Connect with us

សន្តិសុខសង្គម

​​ពលរដ្ឋ​​ចោទ​នាយកសាលា​នគរបាលភូមិភាគ ៥ សង់​របង​រំលោភ​​​កាន់កាប់​ដី​​​រាប់សិប​ហិក​តា

បានផុស

នៅ

ដីចម្ការទំហំ ៧០ ហិកតា ដែលជាដីរបស់ប្រជាពលរដ្ឋកំពុងបង្កបង្កើនផល ហើយក៏ជាដីជាប់បំណុលស្ថិតក្នុងការគ្រប់គ្រង​របស់តុលាការ ត្រូវបានអ្នកមានឥទ្ធិពលមួយរូប ធ្វើរបងឡោមព័ទ្ធទាំងបំពាន ដែលធ្វើ​ឲ្យ​ប្រជាពលរដ្ឋនិងអជ្ញាធរដែលរស់នៅក្នុងតំបន់មានការក្តៅក្រហាយយ៉ាងខ្លាំង។

គួរំលឹកថា ដីទំនាស់នេះ បានកើតឡើងជាច្រើនលើក ច្រើនសារណាស់មកហើយ គឺស្ថិតនៅចំណុចអូរពពេល ក្នុងភូមិចម្លងរមាំងក្រោម ឃុំអូរសំរិល ស្រុកសំឡូត ខេត្តបាត់ដំបង ដែលមានផ្ទៃដីទំហំ ៧០ ហិកតា ជារបស់ឈ្មោះ សាន ម៉ាលី អតីតយោធិនពលី និង អ្នកស្រី សន រ៉ាណែត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការរៀបរាប់ពីអ្នកស្រី សន រ៉ាណែត បានលើកឡើងថា ដីទំហំ៧០ហិកតានេះ គឺអ្នកស្រី និងស្វាមី បានទិញនិងបានអាស្រ័យផលតាំងពីឆ្នាំ២០០៧ មកម្ល៉េះ ដោយមានព្រំប្រទល់ខាងជើងជាប់និងលោកស្រីឆេង សុីវត្ថា ខាងត្បូងទល់និង ចំណីអូរពពេល ខាងលិចទល់និង ប្រឡាយដីលោក គឹមសុណ និងខាងកើតទល់និងប្រឡាយផ្លូវកុងទ្រី ដោយមានចុះហត្ថលេខា និងបោះត្រាយ៉ាងត្រឹមត្រូវពីលោកមេឃុំ ផឹង ហ៊ន ថែមទៀតផង ។

លោកស្រីបានបន្តថា លុះមកដល់ឆ្នាំ ២០១២ ដោយសារស្ថានភាពជម្ងឺគ្រុនចាញ់ប្តីកាន់តែធ្ងន់ ម៉្យាងលុយក៏គ្មានទើបអ្នកស្រីសម្រេចយកប្លង់ដីដែលមានទំហំ ៧០ ហិកតានេះ ទៅដាក់បញ្ចាំនៅធនាគារអេសុីលីដា ប្រចាំស្រុកបវេល ដើម្បី​យក​លុយ​មកប្រើការ។

នៅពេលនោះ ដំណាំពោតរបស់អ្នកស្រីកំពុងតែលូតលាស់ល្អ ស្រាប់តែឈ្មោះ បុិ វ៉ាន់ ហៅឡុង ដែលបច្ចុប្បន្នមាននាទីជានាយកសាលានគរបាលភូមិភាគ៥ (ទួលម្កាក់ កំពង់ព្រះ) បានដាក់កម្លាំងនិងគ្រឿងចក្រទៅឈូសបំផ្លាញដំណាំខ្ទេចខ្ទី ហើយគេក៏បានដាំដំឡូងពីលើតែម្តង ដែលធ្វើអោយអ្នកស្រីកើតទុក្ខមិនសុខចិត្ត ក៏បានដាក់ពាក្យប្តឹងទៅអាជ្ញាធរពីថ្នាក់ក្រោម​រហូតដល់ថ្នាក់ខេត្ត ដែលកាលណោះអភិបាលខេត្តគឺឯកឧត្តម ប្រាជ្ញ ច័ន្ទ។

នៅពេលនោះហើយដែលខេត្តបានចាត់តាំង លោក សៀង ស៊ុតថង ដឹកនាំគណកម្មការចម្រុះ ដែលមានទាំងអាជ្ញាធរមូលដ្ឋាន និង ភូមិបាលស្រុក ចុះទៅវាស់វែង និងបោះបង្គោលព្រំ ដោយបានគាស់ហៅភាគីទាំងសងខាងអោយចូលរួម គឺនៅថ្ងៃទី ៣០ មីនា ឆ្នាំ២០១២ ប៉ុន្តែនៅពេលនោះពុំមានវត្តមានរបស់លោក បុិ វ៉ាន់ ហៅឡុង មកចូលរួមឡើយ។

