អភិបាលខេត្តស្វាយរៀង ប្រាប់ឱ្យអាជ្ញាធរបន្តបង្កើនការយកចិត្តទុកដាក់ក្នុងការបង្ការ និងបង្ក្រាបបទល្មើសគ្រប់ប្រភេទ

លោក ប៉េង​ ពោធិ៍សា​ អភិបាលខេត្តស្វាយរៀង បានណែនាំដល់អាជ្ញាធរ និងសមត្ថកិច្ចឱ្យបន្តបង្កើនការយកចិត្តទុកដាក់ឱ្យបានកាន់តែសកម្មថែមទៀត ក្នុងការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទទាំងបទល្មើស គ្រឿងញៀន ចរាចរណ៍ ល្បែងស៊ីសងខុសច្បាប់ ក្មេងទំនើង និងបទល្មើសលួច ឆក់ ប្លន់ នៅ មូលដ្ឋាន ដើម្បីធានាសុខសុវត្ថិភាពជូនប្រជាពលរដ្ឋឱ្យបានល្អប្រសើរគ្រប់ពេលវេលា និងគ្រប់កាលៈទេសៈ។

លោកបានណែនាំបែបនេះ ក្នុងឱកាសអញ្ជើជាអធិបតីក្នុងពិធីម្ពោធព្រះវិហារ និងសមិទ្ធផលនានាក្នុងវត្តល្ងើន ស្ថិតនៅឃុំជូនស ស្រុកស្វាយជ្រំ ថ្ងៃទី១៧ ខែឧសភា​ ឆ្នាំ២០២៥ នេះ។​ ក្នុងឱកាសនោះ អភិបាលខេត្តបានថ្លែងនូវការកោតសសើរចំពោះសមិទ្ធផលជាច្រើន និងបរិស្ថានដ៏ស្រស់ស្អាតក្នុងវត្តល្ងើន ដែលកើតមានឡើងដោយសារតែការរួបរួមសាមគ្គី ក្នុងទឹកចិត្ត ជ្រះថ្លា ជំនឿ និងការគោរពប្រណិប័តដ៏ជ្រាលជ្រៅក្នុងវិស័យព្រះពុទ្ធសាសនា។​

ទន្ទឹមនេះ​ លោកបានថ្លែងនូវអំណរព្រះគុណ ចំពោះព្រះតេជគុណ ព្រះចៅអធិការ គណៈកម្មាធិការអាចារ្យវត្ត ក៏ដូចជាពុទ្ធបរិស័ទ្ធចំណុះជើងវត្ត​ ជាពិសេស ក្នុងនាមអាជ្ញាធរខេត្ត សូមគោរពថ្លែងនូវការអរគុណយ៉ាងជ្រាលជ្រៅចំពោះ សម្តេច ឯកឧត្តម លោកជំទាវ ព្រមទាំងសប្បុរសជនទាំងក្នុង និងក្រៅប្រទេសដែលបានចូលរួមកសាងនូវទីអារាម និងសមិទ្ធផលផ្សេងៗទៀត នៅក្នុងវត្តល្ងើន រួមទាំង ព្រះវិហារដែលបានជួសជុលកែលម្អ ក្រោមការដឹកនាំរបស់ព្រះវិសុទ្ធិញ្ញាណ មុំ សយដោយបានចំណាយថវិកាសាងសង់ ប្រមាណជាង ១សែនដុល្លារ ហើយនឹងត្រូវដាក់សម្ពោធឱ្យប្រើប្រាស់ជាផ្លូវការនាពេលនេះ។

លោកបន្តថា​ សមិទ្ធផលដែលកើតឡើងនៅទីនេះ ពិតណាស់គឺមិនមែនកើតឡើងដោយចៃដន្យនោះទេ​ នេះក៏ព្រោះតែស្ថានភាពនៃប្រទេសជាតិរបស់យើងទទួលផលពីផ្លែផ្កា នៃសុខសន្តិភាព និងការអភិវឌ្ឍជាតិលើគ្រប់វិស័យ ដែលជាមរតកបន្សល់ទុកពីអគ្គមគ្គទេសក៍ជាតិដ៏ឆ្នើម របស់យើងគឺសម្តេចតេជោ ប្រធានព្រឹទ្ធសភាហើយបច្ចុប្បន្នបាននិងកំពុងបន្តថែរក្សាការពារ និងអភិវឌ្ឍន៍ ក្រោមការដឹកនាំប្រកបដោយ ភាពឈ្លាសវៃ ប៉ិនប្រសប់ និងស្វាហាប់ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាមួយគ្នានេះ លោកអភិបាលខេត្ត ក៏បានធ្វើការផ្តាំផ្ញើដល់ប្រជាពលរដ្ឋ ឱ្យចូលរួមជួយផ្សព្វផ្សាយផលប៉ះពាល់ និងគ្រោះថ្នាក់នៃការសេពគ្រឿងញៀន ដើម្បីទប់ស្កាត់ការប្រើប្រាស់គ្រឿងញៀន ហើយលុបបំបាត់គ្រឿងញៀននៅមូលដ្ឋាន ដើម្បីអនាគតកូនចៅយើង យុវជន និងកុមាររបស់យើង៕