ត្រឹមរយៈពេលតែពីរថ្ងៃ មន្ត្រីជំនាញបង្ក្រាបសាច់បង្កកខូចគុណភាពនាំចូលពីប្រទេសថៃជាង៤​តោន

គិតចាប់ពីថ្ងៃទី២៨ និងថ្ងៃទី២៩ ខែសីហា ឆ្នាំ២០២៤ មន្ត្រីជំនាញគយ និងរដ្ឋាករ ក្រោមឱវាទរបស់អគ្គនាយកដ្ឋានគយនិងរដ្ឋាករកម្ពុជា បានបើកប្រតិបត្តិការបង្ក្រាបការលួចនាំចូលសាច់បង្កខូចគុណភាពចំនួន៣ករណី តាមបណ្ដាលខេត្តចំនួន២ និងបានដកហូតសាច់បង្កកខូចគុណភាពជាង៤តោន។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឲ្យដឹងនៅព្រឹកថ្ងៃទី៣០សីហា នេះថា​ ការបង្ក្រាបទំនិញហាមឃាត់ការនាំចូលនេះ គឺធ្វើឡើងដោយអង្គភាពគយ និងរដ្ឋាករក្រោមឱវាទរបស់អគ្គនាយកដ្ឋានគយ និងរដ្ឋាករកម្ពុជា បានសហការជាមួយសមត្ថកិច្ចពាក់ព័ន្ធ ដកហូតបានបំណែកសាច់មាន់ និងសាច់ទាបង្កកចំនួន ៣ករណី ស្មើនឹង ៤ ២៣៩ គីឡូក្រាម។

របាយការណ៍បន្ថែមថា ករណីទី១ ត្រូវបានបង្ក្រាបកាលពីថ្ងៃទី២៨ ខែសីហា ឆ្នាំ២០២៤ ដោយមន្ត្រីការិយាល័យគយ និងរដ្ឋាករដូង នៃសាខាគយ និងរដ្ឋាករខេត្តបាត់ដំបង សហការជាមួយមន្ត្រីនគរបាល នៅពេលឈ្មួញលួចលាក់បង្កប់ក្នុងទំនិញដទៃ នាំចូលពីប្រទេសថៃ តាមផែស្ងួតដូង ដោយបានដកហូតចុងស្លាបមាន់ និងគ្រឿងក្នុងមាន់បង្កក ២៣៩ គីឡូក្រាម។

ករណីទី២ បង្ក្រាបដោយមន្ត្រីការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ នៃនាយកដ្ឋានបង្ការ និងបង្ក្រាបបទល្មើស សហការជាមួយមន្ត្រីការិយាល័យផលិតកម្ម និងបសុព្យាបាលខេត្តបន្ទាយមានជ័យ និងមន្ត្រីនគរបាល កាលពីថ្ងៃទី២៨ ខែសីហា ឆ្នាំ២០២៤ នៅពេលឈ្មួញលួចលាក់ដឹកជញ្ជូនតាមរថយន្តនាំចូលពីប្រទេសថៃ តាមច្រករបៀងក្នុងភូមិសាស្ត្រស្រុកស្វាយចេក ខេត្តបន្ទាយមានជ័យ ដកហូតបានជើងទាបង្កក ១ ៦០០ គីឡូក្រាម។

ករណីទី៣ បង្ក្រាបដោយមន្ត្រីការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ នៃនាយកដ្ឋានបង្ការនិងបង្ក្រាបបទល្មើស សហការជាមួយមន្ត្រីការិយាល័យផលិតកម្ម និងបសុព្យាបាលខេត្តបន្ទាយមានជ័យ និងមន្ត្រីនគរបាល កាលពីថ្ងៃទី២៩ ខែសីហា ឆ្នាំ២០២៤ នៅពេលឈ្មួញលួចលាក់ដឹកជញ្ជូនតាមរថយន្តនាំចូលពីប្រទេសថៃ តាមច្រករបៀងក្នុងភូមិសាស្ត្រស្រុកស្វាយចេក ខេត្តបន្ទាយមានជ័យ​ ដកហូតបានចុងស្លាបមាន់បង្កក ២ ៤០០ គីឡូក្រាម។

របាយការណ៍ដដែលបញ្ជាក់ថា បន្ទាប់ពីបង្ក្រាប និងដកហូតសាច់បង្កកខូចគុណភាពទាំងនេះ មន្ត្រីជំនាញបានសហការជាមួយសមត្ថកិច្ចពាក់ព័ន្ធ ធ្វើការដុតកម្ទេចចោលតាមវិធានជំនាញ៕

អត្ថបទ៖ សុខុម