អគ្គិភ័យឆេះផ្ទះពលរដ្ឋ៤ខ្នង នៅខណ្ឌឬស្សីកែវ

ផ្ទះប្រជាពលរដ្ឋចំនួន៤ខ្នង រួមទាំងសម្ភារៈប្រើប្រាស់មួយចំនួនត្រូវបានអគ្គិភ័យឆាបឆេះអស់ទាំងស្រុង បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍។ ហេតុការណ៍នេះបានកើតឡើងនៅវេលាម៉ោង​១២និង៣០នាទីយប់រំលងអធ្រាត្រ ឈានចូលថ្ងៃទី១៨ ខែមិថុនា ឆ្នាំ២០២៥ ស្ថិតនៅចំណុចផ្លូវ១០០៣ ក្រុម៧​ ភូមិឡកំបោរ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

តាមរបាយការណ៍របស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ផ្ទះដែលត្រូវអណ្ដាលភ្លើងឆាបឆេះ គឺជាប្រភេទ ឈើប្រក់ក្បឿង ទំហំ​៤ម៉ែត្រ​ គុណ ៥ម៉ែត្រ ​ចំនួន០៤ខ្នង​ រួមទាំងសម្ភារៈអស់ទាំងស្រុង និងបានបណ្តាលឲ្យឆេះរាលដាលដល់ផ្ទះអ្នកក្បែរខាងចំនួន០២ខ្នងរោលជញ្ចាំង។

បើតាមរបាយការណ៍ ករណីនេះបណ្តាលមកពីការឆ្លងចរន្តអគ្គិសនី តែមិនបានបណ្តាលឲ្យមានអ្នកណាម្នាក់រងរបួសឡើយ។ ក្នុងប្រតិបត្តិការអន្តរាគមន៍ កម្លាំងសមត្ថកិច្ចជំនាញបានប្រើប្រាស់រថយន្តពន្លត់អគ្គិភ័យចំនួន០៩គ្រឿង ក្នុងនោះរថយន្តការិយាល័យរាជធានីភ្នំពេញ​ ចំនួន០៨គ្រឿង ប្រើប្រាស់ទឹក​អស់០៦ឡាន​ ស្មើនឹង៣៦ម៉ែត្រគូប​ និងរថយន្តជំនួយមកពីសាលាខណ្ឌឬស្សីកែវ ចំ​នួន០១គ្រឿង​ ប្រើប្រាស់ទឹកអស់០១ឡាន​ ស្មើ​នឹង០៨ម៉ែត្រគូប៕