ការបិទយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ នៅស្រុកគិរីសាគរ

ឃុំចំនួន ៣នៅស្រុកគិរីសាគរ ខេត្តកោះកុង នៅព្រឹកថ្ងៃទី ៣ ខែមិថុនានេះ បានរៀបចំពិធីបិទបញ្ចប់យុទ្ធនាការឃោសនា រកសំឡេងឆ្នោត ជ្រើសរើសក្រុមប្រឹក្សាឃុំសង្កាត់-អាណត្តទី ៥ ដោយមានសមាជិក-សមាជិកជាច្រើនរយនាក់ចូលរួម។

ថ្លែងបិទយុទ្ធនាការឃោសនារកសំឡេងឆ្នោតនេះ គឺលោក ដុំ យុហៀន អនុប្រធានក្រុមការងារគណបក្សថ្នាក់កណ្តាល ចុះមូលដ្ឋានខេត្តកោះកុង លើកឡើងថា លោកសូមអរគុណចំពោះការគាំទ្រគណបក្សប្រជាជនកម្ពុជា ដែលជាគណបក្សនាំយកនូវសន្តិភាព និងការអភិវឌ្ឍជូនប្រជាពលរដ្ឋទូទាំងប្រទេស។

លោក ដុំ យុហៀន ពន្យល់ទៀតថា បើគ្មានគណបក្សប្រជាជនកម្ពុជាទេ ក៏គ្មានការអភិវឌ្ឍសង្គមជាតិមកដល់ពេលសព្វថ្ងៃនេះដែរ។ ដូច្នេះមិនត្រូវភ្លេចគុណបំណាច់ ដែលថ្នាក់ដឹកនាំគណបក្សប្រជាជនកម្ពុជា លះបង់តស៊ូ ស្វែងរកសុខសន្តិភាព ស្ថេរភាពនយោបាយ និងបន្តធ្វើឲ្យប្រទេសជាតិរីកចម្រើនឡើយ។

លោក ដុំ យុហៀន នៅតែក្រើនដល់សមាជិក-សមាជិកាគណបក្សប្រជាជនកម្ពុជា ស្រុកគិរីសាគរ ចាំបាច់ថែរក្សាសុខភាពឲ្យបានល្អ ខណៈដំណើរការបោះឆ្នោត នៅថ្ងៃទី ៥ ខែមិថុនា ខិតជិតមកដល់ណាស់ទៅហើយ។ ម្យ៉ាងទៀត ត្រូវពិនិត្យមើលអត្តសញ្ញាណបណ្ណ និងឯកសារបញ្ជាក់ផ្សេងៗ បម្រើឲ្យការបោះឆ្នោតឲ្យបានត្រឹមត្រូវ ជៀសវាងខកខានពុំបានទៅបំពេញកាតព្វកិច្ចរបស់ខ្លួន ចំពោះការបោះឆ្នោត។

ជាចុងក្រោយលោក បានអំពាវនាវដល់សមាជិក-សមាជិកា និងប្រជាពលរដ្ឋ សូមបន្តបោះឆ្នោតជ្រើសរើសក្រុមប្រឹក្សាឃុំសង្កាត់-អាណត្តិទី ៥នេះ ដែលមកពីគណបក្សប្រជាជនកម្ពុជាឲ្យជាប់ឆ្នោត ច្បាស់ជាមិនខកបំណងនោះឡើយ សម្រាប់ការអភិវឌ្ឍមូលដ្ឋានជាបន្តបន្ទាប់៕  

អត្តបទ៖ សិរីវឌ្ឍនៈ