ទារកទើបនឹងកើត ត្រូវបានស្ត្រីម្នាក់រើសពីក្នុងព្រៃ ខណៈស្រែកយំរំពងពេញព្រៃទាំងយប់

ទារកដ៏កម្សត់ម្នាក់ត្រូវបានជនមិនស្គាល់យកមកផ្លុងចោលក្នុងព្រៃ សំណាងល្អត្រូវបានស្ត្រីម្នាក់ជិះម៉ូតូមកពីធ្វើការប្រទះឃើញរួចយកមកផ្ទះ និងបានរាយការណ៍មកសមត្ថកិច្ចដើម្បីចិញ្ចឹមបីបាច់ថែរក្សាបន្តពីឪពុកម្ដាយរបស់គេវិញ។

ករណីនេះបានកើតឡើងនៅវេលាម៉ោង២១និង០០នាទីថ្ងៃទី១៣ ខែវិច្ឆិកា ឆ្នាំ២០២២ ក្នុងភូមិអូរ ឃុំកណ្តែក ស្រុកប្រាសាទបាគង ខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋបានលើកឡើងថា ទារកកំសត់នេះបើកុំតែបានស្ត្រីចិត្តធម៌ម្នាក់ចេញពីធ្វើការបានឮសំឡេងក្មេងយំក៏ឈប់ម៉ូតូដើររកមើលហើយក៏ប្រទះឃើញទារកនៅក្នុងថង់ខ្មៅកំពង់ស្រែកយំរំពងក្នុងព្រៃតែម្នាក់ឯង គួរឱ្យអាណិត។

លោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ស្ត្រីឈ្មោះ សិន មករា អាយុ​៣៥ឆ្នាំ រស់នៅភូមិអូរ ឃុំកណ្តែក ស្រុកប្រាសាទបាគង បានរាយការណ៍មកសមត្ថកិច្ចថា គាត់បានចេញពីធ្វើការនៅ​ហើយជិះម៉ូតូមកផ្ទះវិញ ពេលជិះដល់ត្រង់ចំណុចខាងលេចឆៀងខាងត្បូងព្រៃដំរី ស្ថិតនៅភូមិស្ពានក្អែក ឃុំកណ្តែក ស្រុកប្រាសាទបាគង ក៏ស្រាប់តែលឺសម្លេងក្មេងស្រែកយំ ពេលលឺដូចនោះរូបនាងក៏បានឈប់ម៉ូតូហើយឈួលភ្លើងទូរស័ព្ទដើរទៅមើលក៏ប្រទះឃើញទារកម្នាក់ដែលទើបនឹងកើត (កូនប្រុស)ឃើញនៅក្នុងថង់ខ្មៅចំហមាត់ក្រោមដើមត្រាចដោយមិនដឹងថាអ្នកណាម្នាក់យកមកទុកចោល ពេលឃើញដូចនោះរូបនាងក៏បានយកទារកនោះយកមកផ្ទះតែម្តង។

បច្ចុប្បន្នទារកកំសត់នេះត្រូវបានស្ត្រីចិត្តធម៌ខាងលើ យល់ព្រមយកទំនុកបម្រុងបីបាច់ថែរក្សាឱ្យដូចជាកូនបង្កើតយ៉ាងដូច្នេះដែរ៕

អត្ថបទ៖ កុសល