តំបន់ប្រតិបត្តិការសឹករងកំពង់ឆ្នាំងហ្វឹកហាត់យុទ្ធវិធីសង្គ្រោះគ្រោះមហន្តរាយជាក់ស្តែងនៅលើផ្ទៃទឹកទន្លេ

តំបន់ប្រតិបត្តិការសឹករងកំពង់ឆ្នាំងបានហ្វឹកហាត់ធ្វើលំហាត់សង្គ្រោះមហន្តរាយធម្មជាតិផ្សេងៗនៅលើផ្ទៃទឹកជាលើកដំបូងរបស់ខ្លួនក្នុងបំណងដពង្រឹងលើសមត្ថភាពកងកម្លាំងកងទ័ពជាអ្នកសង្គ្រោះ។

ពិធីនេះបានធ្វើឡើងនៅថ្ងៃ ទី១០ ខែវិច្ឆិកា ឆ្នាំ២០២៣នេះ នៅលើផ្ទៃទឹកទន្លេ ក្នុងភូមិសាស្ត្រក្រុងកំពង់ឆ្នាំង ខេត្តកំពង់ឆ្នាំង ក្រោមអធិបតីភាព មេបញ្ជាការតំបន់ប្រតិបត្តិការសឹករងកំពង់ឆ្នាំងលោកឧត្តមសេនីយ៍ត្រី អ៊ុ សុភា។

ក្នុងពិធីនោះទៀត ក៏មានការចូលរួមពីមេបញ្ជាការរង កងរាជអាវុធហត្ថ ស្នងការរង អភិបាលរងក្រុង និងនាយទា ហានរង និងពលទាហានប្រមាណជា ៦០នាក់ និងរថយន្តយោធា ៧គ្រឿង រថយន្តសង្គ្រោះ ២គ្រឿង និងកាណូត ១០ គ្រឿង ចូលរួមផងដែរ។

មេបញ្ជាការតំបន់ប្រតិបត្តិការសឹករងខេត្តកំពង់ឆ្នាំង ក្នុងពិធីនោះបានឱ្យដឹងថា ការហ្វឹកហាត់ធ្វើលំហាត់យុទ្ធវិធីសង្គ្រោះគ្រោះមហន្តរាយដោយធម្មជាតិ និងគ្រោះមហន្តរាយផ្សេងៗ ដែលកើតឡើងនៅលើផ្ទៃទឹកនាពេលនេះគឺមានគោលបំ ណងពង្រឹងលើសមត្ថភាពកងកម្លាំងកងទ័ពដែលជាអ្នកសង្គ្រោះ នៅពេលហេតុការណ៍ណាមួយកើតឡើងនៅលើផ្ទៃទឹកក្នុងខេត្តកំពង់ឆ្នាំង។

លោក ឧត្តមសេនីយ៍ត្រី អ៊ុ សុភា បានឱ្យដឹងទៀតថា នេះគឺជាលើកទីមួយហើយ ដែលតំបន់ប្រតិបត្តិការសឹករងកំពង់ឆ្នាំង បើកយុទ្ធនាការសង្គ្រោះបន្ទាន់ គឺហ្វឹកហាត់ឱ្យបានរហ័សទាន់ពេលវេលា ខណៈទូកកាណូតចំនួន ១០គ្រឿង ដែលទទួលបានពីនាយករដ្ឋមន្ត្រី នៃព្រះរាជាណាចក្រកម្ពុជាសម្តេចធិបតី ហ៊ុន ម៉ាណែតបានប្រគល់ជូន ដើម្បីការងារសង្គម និងការងា រជួយសង្គ្រោះបន្ទាន់នូវគ្រោះធម្មជាតិផ្សេងៗ ដែលកើតឡើងជាយថាហេតុ។

នៅបញ្ចប់ពិធីយុទ្ធវិធីសង្គ្រោះបន្ទាន់ នៅលើផ្ទៃទឹកនោះទៀត លោកមេបញ្ជាការតំបន់ប្រតិបត្តិការសឹករងខេត្តកំពង់ឆ្នាំង ក៏ដូចជាភ្ញៀវកិត្តិយស បានសំដែងនូវការកោតសរសើរដល់កងកម្លាំងទាំងអស់ដែលអនុវត្តបានតាមខ្លឹមសារលំហាត់មេរៀន សិក្សាបានទទួលលទ្ធផលល្អនៅឆ្នាំនេះ៕

អត្ថបទ៖ ឈៀងថារិទ្ធ