រកឃើញសពជនរងគ្រោះដែលបាត់ខ្លួនក្នុងករណីបាក់ច្រាំងទន្លេនៅស្រុកខ្សាច់កណ្ដាល

សពជនរងគ្រោះម្នាក់ដែលបាត់ខ្លួនក្នុងករណីបាក់ច្រាំងទន្លេនៅស្រុកខ្សាច់កណ្ដាល កាលពីថ្ងៃទី១១​ ខែធ្នូ​ ឆ្នាំ២០២៤ កម្លាំងសមត្ថកិច្ចបានរកឃើញសាកសពហើយនៅព្រឹកថ្ងៃទី១៣ធ្នូនេះ។ សពជនរងគ្រោះត្រូវបានរកឃើញនៅវេលា​៧និង០០នាទីព្រឹក​ នៅឃុំព្រះប្រសប់​ ស្រុកខ្សាច់​កណ្តាល​ ខេត្តកណ្តាល។ នេះបើតាមការបញ្ជាក់ពីលោក ចេង ឌីណា អភិបាលស្រុកខ្សាច់កណ្ដាលនៅមុននេះបន្តិច។

ជនរងគ្រោះមានឈ្មោះ សឿ សឹង ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មករទូក មានស្រុកកំណើតនៅភូមិបារាយ ឃុំកំពង់ចាម ស្រុកសំបូរ ខេត្តក្រចេះ។

សូមបញ្ជាក់ថា កាលពីថ្ងៃទី១១​ ខែធ្នូ​ ឆ្នាំ២០២៤ វេលាម៉ោង៤​និង០០នាទីព្រឹក​ មានករណីបាក់ច្រាំងទន្លេសង្កត់ទូកដឹកខ្សាច់ចំនួន៣គ្រឿងបណ្ដាលឲ្យមានជនរងគ្រោះចំនួន៤នាក់ ក្នុងនោះរបួសស្រាលម្នាក់ របួសធ្ងន់២នាក់ និងម្នាក់ទៀតបាត់ខ្លួន។

តាមការបញ្ជាក់ពីរដ្ឋបាលខេត្តកណ្ដាល ករណីនេះបាក់ច្រាំងទន្លេមេគង្គនេះ គឺកើតឡើងដោយសារគ្រោះធម្មជាតិ បាក់ប្រវែងជាង​៣០០ម៉ែត្រ ទទឹង៤០ម៉ែត្រ និងជម្រៅ ៧ម៉ែត្រ បណ្តាលឱ្យបាក់ស្រុតកៀកនឹងលំនៅឋានរបស់ប្រជាពលរដ្ឋ ស្ថិតនៅត្រង់ចំណុចភូមិព្រែកតាបែន ឃុំស្វាយរមៀត ស្រុកខ្សាច់កណ្តាល ខេត្តកណ្តាល៕

អត្ថបទ៖ សុខុម