នគរបាលព្រហ្មទណ្ឌ បំបែកសំណុំរឿងឃាតកម្មសម្លាប់ជនជាតិចិនពីរនាក់នៅខេត្តព្រះសីហនុ

កម្លាំងនគរបាលនៃនាយកដ្ឋាននគរបាលព្រហ្មទណ្ឌ ដឹកនាំសហការជាមួយស្នងការដ្ឋាននគរបាលខេត្តព្រះសីហនុ និងស្នងការដ្ឋាននគរបាលខេត្តកណ្ដាល បំបែកសំណុំរឿងករណីឃាតកម្មសម្លាប់ជនជាតិចិនប្រុសស្រីចំនួនពីរនាក់នៅខេត្តព្រះសីហនុ ហើយដឹកសពជយកមកទម្លាក់ចោលក្នុងស្រុកកោះធំ ខេត្តកណ្ដាល។ ជនសង្ស័យជាជនជាតិចិនមានគ្នាចំនួន៣នាក់ ត្រូវបានឃាត់ខ្លួននៅចំណុចច្រកចេញផ្លូវល្បឿនលឿន ស្ថិតក្នុងក្រុងព្រះសីហនុ ខេត្តព្រះសីហនុ។

ជនសង្ស័យទាំងបីនាក់ដែលឃាត់ខ្លួនមាន ១ ឈ្មោះ REN JIASHENG ភេទប្រុស អាយុ៣៦ឆ្នាំ ជនជាតិចិន។ ២ ឈ្មោះ JIANG BAO ភេទប្រុស អាយ៤៨ឆ្នាំ ជនជាតិចិន និង៣ ឈ្មោះ YE YIYONG ភេទប្រុស ជនជាតិចិន។ ក្រោយពីឃាត់ខ្លួនសង្ស័យខាងលើត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធី។

សូមជម្រាបថា កាលពីថ្ងៃទី១៨ ខែកក្កដា ឆ្នាំ២០២៥ មានករណីបាត់ខ្លួនជនរងគ្រោះឈ្មោះ ZHANG RUJU ភេទស្រី អាយុ៤៣ឆ្នាំ ជនជាតិចិន និងឈ្មោះ DONG YUANYUAN ភេទប្រុស អាយុ៣៩ឆ្នាំ ជនជាតិចិន ស្នាក់នៅសណ្ឋាគារ ស៊ីនហ្វា ស្ថិតក្នុងភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ។ លុះនៅថ្ងៃទី២៣ ខែកក្កដា ឆ្នាំ២០២៥ សពជនរងគ្រោះចំនួន២នាក់ខាងលើ ត្រូវបានគេប្រទះឃើញ ដែលត្រូវគេសម្លាប់រួចយកទៅទម្លាក់នៅក្នុងទន្លេបាសាក់ ស្ថិតក្នុងភូមិពោធិបាន ឃុំពោធិបាន ស្រុកកោះធំ ខេត្តកណ្តាល។

បន្ទាប់ពីពិនិត្យលើសាកសព និងបើកការស្រាវជ្រាវតាមនីតិវិធី និងជំនាញរហូតកំណត់បានអត្តសញ្ញាណ និងទីតាំងលាក់ខ្លួនរបស់ក្រុមជនសង្ស័យដែលបានប្រព្រឹត្តបទ ទើបឈានដល់ការឃាត់ខ្លួនតែម្ដង៕