ជីវិតកម្សាន្ដ

តួស្រី Zhao Liying និង Yang Mi រងការវាយប្រហារ ពីក្រុមអ្នកគាំទ្រផ្កាប់មុខម្ខាងៗ

បានផុស

១១ ខែ មុន

នៅ

ថ្ងៃសុក្រ ៦ មិថុនា ២០២៥

ដោយ

កាលពីពេលថ្មីៗនេះរឿងភាគចិនក្រោមចំណងជើងថា «She’s Got No Name» បានប្រកាសមុខមាត់ជាផ្លូវការនៃតួសំខាន់ៗ។ ខ្សែភាពយន្តនេះបានប្រមូលផ្តុំតារាល្បីៗជាង ២០នាក់នៃឧស្សាហកម្មកម្សាន្តរាប់តាំងពីតារាជួរមុខ រហូតដល់តារាសម្តែងវ័យក្មេង។

ងាកទៅកាន់ខាងតួឯកស្រី ក្រៅពីតារាស្រី Zhang Ziyi ការបង្ហាញខ្លួនរបស់តារាសម្តែង Zhao Liying និង Yang Mi បានទាក់ទាញការចាប់អារម្មណ៍យ៉ាងខ្លាំងពីមហាជន។ ចាប់តាំងពីការសម្ដែងត្រូវបានប្រកាសមក ទស្សនិកជនជាច្រើនបានដាក់តារាស្រីទាំង២ដួងនេះ នៅលើមាត្រដ្ឋានដើម្បីមើលថាតើអ្នកណាសំខាន់ជាងនៅក្នុងការងារមួយនេះ។

**Zhao Liying និង Yang Mi រូបភាព៖laodong.vn**

អ្នកលេងអ៊ីនធឺណែតបានរាយបញ្ជីការអប់រំរបស់តួក្នុងរឿង «She’s Got No Name» ដែលតួសម្តែងភាគច្រើនមកពីសាលាសំដែងផ្លូវការនិងមានវិជ្ជាជីវៈ។ គួរកត់សម្គាល់ថា Yang Mi បានបញ្ចប់ការសិក្សាពីបណ្ឌិតសភាភាពយន្តប៉េកាំងក្នុងឆ្នាំ ២០០៥។

ចំពោះ Zhao Liying នាងគឺជាមនុស្សដែលមានការអប់រំទាបបំផុតនៅក្នុងក្រុម។ នាងបានបញ្ចប់ការសិក្សានៅវិទ្យាល័យនៅសាលាបច្ចេកវិទ្យាព័ត៌មានអេឡិចត្រូនិច Langfang ដែលជាសាលាដែលមានលក្ខណៈដូចជាសាលាវិជ្ជាជីវៈ ហើយមិនផ្តល់មុខវិជ្ជាវប្បធម៌ច្រើននោះទេ។ ជាយូរមកហើយ កម្រិតអប់រំរបស់អ្នកមេម៉៉ាយចាយរាង ត្រូវបានគេចំអក និងវាយប្រហារជាច្រើនដង។ ប៉ុន្តែនាងតែងតែរក្សាភាពស្ងប់ស្ងាត់ ហើយផ្តោតលើការកែលម្អការសម្ដែងផ្ទាល់ខ្លួនវិញ។

បន្ទាប់ពីបញ្ហាការអប់រំ ការផ្តល់រង្វាន់ជាបន្តបន្ទាប់របស់តួឯកក្នុងរឿង ក៏បានក្លាយជាប្រធានបទពិភាក្សា។ Zhao Liying ត្រូវបានគេកោតសរសើរយ៉ាងខ្លាំងចំពោះការទទួលបានពានរង្វាន់ដ៏មានកិត្យានុភាពជាច្រើនដូចជា ពានរង្វាន់សមិទ្ធិផលឆ្នើម, ពានរង្វាន់ឥន្ទ្រីមាស និង ពានរង្វាន់តួឯកស្រីល្អបំផុត។

ផ្ទុយទៅវិញ Yang Mi តែម្នាក់ឯងមិនទាន់មានពានរង្វាន់អ្វីបានល្អទេក្នុងអាជីពសម្ដែងរបស់នាងឡើយ។ សមរភូមិនៃការប្រៀបធៀបក្នុងវិស័យអប់រំ ពានរង្វាន់ និងកេរ្តិ៍ឈ្មោះរវាងតារាសម្ដែងទាំងពីរដួង បានផ្ទុះពេញបណ្តាញសង្គមអ៉ិនធើណេតចិនយ៉ាងព្រោងប្រាត។

ទោះជាយ៉ាងណាក៏ដោយ នេះក៏មិនមែនជាលើកទីមួយទេដែលតារាស្រីជួរមុខទាំងពីរនាក់ត្រូវបានអូសចូលទៅក្នុងសមរភូមិស៊ីសាច់ហុតឈាមគ្នានៅលើអ៊ីនធឺណិត។ អ្នកទាំងពីរសុទ្ធតែជាកំពូលតារាសម្ដែងប្រចាំវិស័យសិល្បៈចិន ដោយមានអ្នកគាំទ្រភ្លូកទឹកភ្លូកដីដូចគ្នា និងជាពិសេសម្នាក់ៗសុទ្ធតែមានសមិទ្ធិផលស្នាដៃល្បី បន្សល់់ទុកចាប់តាំងពីប្រឡូកអាជីពសម្ដែងមកដំបូងម៉្លេះ។

ការដែលអ្នកគាំទ្រភាគីទាំងសងខាងតែងតែវាយប្រហារគ្នាទៅវិញទៅមក ប្រៀបធៀបការសម្ដែង និងពានរង្វាន់របស់ពួកគេ ធ្វើឲ្យមហាជនមួយចំនួនធំមានការធុញទ្រាន់ជាខ្លាំង។ បច្ចុប្បន្ននេះ Zhao Liying និង Yang Mi មិនបានធ្វើសកម្មភាពជាក់លាក់ណាមួយដើម្បីផ្គាប់ចិត្តអ្នកគាំទ្រម្ខាងៗឡើយ៕