អាជ្ញាធរស្រុកកោះញែកទុកពេល៣០ថ្ងៃឲ្យម្ចាស់សត្វពាហនៈ ត្រូវចងចំណងដាក់ទ្រុងឲ្យបានត្រឹមត្រូវ បើមិនដូច្នោះទេនឹងអនុវត្តផ្លូវច្បាប់

ដោយសង្កេតឃើញពីបញ្ហាគ្រោះថ្នាក់ចរាចរណ៍បណ្តាលឲ្យមនុស្សគ្រោះថ្នាក់ និងបណ្តាលឲ្យមានមនុស្សស្លាប់ជាច្រើនលើកច្រើនសារ ដែលបង្កឡើងដោយសត្វ គោ ក្របី កន្លងមកកើតឡើងដោយរឿយៗដែលម្ចាស់សត្វទាំងនោះ មិនដែលចេញមុខដោះស្រាយសំណងជូនជនរងគ្រោះទេ ដែលជាហេតុនាំឲ្យគ្រួសាររងគ្រោះប្ដឹងមកអាជ្ញាធរឃុំស្រុកដើម្បីដោះស្រាយជាបន្តបន្ទាប់។ ដូច្នេះ រដ្ឋបាលស្រុកកោះញែកបានចេញសេចក្ដីជូនដំណឹងស្ដីពីការហាមឃាត់ ការលែងគោក្របីនិងសត្វពាហនៈផ្សេងៗយ៉ាងតឹងរ៉ឹងកាលពីថ្ងៃទី៩ ខែឧសភា ឆ្នាំ២០២៥ ថ្មីៗនេះ។

ក្នុងលិខិតជូនដំណឹងបានបង្ហាញថា យោងតាមច្បាប់ចរាចរណ៍ផ្លូវគោកជំពូកទី៥ មាត្រាទី៣៣ ចុះថ្ងៃទី៩ ខែមករាឆ្នាំ២០១៥ ស្ដីពីការលែងសត្វពាហនៈដើរពាសវាលពាសកាលនៅតាមដងផ្លូវសាធារណៈ និងទីប្រជុំ។ ស្មារតីកិច្ចប្រជុំសាមញ្ញលើកទី១១អាណត្តិទី៤ថ្ងៃទី២៥ខែមេសាឆ្នាំ២០២៥របស់ក្រុមប្រឹក្សាស្រុកកោះញែក។ រដ្ឋបាលស្រុកកោះញែកសូមជម្រាបជូនដល់លោក លោកស្រីនិងបងប្អូនប្រជាពលរដ្ឋដែលចិញ្ចឹមសត្វពាហនៈគោក្របីក្នុងមូលដ្ឋានស្រុកកោះញែ
បញ្ហាសត្វពាហនៈគោក្របី ជាបញ្ហាដ៏រ៉ាំរ៉ៃមួយដែលម្ចាស់ មួយចំនួននៅតែមិនទាន់យកចិត្តទុកដាក់ អនុវត្តឲ្យបានខ្ជាប់ខ្ជួនតាមការណែនាំរបស់អាជ្ញាធរនោះទេ មានម្ចាស់មួយចំនួនតូចនៅតែបន្តលែងសត្វចិញ្ចឹមឲ្យដើរពាសវាលពាសកាលនៅតាមទីសាធារណៈទីប្រជុំជន ជាពិសេសលើដងផ្លូវសាធារណៈដែលនាំឲ្យមានគ្រោះថ្នាក់ចរាចរណ៍កើតឡើង។​ ហើយម្យ៉ាងទៀតសត្វគោក្របីទាំងនោះបានដើរស៊ីដំណាំដាំដុះរបស់ប្រជាពលរដ្ឋនៅ ជុះអាចម៍លើផ្លូវសាធារណៈធ្វើឲ្យខូចសណ្ដាប់ធ្នាប់សោភ័ណភាពអនាម័យបរិស្ថានទាំងបង្កគ្រោះថ្នាក់ផ្សេងៗ ដោយយថាហេតុ។

តាមលិខិតជូនដំណឹងបានបញ្ជាក់យ៉ាងច្បាស់ថា អាជ្ញាធរស្រុកកោះញែកទុករយៈពេលត្រឹម៣០ថ្ងៃប៉ុណ្ណោះ ដោយគិតចាប់ពីថ្ងៃទី៩ ខែឧសភា ឆ្នាំ២០២៥ រហូតដល់ថ្ងៃទី៩ ​ខែមិថុនា ឆ្នាំ២០២៥ជាកំហិត ។ហើយនឹងអនុវត្តផ្លូវច្បាប់ចាប់ពីថ្ងៃទី១០ខែមិថុនាឆ្នាំ២០២៥ គណៈបញ្ជាការឯកភាពស្រុក នឹងមិនលើកលែងឲ្យម្ចាស់ សត្វគោក្របីណាដែលលេងពាសវាលពាសកាល។និងធ្វើកិច្ចសន្យាផាកពិន័យតាមច្បាប់ដែលបានកំណត់ជាធរមានផងដែរ៕

អត្ថបទ៖ រៀម សុខហេង