សម្តេច ហ៊ុន សែន ៖ ការបោះឆ្នោតជូនគណបក្សប្រជាជនកម្ពុជា ដូចបោះឆ្នោតរកក្តីសុខឲ្យខ្លួនឯង

ប្រមុខរាជរដ្ឋាភិបាលកម្ពុជា បានលើកឡើងថា ការបោះឆ្នោតជូនគណបក្សប្រជាជនកម្ពុជា ប្រៀបបីដូចបោះឆ្នោតរកក្តីសុខ សន្តិភាព និងការអភិវឌ្ឍជូនដល់ខ្លួនឯងយ៉ាងដូច្នោះដែរ។ សម្តេចតេជោ បានលើកឡើងបែបនេះនៅក្នុងពិធីអបអរសាទរទិវាមច្ឆជាតិ ០១ កក្កដា ឆ្នាំ២០២២ ដែលប្រារព្ធឡើងនៅទីតាំងអាងទឹកត្រពាំងថ្ម ភូមិ​ត្រពាំងថ្ម ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ នៅព្រឹកថ្ងៃសុក្រនេះ។

សម្តេ​ចប្រមុខរាជរដ្ឋាភិបាលកម្ពុជា អះអាងថា បើមានសន្តិភាពហើយ គួរតែបន្តរក្សាសន្តិភាពនេះ ហើយមានសន្តិភាព ទើបមានការអភិវឌ្ឍ និងមានការរីកចម្រើនដូចពេលបច្ចុប្បន្ននេះ។ ការទទួលបាននូវសន្តិភាព និងការអភិវឌ្ឍនេះ គឺដោយសារតែគណបក្សប្រជាជនកម្ពុជា។ ដូច្នេះហើយ សម្រាប់សម្តេចតេជោ ហ៊ុន សែន មានតែការបន្តបោះឆ្នោតជូនគណបក្សប្រជាជនកម្ពុជាទេ ទើបអាចរក្សាបាននូវបញ្ហាទាំងអស់នេះ៕

ដោយ៖ វណ្ណ​ សុគន្ធា