នៅឆ្នាំ២០១៥ ពេលដែលអ្នកស្រីធ្លាក់ខ្លួន ដោយសារមើលជម្ងឺប្តីអស់ពីខ្លួនរហូតប្តីក៏បានស្លាប់ ដោយសារគ្មានប្រាក់បង់អោយ​ធនាគារ ទើបខាងធនាគារបានប្តឹងអ្នកស្រីទៅតុលាការ ទីបំផុតដីអ្នកស្រីត្រូវបានតុលាការប្រកាសដាក់លក់ឡាយ​ឡុងក្នុងស្រោមសំបុត្រ ប៉ុន្តែមិនមានអ្នកណាចូលដេញថ្លៃទិញនោះទេ ទើបអ្នកស្រីបានចរចារជាមួយធនាគារ សុំលក់ដីមួយ​ចំនួន ដើម្បីបានបង់អោយធនាគារបន្ត។ ប៉ុន្តែនៅពេលនោះ ឈ្មោះខាងលើបានបន្តចូលទន្ទ្រានម្តងទៀត។ ក្រោយពីទទួលបានដំណឹងនេះ ក្រុមអធិការកិច្ចខេត្តបានហៅលោក បុិ វ៉ាន់ ហៅឡុង អោយយកឯកសារមកពិនិត្យរួមគ្នា គឺនៅ​ពេលនោះទើបដឹងថា ប្លង់ដីរបស់លោក បុិ វ៉ាន់ ហៅឡុង មានជារដិបរដុប ហើយមានទីតាំងមិនចំលើដីអ្នកស្រី សន រ៉ាណែតឡើយ។

ថ្មីៗនេះ ខណ:ដែលអ្នកស្រីជាមួយនិងប្រជាពលរដ្ឋមួយចំនួន ដែលបានទិញដីពីអ្នកស្រីកំពុងតែដាំដំណាំ គឺនៅថ្ងៃទី២៤ ខែកុម្ភ: ឆ្នាំ២០២៣ ស្រាប់តែលោក បុិ វ៉ាន់ ហៅឡុង បានដាក់កម្លាំងទៅសង់រោងកណ្តាលចម្ការរបស់ប្រជាពលរដ្ឋ ហើយ​បានចុះដាំបង្គោលព័ទ្ធខ្សែលួស ទៅទល់ជើងភ្នំទាក់ព្រ័ត្រ និងជើងភ្នំវាយចាប ដែលមានទំហំរាប់រយហិកតា ក្នុងនោះ​ដីទំនាស់ ៧០ ហិកតា ក៏ត្រូវបានព័ទ្ធទាំងអស់ដោយគ្មានរណាហ៊ានតតាំងឡើយ ខណ:ដែលពលរដ្ឋកំពុងដាំដុំនូវ ប្រភេទដំឡូង ពោត ស្វាយចន្ទី និងដើមប្រេងខ្យល់ធំៗទៅហើយ។

តាមរយ:ទូរស័ព្ទលោក ផឹង ហ៊ន មេឃុំអូរសំរិល បានបញ្ជាក់ថា ហត្ថលេខានិងត្រានៅលើលិខិតទិញលក់និងប្លង់របស់អ្នកស្រី សន រ៉ាណែត ពិតជារបស់លោកពិតប្រាកដ គឺលោកទទួលស្គាល់ថាដី៧០ហិកតា ពិតជារបស់អ្នកស្រីមែន។ ដោយឡែករឿងរបស់លោក បុិ វ៉ាន់ ហៅឡុង ដែលចុះព័ទ្ធរបងលួសលើដីនេះ លោកបានរាយការណ៍ទៅស្រុករួចហើយ ដើម្បីមានវិធានការ។

ជុំវិញបញ្ហាដ៏ចម្រូងចម្រាស់នេះ លោក បុិ វ៉ាន់ ហៅឡុង នាយកសាលានគរបាលភូមិភាគ៥ បានបញ្ជាក់តាម​រយ:​ទូរស័ព្ទ កាលពីថ្ងៃទី១៦ ឧសភា នេះថា ការដែលលោកដាក់កម្លាំងចុះព័ទ្ធរបងនេះ គឺដោយសារតែដីទាំងអស់នេះជារបស់លោក​ដោយសរុបមានទំហំ ៦០០ ហិកតា គឺលោកបានទិញពីប្រជាពលរដ្ឋទាំងពីឆ្នាំ២០១៥ រហូតដល់ ២០១៧ ដែលកាល​ណោះ ដីនៅព្រៃនៅឡើយហើយស្ថិតក្នុងភូមិចម្លងរមាំងក្រោមទាំងអស់។

