សមត្ថកិច្ចខេត្តស្វាយរៀង ឃាត់ខ្លួនបុរសជនជាតិវៀតណាមម្នាក់ករណីជួញដូរគ្រឿងញៀន

ថ្ងៃទី១៣ ខែឧសភា ឆ្នាំ២០២៥ កម្លាំងជំនាញប្រឆាំងគ្រឿងញៀន នៃស្នងការដ្ឋាននគរបាលខេត្ត ស្វាយរៀង បានឃាត់ខ្លួនបុរសជនជាតិវៀតណាមម្នាក់ ពីបទជួញដូរគ្រឿងញៀន។

ការបង្ក្រាប អនុវត្តតាមបញ្ជា លោក ពេជ្រ វីរៈ ស្នងការនគរបាលខេត្តស្វាយរៀង ដឹកនាំដោយ លោក កែវ សុថា ស្នងការរងទទួលផែនការងារប្រឆាំងគ្រឿងញៀន សហការ ជាមួយកម្លាំងអធិការដ្ឋាននគរបាល ក្រុងបាវិត និងមន្ត្រីប្រៃសនីយ៍កម្ពុជា សាខាក្រុងបាវិត ព្រមទាំងមាន ការសម្របសម្រួល នីតិវិធី ដោយ លោក ហួត វិចិត្រ ព្រះរាជអាជ្ញារងអមសាលាដំបូងខេត្តស្វាយរៀង ឆែក កញ្ចប់បញ្ញើលេខកូដ EE20489766TH ពីប្រទេសថៃ មកកាន់ក្រុងបាវិត តាមរយៈប្រៃសនីយ៍កម្ពុជា សាខាក្រុងបាវិត។

ជនសង្ស័យ ឈ្មោះ ប៊ួយ វៀតអាន់ ជនជាតិវៀតណាម ព្រមទាំងដកហូតបាន សារធាតុញៀន(កញ្ឆារក្រៀម)ចំនួន ០២កញ្ចប់ ទម្ងន់ ៥៥២.១៣ក្រាម, ទូរស័ព្ទដៃ ០២គ្រឿង និងសម្ភារៈប្រើប្រាស់ មួយមួយចំនួន ។ បច្ចុប្បន្នជនសង្ស័យ រួមទាំងវត្ថុតាង បានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ និងត្រូវបានសាលាដំបូងខេត្ត ចេញដីកាឃុំក្នុងពន្ធនាគាររួចហើយ៕

ដោយ:ភក្ដី