Connect with us

សន្តិសុខសង្គម

អគ្គិភ័យឆេះផ្ទះពលរដ្ឋ២ខ្នងទាំងកណ្ដាលអាធ្រាត្រកាលពីយប់មិញនៅសង្កាត់បឹងទំពុនទី២

បានផុស

នៅ

គ្រោះអគ្គិភ័យមួយបានឆាបឆេះផ្ទះឈើ១ខ្នងទាំងស្រុង និងផ្ទះថ្ម១ល្វែងទៀតដែលនៅជាប់គ្នារងការខូចខាតស្ទើពាក់កណ្ដាល បង្កការភ្ញាក់ផ្អើលដល់សមត្ថកិច្ចមូលដ្ឋាន និងមន្ត្រីបង្ការពន្លត់អគ្គិភ័យចុះមកអន្តរាគមន៍កាលពីវេលាម៉ោង១២និង៣០នាទីរំលងអាធ្រាត្រ ឈានចូលថ្ងៃទី១៤ ខែកញ្ញា ឆ្នាំ២០២២ នៅតាមបណ្ដោយផ្លូវបេតុង៥៣ ក្នុងភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីប្រជាពលរដ្ឋបានឲ្យដឹងថា នៅយប់កើតហេតុគេឃើញមានផ្សែងហុយ​លាយឡំជាមួយអណ្ដាតភ្លើងឆេះយ៉ា​ង​សន្ធោសន្ធៅ​ចេញពីផ្ទះដែលធ្វើពីឈើខាងលើ ថ្មក្រោម​រួចក៏មានការស្រែកឆោឡោផ្អើលដល់ម្ចាស់​ផ្ទះប្រមូលសម្ភារៈ​មានតម្លៃចេញមកខាងក្រៅ និងទាក់ទងទៅសមត្ថកិច្ចមូលដ្ឋានដើម្បីសុំការអន្តរាគមន៍បាញ់ទឹកពន្លត់ ។

បន្ទាប់ពីទទួលបានព័ត៌មាននៃករណីអគ្គិភ័យខាងលើនេះភ្លាម កម្លាំងសមត្ថកិច្ចមូលដ្ឋានបានចុះមកដល់ និងសហការជាមួយកម្លាំង​សមត្ថកិច្ចជំនាញបង្ការពន្លត់អគ្គិភ័យជាច្រើននាក់ ចេញរថយន្តពន្លត់អគ្គិភ័យមកធ្វើការពង្រាយទុយោទឹកបាញ់ពន្លត់យ៉ាងញាប់ដៃញាប់ជើង ដោយប្រើទឹកអស់ចំនួន០៦ឡាន ប្រើពេលប្រមាណ១ម៉ោងក៏បាញ់ទឹកឲ្យរលត់ទៅវិញជាស្ថាពរ ។

ក្នុងករណីអគ្គិភ័យនេះ តាមប្រភពពីប្រជាពលរដ្ឋបានប្រាប់ឲ្យដឹងថា ផ្ទះរងគ្រោះខាងលើ គឺមានការឆ្លងចរន្ដអគ្គិសនីជាញឹកញ៉ាប់ ហើយនៅយប់កើតហេតុនេះក៏កើតចេញពីឆ្លងចរន្ដអគ្គិសនីដែរ ទើបបណ្ដាលឲ្យមានការឆាបឆេះនេះតែម្ដង តែក្នុងហេតុការណ៍នេះ​មិនបង្កគ្រោះថ្នាក់ដល់មនុស្សណាម្នាក់នោះឡើយ៕

អត្ថបទ៖ សុខា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម