ឃាត់ខ្លួនជនសង្ស័យ៥នាក់ ក្រោយឆក់ទូរស័ព្ទពីនារី២នាក់បានសម្រេច​

ជនសង្ស័យ​ចំនួន​៥​នាក់​ត្រូវបាន​កម្លាំង​សមត្ថកិច្ច​ធ្វើការឃាត់ខ្លួន​បានជា​បន្តបន្ទាប់ ក្រោយ​ធ្វើ​សកម្មភាព​ឆក់​ទូរស័ព្ទ​ពី​នារី​២​នាក់​បានសម្រេច កាលពី​វេលា​ម៉ោង​១០​និង​២០​នាទី​ព្រឹក​ ថ្ងៃទី​២០ ខែមករា ឆ្នាំ​២០២២ នៅ​ភូមិ​ក្បាលដំរី​២ សង្កាត់​កា​កាប​ទី​២ ខណ្ឌ​ពោធិ៍​សែន​ជ័យ រាជធានី​ភ្នំពេញ ។

សមត្ថកិច្ចបានឲ្យដឹងថា​ ជនសង្ស័យ​ទី​១​ឈ្មោះ ​ថេត ប៉ុន​ថេ​ង ភេទ​ប្រុស​អាយុ​២១​ឆ្នាំ មុខរបរ​ជាង​សាក់ ស្នាក់នៅ​ភូមិ​គោក​ចំបក់ សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ ។ ទី​២​ឈ្មោះ​ នូ ប៉ូ​រិ​ន ភេទ​ប្រុស​អាយុ​២០​ឆ្នាំ មុខរបរ​ជាង​ជួសជុល​ម៉ូតូ​ ស្នាក់នៅ​ភូមិ​ត្រពាំង​ថ្លឹង​១ សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ ។ ទី​៣​ឈ្មោះ​ សំអាង សុវណ្ណ​រ៉ា ភេទ​ប្រុស​អាយុ​១៩​ឆ្នាំ មុខរបរ​សិស្ស ស្នាក់នៅ​ភូមិ​ថ្មគោល​១ សង្កាត់​ចោមចៅ​ទី​២ ខណ្ឌ​ពោធិ៍​សែន​ជ័យ ។ ទី​៤​ឈ្មោះ ​ចាន់ ចែ ភេទ​ប្រុស​អាយុ​១៩​ឆ្នាំ មុខរបរ​ជាង​ម៉ូតូ ស្នាក់នៅ​ភូមិ​ថ្មគោល​១ សង្កាត់​ចោមចៅ​ទី​២ ខណ្ឌ​ពោធិ៍​សែន​ជ័យ ។ ទី​៥​ឈ្មោះ​ ឃុន សុខ​ឃៀង ភេទ​ប្រុស​អាយុ​១៩​ឆ្នាំ មុខរបរ​លក់​គ្រឿងសំណង់ ស្នាក់នៅ​សង្កាត់​អូ​បែកក្អម ខណ្ឌ​សែន​សុខ ។ ចំណែកជនរងគ្រោះ​មានឈ្មោះ​ សឿង សុភ័ក្ត្រ​នាថ ភេទ​ស្រី​អាយុ​១៨​ឆ្នាំ មុខរបរ​បុគ្គលិក​ក្រុមហ៊ុន ស្នាក់នៅ​សង្កាត់​អូ​បែកក្អម ខណ្ឌ​សែន​សុខ ។

តាម​ប្រភព​ព័ត៌​មានបាន​ឱ្យដឹងថា មុនពេល​កើត​ហេតុ​ជនរងគ្រោះ​ជិះ​ម៉ូតូ​ម៉ាក​ ឃ្យូប៉ិក​ ពណ៌​ក្រហម ពាក់​ស្លាក​លេខ​ភ្នំពេញ​1HY 1783 ឌុប​មិត្តភ័ក្ដិ​ម្នាក់​មកពីផ្សារ​ដើ​មគរ​ បំណង​ជួប​អតិថិជន​ម្នាក់ទៀត​ខណៈ​ឈប់​ម៉ូតូ​ទាក់ទង​ទៅ​អតិថិជន​ ស្រាប់​តែមាន​ជនសង្ស័យ​៣​នាក់​ជិះ​ម៉ូតូ​ហុងដា​ឌ្រី​ម​សង់ ស៊េរី​ឆ្នាំ​២០២២ ពណ៌​ខ្មៅ​ពាក់​ស្លាក​លេខ​ភ្នំពេញ​1IS 6948 ធ្វើសកម្មភាព​ឆក់​ទូរស័ព្ទ​បានសម្រេច​រួច​ព្យាយាម​គេចខ្លួន​ តែត្រូវ​ជនរងគ្រោះ​ដេញ​ពីក្រោយ​និង​ស្រែកថា​ ចោរៗ ភ្លាមនោះ​ក៏​ជួប​កម្លាំង​ល្បាត​ឃាត់ខ្លួន​បាន​ភ្លាមៗ​តែម្តង​ និង​បន្ត​ស្រាវជ្រាវ​តាម​ចាប់​បក្ខពួក​បន្តទៀត​សរុប​៥​នាក់​។

នៅ​ចំពោះមុខ​សមត្ថកិច្ច​ជនសង្ស័យ​បាន​សារភាពថា ​ខ្លួន​ពិតជា​បាន​ធ្វើ​សកម្មភាព​ឆក់​ទូរស័ព្ទ​ជន​រងគ្រោះ​ពិតប្រាកដ​មែន​។

បច្ចុប្បន្ន ជនសង្ស័យ​ត្រូវបាន​សមត្ថកិច្ច​កសាង​សំណុំរឿង​បញ្ជូនទៅ​ផ្នែក​ព្រហ្មទណ្ឌ​ដើ​ម្បី​ចាត់ការ​តាមច្បាប់​៕

អត្ថបទ៖ សុខា​