ដោយឡែកចំពោះដី ៧០ ហិកតា របស់អ្នកស្រី សន រ៉ាណែត គឺលោក បុិ វ៉ាន់ បានចោទប្រកាន់ថា ប្តីរបស់អ្នកស្រី គឺលោក សាន ម៉ាលី បានឃុបឃិតជាមួយអភិបាលរងស្រុកម្នាក់ ធ្វើប្លង់ជាន់លើដីរបស់លោក ហើយយកទៅដាក់បញ្ចាំធនាគារអេសុីលីដា។ សម្រាប់សំណួរដែលថា ប្លង់របស់លោកមានរដិបរដុប នេះបើតាមការពិនិត្យរបស់ក្រុមអធិការកិច្ច គឺលោកបានអះអាងថា បើមិនជឿអោយទៅសួរប្រជាពលរដ្ឋនិងលោកមេឃុំទៅគឺសុទ្ធតែដឹងថា តំបន់នេះជាដីរបស់លោកទាំងអស់។

ជុំវិញរឿងនេះ លោក សឿម ប៊ុនរិទ្ធ អភិបាលរងខេត្ត ទទួលបន្ទុកដោះស្រាយដីធ្លីបានលើកឡើងថា លោកមិនបានជ្រាបទាល់តែសោះ ហើយលោកនឹងសាកសួរទៅស្រុកដើម្បីចង់ដឹង និង​ឲ្យ​ស្រុករុញរបាយការណ៍នេះមករដ្ឋបាលខេត្តជាបន្ទាន់ដើម្បីពិនិត្យ។

នៅព្រឹកថ្ងៃទី១៨ ឧសភា នេះដែរ លោក សើ សាម៉េត អភិបាលស្រុកសំឡូត បានបញ្ជាក់តាមរយ:ទូរស័ព្ទថា លោកទើបតែទទួលបាននូវពាក្យបណ្តឹងរបស់ប្រជាពលរដ្ឋ ប្រហែល៤ថ្ងៃកន្លងមកនេះ ដោយសារឃុំទើបរុញមកស្រុក ហើយរឿងរ៉ាវខាងលើ បានកើតឡើងជាយូរណាស់មកហើយ ប៉ុន្តែដោយឡែករឿងថ្មីៗ គឺរឿងព័ទ្ធរបងលួសលើផ្ទៃដីដ៏ធំល្វឹងល្វើយនេះ លោកបានចាត់តាំងលោកអភិបាលរងស្រុកមួយរូបដែលទទួលបន្ទុក អោយចុះធ្វើការលើរឿងនេះហើយ ហើយលោកក៏កំពុងត្រៀមឯកសារដើម្បីបញ្ជូនទៅថ្នាក់ខេត្តដែរ៕

អត្ថបទ÷ សោ និយមរ័ត្ន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ៣ ម៉ោង មុន

អតីតសេដ្ឋិនីវៀតណាម Truong My Lan ត្រូវបានរដ្ឋអាជ្ញាស្នើកាត់ទោសប្រហារជីវិត

ព័ត៌មានអន្ដរជាតិ៧ ម៉ោង មុន

ស្ត្រីវៀតណាមដែលបានលក់ផ្លែពុទ្រាក្នុងតម្លៃថ្លៃទៅឱ្យភ្ញៀវទេសចរម្នាក់ ត្រូវរងការព្រមានពីអាជ្ញាធរ

ព័ត៌មានជាតិ៨ ម៉ោង មុន

ក្រសួង​ការងារ និង​បណ្តុះបណ្តាល​វិជ្ជាជីវៈ បើក​វគ្គ​បណ្តុះបណ្តាល​លើ​ជំនាញ​ផ្នែក​កំបោរ​ក្នុង​វិស័យ​សំណង់

ព័ត៌មានជាតិ៨ ម៉ោង មុន

ក្រសួងការងារ៖ ការបំផ្លើសព័ត៌មានអំពីការបើកប្រាក់ឈ្នួលដល់កម្មករ Y & W នៅថ្ងៃស្អែកនេះ ជាព័ត៌មានមិនពិត

ព័ត៌មានជាតិ៩ ម៉ោង មុន

មន្ត្រីជំនាញខេត្តកំពង់ចាម ចុះព្រមានម្ចាស់យានដ្ឋាន កែច្នៃ ឧបករណ៍បំពងសំឡេងខុសបច្ចេកទេស

Sokha Hotels

ព័ត៌មានពេញនិយម