សិស្សបឋមជាង ៣០០ នាក់ ខកខានចូលរៀន ដោយសារទឹកជន់លិចផ្លូវ

សិស្សសាលាបឋមសិក្សាចំនួន ៣ កន្លែង នៅស្រុកវើនសៃ ខេត្តរតនគីរី ខកខានមិនបានចូលរៀន ខណៈជំនន់ទឹកភ្លៀងបានហូរចូលតាមអូរលិចផ្លូវ។

មន្ទីរអប់រំ យុវជន និងកីឡា ខេត្តរតនគីរីបានឱ្យដឹងថា នៅថ្ងៃទី ២-៣ ខែសីហា ឆ្នាំ២០២៣ ស្ថានភាពអាកាសធាតុបន្តធ្លាក់ភ្លៀងធ្វើឲ្យមានជំនន់ទឹកភ្លៀងលិចផ្លូវទៅសាលាបឋមសិក្សាចំនួន៣កន្លែងក្នុងស្រុកវើនសៃ ជាមូលហេតុនៅឲ្យសិស្សានុសិស្សពិបាកក្នុងការធ្វើដំណើរ និងមិនបានមកសាលារៀន ក្នុងនោះមានគ្រូបង្រៀនចំនួន១០នាក់ ស្រី៤នាក់ និងសិស្សសរុប២៣៧នាក់ ស្រី១១៧នាក់។

សាលាបឋមទាំងនោះរួមមាន សាលាបឋមសិក្សាទៀមក្រោម គ្រូបង្រៀនចំនួន៣នាក់ ស្រី១នាក់ និងសិស្សចំនួន៩៤នាក់ ស្រី៥០នាក់។ សាលាបឋមសិក្សាកាលឹម គ្រូបង្រៀនចំនួន៤នាក់ ស្រី២នាក់ និងសិស្សចំនួន៩២នាក់ ស្រី៤៥នាក់។ សាលាបឋមសិក្សាកាចូនលើ គ្រូបង្រៀនចំនួន៣នាក់ ស្រី១នាក់ និងសិស្សចំនួន៥១នាក់ ស្រី២២នាក់។

គួររំលឹកផងដែរថា ចាប់ពីចុងខែកក្កដា មកដល់ថ្ងៃទី ៤ ខែសីហា ឆ្នាំ២០២៣នេះ មេឃនៅតែបន្តធ្លាក់ភ្លៀងដដែល ប៉ុន្តែទឹកទន្លេស្រែពកក៏បានស្រកបន្តិចខ្លះហើយ បន្ទាប់ពីប៉ុន្មានថ្ងៃមុនហក់ឡើងយ៉ាងខ្លាំងគួរឲ្យព្រួយបារម្ភ។

ហើយក៏សូមអំពាវនាវដល់បងប្អូនប្រជាពលរដ្ឋ ដែលរស់នៅតាមដងទន្លេស្រែពក និងទន្លេសេសានមានការប្រុងប្រយ័ត្នគ្រាដែលមេឃនៅតែបន្តធ្លាក់ភ្លៀងដដែល៕

អត្ថបទ៖ វុទ្ធឦសាន