបស់គណបក្សហ៊្វុនស៊ិនប៉ិច បានប្ដូរទៅធ្វើនៅចុងខែមករា ឆ្នាំ ២០២២នេះវិញ ដើម្បីផ្ដល់សេចក្ដីទុកចិត្ត ថ្វាយព្រះអង្គម្ចាស់ នរោត្តម ចក្រាវុធ ជាប្រធានគណបក្សហ៊្វុនស៊ិនប៉ិច។
លោក ញឿន រ៉ាដែន អ្នកនាំពាក្យ នៃគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មី នៅថ្ងៃទី ១៧ ខែមករានេះថា សមាជរបស់គណបក្សហ៊្វុនស៊ិនប៉ិច នឹងត្រូវលើកទៅធ្វើនៅចុងខែមករា ឆ្នាំ ២០២២វិញ។ លោកថា «ទាក់ទងនឹងសមាជ របស់គណបក្ស គឺយើងបានរៀបរយរួចហើយ ទាក់ទងនឹងនីតិវិធីមួយចំនួន ហើយយើងបានសម្រេចថា យ៉ាងហោចណាស់ គឺចុងខែមករាហ្នឹង យើងនឹងរៀបចំធ្វើសមាជតូចមួយ សម្រាប់ថ្វាយព្រះអង្គម្ចាស់ នរោត្តម ចក្រាវុធ គង់ជាព្រះប្រធានគណបក្សហ៊្វុនស៊ិនប៉ិច»។
ពីដំបូងគណបក្សហ៊្វុនស៊ិនប៉ិច គ្រោងរៀបចំសមាជនៅពាក់កណ្ដាលខែមករានេះ ដើម្បីបោះឆ្នោតផ្ដល់សេចក្ដីទុកចិត្ត ថ្វាយព្រះអង្គម្ចាស់ ចក្រាវុធ ជាប្រធានគណបក្សហ៊្វុនស៊ិនប៉ិច បន្ទាប់ពីសម្ដេចក្រុមព្រះ នរោត្តម រណឫទ្ធិ បានយាងចូលទិវង្គត់ កាលពីថ្ងៃទី ២៨ ខែវិច្ឆិកា ឆ្នាំ ២០២១កន្លងទៅនេះ។
អ្នកនាំពាក្យ នៃគណបក្សហ៊្វុនស៊ិនប៉ិច លោក ញឿន រ៉ាដែន បានបញ្ជាក់ថា មូលហេតុដែលគណបក្សរបស់លោក លើកពេលសមាជទៅធ្វើនៅចុងខែមករានេះ ក៏ព្រោះតែគណបក្សមិនទាន់ប្រញាប់លើបញ្ហានេះ ហើយតាមច្បាប់ស្ដីពី គណបក្សនយោបាយ ក៏ទុកពេលរហូតដល់ ៩០ថ្ងៃ ដើម្បីឲ្យគណបក្សរៀបចំប្រធានថ្មី ក្រោយអវត្តមានប្រធានចាស់ ផងដែរ។ លោកបន្ថែមថា «ដោយសារតែការងារសំខាន់ៗ យើងផ្ដោតទៅលើកិច្ចការចុះមូលដ្ឋាន ហើយនិងការរៀបចំនូវបេក្ខភាព ក្រុមប្រឹក្សាឃុំ-សង្កាត់ ដើម្បីចូលរួម»។
លោក ញឿន រ៉ាដែន បានគូសបញ្ជាក់ថា មកដល់ពេលនេះ លោកពុំមានការចាប់អារម្មណ៍ ទៅលើអតីតក្រុមមន្ត្រីជាន់ខ្ពស់ នៃគណបក្សហ៊្វុនស៊ិនប៉ិចមួយចំនួន ដែលចង់យកអ្នកផ្សេង មកធ្វើជាប្រធានគណបក្សជំនួស ព្រះអង្គម្ចាស់ ចក្រាវុធ នោះទេ ហើយក្រសួង-ស្ថាប័នពាក់ព័ន្ធ ក៏មិនធ្វើការងារជាមួយក្រុមអតីតមន្ត្រីទាំងនោះដែរ។
ចំពោះសមាជ របស់គណបក្សហ៊្វុនស៊ិនប៉ិច នៅចុងខែមករានេះ មានរបៀបវារៈសំខាន់ៗ ចំនួន ៣រួមមាន៖ កំណត់យុទ្ធសាស្រ្ដ និងគោលនយោបាយគណបក្ស, កែសម្រួលលក្ខន្តិកៈមួយចំនួន, និងការបោះឆ្នោតផ្ដល់សេចក្ដីទុកចិត្ត ថ្វាយព្រះអង្គម្ចាស់ ចក្រាវុធ ជាប្រធានគណបក្សហ៊្វុនស៊ិនប៉ិច៕
អត្ថបទ៖ ឃួន សុភ័ក្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៦ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