សន្តិសុខសង្គម

នគរបាលក្រុងបង្ហាញមុខក្មេងទំនើង ១៤ នាក់ បង្កហិង្សា ៣ ករណី ស្លាប់មនុស្សម្នាក់ និង របួស ៤ នាក់

បានផុស

៩ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

នគរបាលក្រុង បានឃាត់ខ្លួន និងបង្ហាញមុខក្មេងទំនើងចំនួន ១៤ នាក់ ដែលធ្វើសកម្មភាពប្រដាប់ដោយដាវ ដុំថ្ម បង្កហិង្សាបណ្តាលឲ្យស្លាប់មនុស្សម្នាក់ និងរងរបួស ៤ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ១១ ខែកញ្ញា ឆ្នាំ ២០២៥ នេះ នគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បាននាំខ្លួនក្មេងទំនើងចំនួន ១៤ នាក់ មកបង្ហាញមុខឲ្យសាធារណជនបានឃើញជាសាធារណៈ។

ក្មេងទំនើងទាំង ១៤ នាក់ រួមមាន ៖ ១-ឈ្មោះ ចេន ឌី អាយុ ១៨ ឆ្នាំ , ២-ឈ្មោះ ឆេន វិសាល អាយុ ១៨ ឆ្នាំ , ៣-ឈ្មោះ ចិត្ត វិច្ឆិកា អាយុ ១៩ ឆ្នាំ , ៤-ឈ្មោះ លី ស៊ីនួន អាយុ ១៨ ឆ្នាំ , ៥-ឈ្មោះ ឈុន គីមឈាង អាយុ ២០ ឆ្នាំ , ៦-ឈ្មោះ រឿង ចាន់តារា ភេទប្រុស អាយុ ១៨ ឆ្នាំ , ៧-ឈ្មោះ ជឹម សានីត ភេទស្រី អាយុ ១៧ ឆ្នាំ , ៨-ឈ្មោះ អ៊ុក រស្មី អាយុ ១៧ ឆ្នាំ , ៩-ឈ្មោះ លាង ប៊ុនហាក់ អាយុ ១៧ ឆ្នាំ , ១០-ឈ្មោះ ថៃ ចាន់ថន ភេទប្រុស អាយុ ១៩ ឆ្នាំ , ១១-ឈ្មោះ ពឹង ម៉ីញគ័ង អាយុ ១៨ ឆ្នាំ , ១២-ឈ្មោះ ជាវ វឌ្ឍនា អាយុ ១៨ ឆ្នាំ , ១៣-ឈ្មោះ ផន វិសាល អាយុ ១៨ ឆ្នាំ និង ១៤-ឈ្មោះ ជឿន សុជា អាយុ ២០ ឆ្នាំ។ ដោយឡែក ជនរងគ្រោះឈ្មោះ ចាន់ សុវណ្ណ ភេទប្រុស អាយុ ១៨ ឆ្នាំ ជនជាតិខ្មែរ មុខរបរកម្មករសំណង់ (ស្លាប់) និង ឈ្មោះ ម៉ុល ពៅ ព្យាបាលរបួសនៅមន្ទីរពេទ្យ។

លោកឧត្ដមសេនីយ៍ត្រី ប៊ុត សត្យា ស្នងការរង បានឲ្យដឹងថា ដោយអនុវត្តតាមបទបញ្ជាផ្ទាល់ពី លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងការិយាល័យ នគរបាលព្រហ្មទណ្ឌកម្រិតស្រាល បានសហការជាមួយអធិការនគរបាលខណ្ឌមានជ័យ ធ្វើការស្រាវជ្រាវ ដោយឃាត់ជនសង្ស័យចំនួន ១៤ នាក់ ក្រុមក្មេងទំនើងឈ្មោះ ក្រុមចាក់អង្រែ (CA) ក្រុមផ្សារក្រមួន និង ក្រុមតាខ្មៅ កាលពីថ្ងៃទី ៩ និង ថ្ងៃទី ១០ ខែកញ្ញា ឆ្នាំ ២០២៥។

លោកបន្តថា ក្មេងទំនើងទាំង ៣ ក្រុមនេះ បានប្រព្រឹត្តអំពើហិង្សាមានចេតនាចំនួន ៣ ករណីផ្សេងៗ គ្នា ដោយករណីទី ១-ព្រួតគ្នាយកដាវកែច្នៃដេញកាប់ ហើយយកមួកសុវត្ថិភាពគប់លើជនរងគ្រោះកំពុងជិះម៉ូតូឌុបគ្នាចំនួន ២ នាក់ បណ្ដាលឲ្យអ្នកបើកម៉ូតូរេចង្កូតទៅបុកគម្របលូស្លាប់ នៅផ្លូវវេងស្រេង ភូមិដំណាក់ធំ ២ សង្កាត់ស្ទឹងមានជ័យ ៣ ខណ្ឌមានជ័យ រាជធានីភ្នំពេញ កាលពីយប់ថ្ងៃទី ៧ ខែកញ្ញា ឆ្នាំ ២០២៥។ ករណីទី ២-ព្រួតគ្នាយកជើងធាក់ម៉ូតូឲ្យដួល រួចយកដាវកែច្នៃកាប់លើជនរងគ្រោះបណ្ដាលឲ្យរងរបួសដេរចំនួន ១០ ថ្នេរ កាលពីយប់ថ្ងៃទី ៧ ខែកញ្ញា ឆ្នាំ ២០២៥ នៅចំណុចផ្លូវលេខ ២១៧ ភូមិដំណាក់ធំ ១ សង្កាត់ស្ទឹងមានជ័យ ២ ខណ្ឌមានជ័យ រាជធានីភ្នំពេញ។ ករណីទី ៣-ក្មេងទំនើងមានបក្សពួកចំនួន ១២ ម៉ូតូ និង ២៣ នាក់ បានធ្វើសកម្មភាព វាយ និងគប់ ដុំថ្មទៅលើជនរងគ្រោះបណ្ដាលឲ្យរបួសធ្ងន់ម្នាក់ និង ស្រាលម្នាក់ នៅចំណុចមុខនាយកដ្ឋានអង្គរក្ស សង្កាត់ជ័យជំនះ ខណ្ឌដូនពេញ រាជធានីភ្នំពេញ កាលពីយប់ថ្ងៃទី ៩ ខែកញ្ញា ឆ្នាំ ២០២៥។ ជាលទ្ធផលសមត្ថកិច្ចដកហូតវត្ថុតាងម៉ូតូចំនួន ៧ គ្រឿង និងដាវកែច្នៃ ២ ដើម។

បច្ចុប្បន្ន សមត្ថកិច្ច បានបញ្ជូនជនសង្ស័យទាំងអស់ទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី នៃច្បាប់៕

អត្ថបទ ៖ រដ្ឋា

Related Topics:បង្ហាញមុខ ខណ្ឌមានជ័យ ក្មេងទំនើង

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា